Maronn’ rô Carmin’, e tedesc’

‘O vinticinc’ april’ s’avvicin’, tutt’ quant’ so’ cuntent’ pecché è ‘na jurnat’ ‘e fest’ e nun se fatic’. Pe’ nu juorn’ ce liberamm’ rô mast’ ma ‘a liberazion’ cchiù gross’ è stat’ quann’ tutta l’Italia s’è liberat’ ‘e nu mast’ mille vot’ pegg’: ‘o fascism’.
Famosa int’ â storia so’ ‘e quatt’ jurnat’ ‘e Napul’ quann’ praticament’ e napulitan’ cacciajen’ a cavec’ ‘n cul’ e tedesc’, un episodio quasi râ stess’importanz’ re quatt’ pallun’ che ‘o Napul’ ha rat’ ê tedesc’ rô Wolfsburg ‘na semmana fa.
Paricchij nun sapen’ che primm’ ‘e ‘stu fatt’ ce ne fuje ‘n at’ e i protagonisti fujen’ e prievt’ carmelitan’ râ Maronn’ rô Carmen’ che senza paur’ pigliajen’ pe’ ccul’ ‘e soldat’ tedesc’ che jeven’ truann’ Corradino di Svevia che stev’ astipat’ llà.
Praticamente Hitler, cu chella cap’ chien’ ‘e mmerd’ ca tenev’, vulev’ purta â Germania chell’ ca rummanev’ ‘e ‘stu guagliunciell’ ‘e sirec’ ann’ ca scennett’ pe’ combatter’ Carlo II d’Angiò che, ‘nzurfat’ rô Pap’ che c’eva prumis’ ‘o tron’ râ Sicilia, int’ ‘a battaglia ‘e Benevento accerett’ ‘o zzio Manfredi – figlio ‘e Federico II – si pur’ chist’ s’eva pigliat’ ‘o Regno di Sicilia che aspettav’ a iss’.
Stu nennill’ stev’ tutt’ bellill’ e tranquill’ a casa soja in Baviera, magnann’ wurstel e crauti, quann’ e ghibellini (chill’ ca facevan’ ‘o tif’ pe’ l’imperator’ e nun putevan’ vere’ ‘o Pap’) ‘o priajen’ ‘e scenner’ pecché accusavan’ malament’ che nu guelf’ (a parta tifos’ pô Pap’) stev’ assettat’ ‘ncopp’ ô tron’ râ Sicilia.
Corradino allor’ avetta pusa’ e bbirr’ e scenner’ in Italia addò fuje accugliut’ assaje bbell’ pe’ tutt’ part’ ma quann’ se scuntraje cu Carlo II d’Angiò, a Tagliacozzo, se n’etta fujì e venett’ acchiappat’ e purtat’ a Napul’ addò ô tagliajen’ ‘a cap’ a piazza Mercato.

Mò ‘a mamm’, Elisabetta di Baviera, crerenn’ ca facev’ a ttiemp’ a salva’ ‘o figl’, currett’ cu nu malluopp’ ‘e sord’ ma fuje tropp’ tard’; nun sul’ ‘o piccirill’ suoje l’evan’ accis’, ma addirittur’ l’evan’ ittat’ abbasc’ a marin’ e fuje sul’ pâ pietà rô popol’ ca c’evan’ mis’ ‘e pret’ acopp’. Allor’ bbuon’ pensaje ‘e dà ‘e sord’ ê prievt’ carmelitani pe’ ce rà ‘na degna sepoltura a chella pover’anim’ ‘e ddij; chist’ ‘o ‘nterrajen’ sott’ a ‘na lapid’ cô nomm’ suoj e ogn’ann’ ce riceven’ ‘na mess’. Massimo II di Baviera, ca er’ nu discendent’, ce vulett’ fa’ costruì ‘nu monument’ funebre ca ‘o pruggettaje indimen’ Thorvaldsen, nu grand’ scultor’ rô neoclassicism’ ma ‘o facett’ Schoepf (nun me chierit’ comm’ si pronuncia).
Insomma, turnann’ a chella chiavec’ ‘e Hitler, chist’ vulev’ piglia’ ‘e cener’ ‘e Corradino pecché era proprj ‘o megl’ esempio rô giuvinott’ ariano, biondo, occhi azzurri, curaggius’ e muort’ c’onore a livell’ ca si a chilli tiemp’ già ce stev’ Luciano Caldore sicuro sô purtav’ â Gemania a canta’! Quann’ e surdat’ trasetten’ int’ â cchies’ e jeven’ cercann’ a Corradino e prievt’, furbamente, ce facetten’ legger’ ‘a lapid’ addò stev’ scritt’ ca l’urna era stat’ spustat’ dall’altare maggiore, ma mancav’ ‘nu piezz’ accussì nun se capev’ se stev’ asott’ o aret’ ‘o piedistall’ ro monumento funebre.
Spustajen’, rumpetten’, ma nun truvajen’ nient’ pecché Corradino stev’ astipat’ arint’ ‘o piedistall’ rô monument’; se ne jetten’ cu ‘na man’ annanz’ e una aret’ e chi ‘o ssap’ che cazziat’ s’acchiappajen’ ra Hitler!
‘Sta cchies’, ch’è un’ re cchiù important’ ‘e Napul’, fuje fravecat’ a via rô milleccient’ e coccos’ rê muonac’ carmelitan’ che se n’avettan’ fujì rô Monte Carmelo assediato da e musulman’.
Chisti munaciell’ se sceglietter’ nu tempicciull’ dedicato a San Nicola addò jeven’ e piscatur’ ‘e “Campo Moricino” a pria’ pecché er’ ‘na zon’ isolata; ‘sta zzon’ se chiammav’ accussì pecché vicin’ ô mar’ stev’ nu muricciull’ ‘e recinzion’ ch’eva difes’ ‘a città dagli attacchi re musulman’ e re longobard’. Int’ a cripta ‘e ‘sta grotticella, accussì comm’ venev’ chiammat’ ‘sta chiesa piccerell’, ‘e muonac’ ce piazzajen’ ‘o dipint’ râ Maronna bbrun’ che s’eran’ purtat’ cu llo’r fujenn’ fujenn’ pecché ce tenevan’ assaje e quann’chianu chian’ quann’ ‘a città s’allargaje se diffondett’ pur’ ‘o cult’ ‘e sta Maronn’.
Quann’ fuje accis’ Corradino, ‘a piazz’ er’ ggià nu mercat’ e Carlo d’Angiò rett’ nu sacc’ ‘e terr’ ê carmelitan’ pe’ costruì ‘na chiesa nov’ che, inizialment’ aspartat’ râ chiesa vecchia, tenev’ ‘e fform’ rô goticism’ comm’ se po’ vere’ ra chellu ppoc’ ch’è rummas’ ‘e tann’ e che sta soprattutto int’ ô chiostr’.
‘Sta cchies’, aropp’ che fuje azzeccat’ cu chell’ ‘e primm’, subett’ infatti nu sacc’ e modificazion’ fino ad arriva’ a mmò int’ â vesta barocca cu chillu grand’ campanil’, ‘o cchiù avet’ râ città, chiammat’ ‘e Fra’ Nuvolo pecché ‘stu muonac’/architett’ facett’ ‘a pont’ ottagonal’ ricoprendola di maioliche pittat’. Ma ‘stu campanil’ è importante soprattutto pâ devozion’ quann’ durante ‘a fest’ rô 16 ‘e luglio s’appicc’ co’ e fuoc’ d’artificio p’arricurda’ comm’ ‘a Maronn’ proteggett’ ‘a città quann’ e Saracen’ a vulevan’ attacca’. A decorazion’ ‘e rint’ è di Nicola Tagliacozzi Canale che disegnaje stucchi, marm’ ‘e tutt’ e culur’ e gli intagli ‘e lignamm’ mentre ‘ncopp’ all’ingress’ ce sta’ ‘n organo rô Settecient’, si pur’ ‘a strumentazion’ arint’ è moderna, cu ‘na bella statuta ‘e San Michele Arcangelo rô Seicient’ asott’ e settecentesco è pur’ ‘o pulpit’ addò Masaniell’ ‘nzamje ‘a ggent’ prim’ ‘e esser’ accis’ int’ ô cunvient’ râ stessa cchiesa.
(Ce sta ‘na lapide, a riguardo, che ricorda che ‘a tomb’ ‘e Masaniello stev’ int’ a ‘sta chies’ fino a quando Ferdinando IV nun ‘a facett’ distrugger’.)
Cammenann’ ‘ncopp’ ‘a sinistra se ‘ncocc’ ‘o famos’ monumento funebre ‘e Corradino e si aizzat’ l’uocchie putit’ ammira’ ‘o suffitt’ cassettonato (i cassetton’ fosser’ e quadrat’ ‘e lignamm’) cu ‘na bella Maronn’ c’a facett’ Giovanni Conte detto il Nano, incarecat’ da ‘o cardinal’ Filomarino che infatti ce facett’ metter’ e stemm’ râ famiglia soja; ‘o suffitt’ original’ però se ne carett’ ô 1943 e accussì ne facetten’ un’ tal’ e qual’ ô 1955.
Int’ ‘a primma cappell’ a destra ce sta nu dipint’ ‘e Mattia Preti cu San Simone Stock e il Beato Franco che o mannajen’ aret’ pecché ‘o pittor’, ca tann’ er’ già vicchiariell’, se ‘nzallanett’ e sbagliaje e culur’ rê vest’ rê muonac’ confondendo e culur’ cu chill’ rê dominican’.
Bbuon’ pe’ iss’ ca stev’ a Malta o si no e carmelitan’ c’o chiavavan’ ‘nfacc’!
Semp’ ‘ncopp’ a ‘stu lat’ sta ‘na cappell’ câ Madonna del colera ca foss’ ‘a statua ca purtavan’ in prucession’ ê tiemp’ rô culer’ e che secondo me ‘o Napul’ avess’ purta’ ogni vvot’ ca va in trasferta.
Nel 1671 il principe di Cellammare vulett’ fa’ ancor’ cchiù bbell’ ‘sta cchies’ e facett’ arricchì ‘o transett’ (‘a part’ perpendicolar’ ‘e ‘na cchies’) addò ‘a volta a crociera (ca fossen’ ll’arc’ ca se incrocian’ sott’ ô suffitt’) è l’unic’ elemento gotico c’arricord’ l’origin’; stucc’ marm’ ‘e tutt’ e culur’ ca poi fujen’ sostituit’ ra chell’ che ce sta mò.
Int’ all’abside chin’ ‘e marm’, capitell’, pilastri robb’ cos’ ce ‘sta ‘n arc’ – comm’ si nun abbastass’ già tutt’ ‘sta rrobb’ – addò se ver’ ‘o quadr’ râ Maronn’ che sta cchiù aret’ int’ a ‘stu tripudio ‘e culur’, pret’ prizios’ e marmi ‘e tutt’ culur’ ispirati probabilmente a nu progett’ ‘e Cosimo Fanzago.
Nu grande progetto che fa capì comm’ eran’ addivintat’ putent’ ‘sti muonac’ che chiammajen’ pur’ Solimena a pitta’; tra le tante opere che facett’, degna ‘e not’ è l’Assunta ca sta int’ â cappell’ a destra da dove s’arriva â sacrestia rifatta rô cap’ semp’ ra Tagliacozzi Canale ca prugettaje nu fatt’ tutt’ ‘e roccocò napulitan’ ‘e ricciulill’ e drappeggi cu marmi, stucc’, arredi ‘e lignamm’ addò quasi nun ce stev’ ‘na cosa diritta!
Chist’, c’avev’ già faticat’ comm’ingegnere int’ ‘a Certosa ‘e San Martino, piglia ‘a lezione ‘e Fanzago e ‘a fa’ roccocò seguendo l’esempio ‘e ggent’ comm’ Ferdinando Sanfelice e Antonio Vaccaro co’ e qual’ fuje in contatto.
Comm’ si nun abbastass’ int’ a chist’ ambient’ se trov’ pur’ l’altare ai Santi Carlo e Amalia ca fosser’ Carlo di Borbone e ‘a muglier’ Amalia, benefattrice dell’ ordine, ca incarechajen’ Tagliacozzi ‘e ridisegna’ nu poc’ tutt’ cos’.
Dalla sacrestia se pò arriva’ int’ â cappella della Vergine addò sta appunt’ astipat’ ‘stu dipinto miracoloso che fuje spustat’ dalla cripta, ‘o nucleo primitivo ra chies’, quann’ restaujen’ l’abside; dint’ ‘o tiemp’ c’hanna mis’ ‘e mman’ a copp’ paricchia ggent’ pâ impreziosì, probabilmente pure Solimena. Nu discors’ a ppart’ va fatt’ pô tabernacolo, addò sta ‘nzippat’, che è ‘a primma opera ‘e nu scultore spagnuol’, Bartolomé Ordóñez, che facett’ pur’ l’altare della Cappella Caracciolo di Vico in San Giovanni a Carbonara e la tomba Bonifacio ai Santi Severino e Sossio. Sotto all’arco trionfale, int’ â ‘na teca, ce sta ‘o Crocifisso pur’ chist’ miracoloso pecché quann’ Alfonso D’Aragona stev’ assediann’ ‘a città, chist’ spustasje ‘a capa pe’ schiva’ na pall’ ‘e cannon’ che sfunnaje l’abside ra chiesa; mò sta ancor’ astipat’ llà e io so’ sicura che è pecché sta ‘nchiuat’ o si no Gesù Cristo se n’er’ scis’ ra chella croce schifat’ da ‘a razz’ ‘e mmerd’ ca simm’. In ogni caso ‘sta scultura lignea putett’ pur’ muvett’ ‘a cap’ ma par’ comunque nu poc’ rigida e ‘o cuorp’ unu piezz’ secondo nu gust’ arcaico ra scultura spagnola ro ‘300 mentre ‘e linee scavate ro torace ‘a fann’ ancora cchiù drammatica si pur’ accussì statica. Annesso alla chiesa ce stev’ pur’ nu convento di cui mò se ponn’ vere’ sulament’ piezzicciull’, jastemman’ jastemman’ int’ ô traffic’ ‘e via Marina; chist’ era strettamente connesso cô castello del Carmine, ultimo castello ra città ca fuje fravecat’ e l’unico ch’è stat’ completamente distrutto. Originariamente era nu torrion’ cô facett’ fraveca’ Carlo III di Durazzo poiché ce servev’ ‘na difesa int’ a chella part’ râ città che mò sta tra via Marina e corso Garibaldi; fravecat’ sul’ pâ difes’, eva esser’ fatt’ cu ddoj torr’ cilindriche, nu torrion’ e mura merlate quindi senza ati bagattell’ vicin’ tipo arazzi, apparamenti reali, cos’. Aropp’ ch’eva sustenut’ l’assedio ‘e Alfonso d’Aragona, quann’ ‘o frat scem’ Pietro vuttaje ‘a cannonat’ int’ â chies’, fuje ‘n at’ aragonese, Ferrante I, che ‘o vulett’ accuncia’ e affidaje ‘o proggett’ all’ingegner Spinelli che allargaje soprattutt’ ‘e mmur’ (perciò ‘na torre se chiamm’ Spinella) e mantenett’ fino a quando ‘na scarecat’ d’acqua nun ‘o vuttaje ‘n terr’ completamente. Allor’ nu viceré, Pedro Afan de Ribera, ‘o facett’ costruì rô cap’ su base quadrata ma aropp’ tutt’ ‘o maciell’ râ rivoluzione rô 1647, quann’ se ne jett’ ‘e cas’ llà ddint’ Gennaro Annese ca sâ cumanna’ iss’ aropp’ ‘a mort’ ‘e Masaniello, poiché tutt’ e militar’ nun ce trasevan’, alcuni ‘e chist’ ‘e mettetten’ int’ ô chiostr’ re carmelitan’ fino a quando po’ nun ‘o facetten’ aspartat’ comm’ ‘na fortezza co’ e bastion’. Durante a rivoluzione partenopea (1799) fuje trasformat’ int’ a nu carcer’ addò fujen carcerat’ e “rivoluzionar’” comm’ Eleonora de Pimentel Fonseca, Ettore Carafa, Luisa Sanfelice, Domenico Cirillo e ata gent’ ca fuje accis’ a piazza mercato.
Chell’ che rumman’ mò so’ sul piezz’ ‘e storia abbandunat’ int’ â munnezz’ ma passann’ pâ llà annanz’ chiurit’ l’uocchie e immaginat’ comm’er’

 

Disponibile per questo post anche il podcuozz

© 2015 Angela Giuliano

Annunci

3 Replies to “Maronn’ rô Carmin’, e tedesc’”

  1. Angela,
    pe’ primma cosa ‘na bbona jurnata a tte e buon 25 Aprile di festa della Liberazione. E buon Antinazismo e Antifascismo ora e sempe. Ogge cchiù d’aiere, visto ca nazisti e fascisti ce stanno ancora e procedono ‘nzieme, ai razzisti e xenofobi comm’a Lega di Bossi, Maroni, Borghezio, Zaia e Salvini, teneno ‘a stessa base ideologica, cioè l’odio pe’ ll’essere umano in generale, localismi e regionalismi, e in particolare, il migrante; e mmò, solo perché ai leghisti servono i voti, hanno deciso ca ‘o Sudd è terra di propaganda, occupazione e conquista.
    Nun ce simmo scurdate quanno Salvini cantava e diceva ca nuje napulitane puzzammo e ca ‘o Vesuvio c’adda lavà. Ccà si ce stà quaccuno ca s’adda lava ‘a vocca cu l’acido muriatico chillo è Salvini e ‘a lota comm’a isso. Pino Daniele l’aveva capito e cantava: Questa Lega è una vergogna. ‘Na cosa è certa comm’a morte; Salvini e tutt’a Lega, compresi nazisti e fascisti, ‘na cosa l’hanno conquistata ‘a paricchiu tiempo: ‘e cape chin’e mmerda. Aiere ‘a teneva Hitler, mò ‘e teneno loro.

    PS: A parte quanto sopra, volevo lasciare uno o due capitoli o racconti a proposito di un attacco di un gruppo di fascisti a un istituto di scuola superiore, avvenuto in quartiere molto tempo fa e un altro episodio in cui un bambino viene svegliato dalla mamma che dice:-Guagliò, scitete a mamma. Adderet’a scesa stanno facenno a guerra contro e tedesche. Scitete. Va pure tu. Te danno ‘nu sacchetto ‘e magnà addò ce stanno:’nu panino cu ‘a cutaletta, ‘na buttigliella d’aranciata e ‘na frutta. E pure ‘na cosa ‘e sorde. Ja, muovete. Viestete e curre -.
    ‘O Guaglione ancora nguacchiato ‘e suonno se vestette ambresso ambresso e currete cu ll’uocchie chine ‘ scazzimma addereta a scesa. Marò, overamente ce steveno ‘e tedesche vestute comm’e surdate tedesche, ma ce steveno pure ‘e cumoagnielle ‘e Guaglione ca tenevano pistole e fucile mmane pecchè avevano fatto prigioniere ‘e surdate tedesche. Uh, Maronna mia, penzaie ‘o Guaglione. E subbeto curreto ncopp’e scale passanno annanz’a funtana Cap’e Fierro. Ma proprio llà dduje giuvane ‘o fermaine dicenno: – Oh, a pischello,
    ‘ndo vaj. Nun se po’. Anvedì cosa stanno a ffà? – – Ma che vo’ chisto. Aggia j’ a ffà a guerra nzieme e cumpagne mie ca hanno fatto prigiuniere chilli surdate tedesche -.
    E quelli ridendo dissero: – Sei arrivato in ritardo. Siamo al completo. – Guaglione li guardò e corse dall’altro lato di vico Sottomonte, nel palazzo d’o fantasma. D’o finestrone avrebbe visto tutto quello che stava succedendo. Quello che non riusciva a capire pecchè ‘a banda d’o vico aveva fatto dei prigionieri e lui non ne sapeva niente. Nessuno l’aveva avvisato. Eppure il capo d’a banda d’e Piere Spuorche e Zezzuse era lui, ‘o Guaglione.

    Mi piace

    1. Mi piace e mi interessa,
      ma faccio fatica a seguire il dialetto, nonostante da bambina lo sentissi parlare dai nonni e dalle zie. Mi piacerebbe poi se ci fossero le foto dei luoghi che l’autore descrive.

      Mi piace

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...