‘A Campania ‘na vot’ se chiammav’ Felix pecché se coltivava ‘na bellezz’ e nun er’ comm’ e mmò, addò se cultivan’ ‘e malatie pe’ mmezz’ ‘e tutt’ ‘a mmunnezz’ ca ven’ ‘nterrat’.
Chist’ era ‘o mutiv’ pecché tutt’ quant’ vulevan’ sta ê ppart’ ccà: se magnav’ bbell’, ‘o mar’ er’ chell’ ca er’ e se campav’ bbuon’.
I romani, quann’ scennetter’ ê ppart’ ccà, tra le tante cose facetten’ pur’ ‘nu grand’ campusant’ vicino Nola, ca chianu chian’ addiventaje ruoss’ quant’ ‘a città stess’ tant’ ca parev’ ca ce stev’ ‘na città pê vivi e ‘n’ata pê muort’.
Mò, praticamente, quann’ e cristian’ venevan’ ancor’ accis’, s’annascunnevan’ ccà dint’ pe’ pria’ e annascunnevan’ pur’ e muort’ llor’ mmiezz’ a chill’ rê pagan’ ; però pe’ fa’ capì c’appartenevan’ a llor’ azzeccavan’ ‘ncopp’ ê taut’ e simboli comm’ ‘o pavon’, ‘o pesce, ‘o melograno, ‘a vite accussì quann’ ‘a ggent’ ‘e verev’, chi aveva capì capev’.
Ccà venett’ ‘nterrat’ S.Felice, nu prete (nun s’adda confondere cô primm’ vescovo ‘e Nola) ca fuje martirizzat’ ma nisciun’ sap’ comm’; se sap’ sul’ ca facett’ nu sacc’ ‘e miracoli e ‘a ggent’ jev’ a prià ‘ncopp’ ô taut’ suoje pecché a quanto pare facev’ guarì. Infatti ‘o chiammavan’ Felix Medicus e nun sul’ era duttor’, ma pur’ esorcista!
Se facevan’ proprj e pellegrinaggi tanto che ce facetten’ nu mausoleo che è stat’ un’ rê primm’ testimonianz’ architettoniche cristiane. Aropp’ l’editto ‘e Costantino, quann’ praticament’ e cristian’ putevan’ pria’ senz’esser’accis’, se vuttajen’ ‘n’ terr’ ‘e monument’ funerari ca stevan’ attuorn’ e se facett’ cchiù spazio sul’ pe’ pria’ ‘stu sant’, pecché ‘a ggent’ ca venev’ era veramente assaje. S’abbiajen’ accussì a costruì ‘e basiliche, c’addiventajen’ l’edifico simbolo râ cristianità, accussì comm’ ‘o tempio greco era stato pô paganesimo.
Intorno alla tomba di S.Felice ci fuje accussì nu boom edilizio, tutt’ quant’ vulevan’ esser’ ‘nterrat’ llà e accussì abbiajen’ a spunta’ taut’ pe’ tutt’ part’!
Ma ‘o rrevuot’ ‘o facett’ San Paolino, ca tann’ nun era ancora nu sant’: chist’ praticament’ aropp’ ch’eva visitato ‘stu santuario quann’era governatore ra Campania decidett’ ‘e se trasferì direttament’ ca muglier’ llà. Se vennett’ ‘e cos’ soje, palazz’, quartin’ ecc. (era nu nobile ca veneva râ Francia) e facett’ restrutturà tutt’ cos’ e costruì ‘na chiesa nov’. Nun sul’! Poiché ce tenev’ assaje pe’ ‘stu sant’ (accussì assaje che ce dedicaje 14 poesie) facett’ accuncia’ pur’ ‘a via ca purtav’ llà, facett’ fraveca’ casarell’ pe’ puveriell’ e pur’ ambienti monastici pe’ chi se vulev’ sta a pria’ pe fatt’ suoj e fuje un’ rê primm’ munaster’ râ cristianità occidentale, nu secolo primm’ ‘e S.Benedetto.
‘Stu complesso fuje chiammat’ Ospitium Amicitiae (se legge Ospizium amicizie) e addiventaje praticament’ nu bell’ Santuario organizzato assaje bbuon’.
Mettett’ funtan’ pe’ fa vever’ ‘a ggent’ ca jev’ llà in pellegrinaggio, aggratis senza speculazion’ e venditori ambulanti ca vennevan’ ‘na buttigliella d’acqua a 3€!
Nascett’ accussì la Città Santa di Coemeterium (perciò mò ‘o paese se chiamm’ Cimitile) c’addiventaje assaje famosa tant’ che ne parlav’ pure S.Agostino; comm’ si foss’ San Giovanni Rotondo mò, ma no accussì kitch.
Insomma, ‘o facett’ felice (mo ‘nce vò) e comm’ ricev’ primm’, avetta costruì ‘na chiesa nov’ pecché chell’ata addò stev’ S.Felice era tropp’ piccerell’ e ‘a ggent’ assaje.
Allargaje ‘o spazio râ basilica vecchia, abbuffaje ll’at’cu nu sacc’ dipint’ rê Sacre Scritture pecché ‘a ggent’ ca er’ sostanzialmente ignorante e nun sapev’ né leggere e né scrivere putev’ ‘mpara’ guardann’.
Stev’ proprj assai annanz’ ‘stu sant’, tanto che prugettaje tutt’ cos’ comm’ nu grand’ architetto e facett’ venì nu sacc’ ‘e mast’ a fatica’ ra tutt’ part’.
Muort’ San Paolino se continuaje a fraveca’, accuncia’, ce metten’ man’ nu sacc’ ‘e llor’, e Longobardi s’arrubbajen’ ‘o cuorp’ ‘e San Paolino e alcune reliquie’e San Felice, s’allagaje tutt’ cos’ cô straripamento rô ciumm’ Clanis, se mettett’ pur’ ‘o Vesuvio; nu sacc’ ‘e fatt’, insomma, ca so’ nu poc’ ‘a caratteristica generale ‘e ‘stu sito addò se so’ ammiscat’ taut’ pagan’ e cristian’ e pittur’ un’ ‘ncopp’ all’at’.
Ma jamm’ a vere’ ‘e che se tratt’.
Trasenn’ da via Madonnella, pecché nun se po’ trasì pe’ l’ingresso principale, l’arco santo, ‘a primma basilica ca ce truvamm’ ‘e faccia è chell’ ‘e S.Tommaso cô campanile a forma ‘e bulbo: chest’ fuje fravecat’ ‘n copp’ ‘a terr’ ca s’ammassaje aropp’ l’alluvion’ rô ciumm’ ed è interessante sul’ pecché cca dint’ e muort’ fujen’ ‘nterrati câ rrobba llor’, oricchin’, fibule ca mò stann’ astipat’ dint’ all’ antiquarium c’hanna organizzat’ dint’ a basilica ‘e S.Felice. Nun ce sta niente ‘e che arint’, né marmi né chissà che pittur’ probabilmente pecché quann’ ‘a città Santa nisciun’ sâ cacaje cchiù pe’ nu periodo, ‘sta chiesa addiventaje ‘a stalla e nu deposito agricolo. S’adda pure arricurda’ che ce fravecajen’ acopp’ ‘na chiesa barocc’ dedicata al SS. Sacramento che sacramento e bbuon’ cancellaje tutt’ chell’ ca ce stev’ primm’; ‘e chesta trasformazione so’ rummas’ cierti dipint’ cû cornici ‘e stucco ca nun so’ nient’ ‘e che, si amma essere onesti.
‘Na vot’ c’amma passat’ l’arco di tufo ca sta ‘n facc’ a ‘sta basilica arrivamm’ alla Cappella dei SS. Martiri ca se chiamm’ accussì pecché secondo ‘a tradizion’ ce sta nu puzz’ addò hanna ittat’ letteralmente ‘o sang’ e martiri e ‘o juorn’ ca so’ muort’, stu sang’ voll’. Inizialmente chist’ambiente era ‘nu mausoleo funerario, po’ venett’ Leone III e bbuon’ facett’ ‘o trasfurmaje completamente.
Innanzitutto ce facett’ metter’ nu protiro (nu portico piccirill’ annanz’ all’entrata) assaje particolar’ addò e culunnett’, ca so’ intagliate proprj bell’, furnescen’ acopp’ cû duje capitelli corinzi (ca fosser’ appunto chilli cos’ acopp’ ‘e culonn’) c’arricordan’ nu stile classico-bizantino. Dint’ â lunetta ce sta pittat’ ‘na Maronn’ che prega ‘mmiezz’ a duje angeli e sta incatastat’ nu piezz’ ‘e marm’ addò stann’ scritt’ miracoli rê Martiri e pur’ ‘e S.Felice, giusto pe’ nun ‘o fa’ piglia’ coller’. Ma ‘a cosa massiccia assaje ‘e ‘sta cappella so’ gli affreschi che stann’ arint’! ‘Sti dipinti nun sul’ so’ i primm’ esempi ‘e arte cristiana ‘a for’ Roma ma soprattutto ‘na grandissima testimonianza râ pittur’ ‘n copp’ ê mur’ rô 3° secolo in Italia meridionale, nu fatt’ assaje importante si se pensa ca so’ unici dint’ a tutt’ ô munn’ pecché ‘e pittajen’ primm’ ‘e l’editto ‘e Costantino quann’ nun s’accerevan’ cchiù e cristian’.
Dint’ all’abside, ca è stat’ parzialmente vuttat’ ‘n terr’, se ponn’ vere’ duje strat’ un’ ‘nguoll’ a ‘n at’: chill’ cchiù antic’ (11° secolo) è ‘na Maronn’ mmiezz’ a duje angeli; chill’at’, (13°secolo) raffigura Maria Regina con Giovanni Battista. In alto ce sta nu Cristo assettat’, ‘ncopp’ â volta nu grand’angelo e pe’ nun ce fa manca’ nient’ pur’ nu piezz’ ‘e crocifission’.
Assaje assaje interessante è ‘a Maddalena ca sta pittat’ dint’ a ‘na nicchia: è interessante pecché innanzitutto nun ce stann’ ata raffigurazion’ comm’ a chest’, câ santa cu ‘na corona ‘n cap’; ce sta chi addirittura ric’ ca ‘stu dipinto risale ô 5°/7° secolo pecché sta int’ â part’ cchiù antica e pecché nun ce stann’ piezz’ mancant’ attuorn’ né ata dipinti piazzat’ acopp’.
Ccà ce sta pur’ nu piezz’ ‘e marm’ scavat’ dint’ a nu punt’ addò se ric’ ca ‘na cristiana facett’ care’ ‘na goccia ‘e sang’ aropp’ ch’eva ‘nzuppat’ ‘o rusario dint’ ô puzz’ rê martiri.
Ma ‘o piezz’ ruoss’ è l’aula feliciana, cioè praticamente tutt’ ‘o spazio attuorn’ a chill’ ca originariamente era ‘o taut’ addò stev’ ‘nterrat’ S.Felice; ‘ncopp’ a chist’ ce fravecajen’, comm’ aggia ritt’ primm’, nu mausoleo quadrato, piccirill’ e addò steven’ ‘nterrat’ pur’ dduje vescovi ‘e Nola, Massimo e Quinto. Arrivaje po’ S. Paolino e arrevutaje facenn’ costruì ‘a basilica nova, ittann’ ‘n terr’ l’abside dell’aula corpus ch’evan’ fatt’ aropp’ ‘o 313 d.C., e transennaje ‘o taut’ ‘e S.Felice cô marm’ oltre a collega’ ‘e ddoje cchies’ cu nu bell’ triforium.
Restrutturaje ‘a basilica vetus, chell’ ‘e primm’, e facett’ aizza’ culonn’ ô post’ rê pilastri, facett’ fraveca’ pur’ nu matroneo ca purtav’ direttamente dint’ ô Munaster’, accussì se putev’ passa’ pur’ p’allà. Regnett’ ‘stu spazio ‘e nu sacc’ ‘e cos’ bbell’, facett’ pitta’ ‘n facc’ e mur’ e mettett’ pur’ e paviment’ nuov’.
Muort’ S.Paolino allargajen’ ‘o recinto pe’ fa’ trasì arint’ pur’ ‘o taut’ suoj e quindi tutt’ ‘o blocc’ addiventaje nu grand’altare e pe’ fa’ pare’ tutt’ cchiù bbell’ ce fravecajen’ pur’ un’edicola cô e mosaici d’oro bell’assaje.
Primm’ ‘e trasì te truov’ ‘o campanil’, bbell’ massicc’, che secondo ‘a tradizion’ (comm’ sta scritt’ pur’ ‘n copp’ a ‘na lastra ‘e marmo) fuje ‘o primm’ râ cristianità e fuje S.Paolino, inventore rê primm’ campane, che ‘o facett’ fraveca’ pe’ ce metter’ arint’.
Ma nun è ‘o ver’, nun ce sta nisciun’ fatt’ archeologico che lo conferma; l’unica cosa nun c’o dicit’ a nu nolan’ o si no chi sô fir’ ‘e sentì!
Asott’ ce sta ‘na scalinat’ ca fuje chiammata Santa da e primm’ cristian’ pecché purtav’ addò erano stati martirizzati e santi e addò tenetten’ pur’ carcerat’ a S.Alcalà.
Annanz’ all’ingresso ce sta nu protiro fatt’ ‘e tufo c’ô facetten’ ô 1800 azzeccann’ ddoj culunnett’ ‘e granito pigliat’ ra cocc’ ppart’ semp’ p’allà e azzeccat’ ô portal’, pur’ chist’ fatt’ usann’ piezz’ scavat’.
Trasenn’, ‘n copp’ â sinistra, stann’ dduje strat’ ‘e affreschi: ‘o cchiù antic’ cu l’albero di Jesse e ‘o cchiù recent’ invece, cchiù abbasc’, cu s.Giorgio, S. Giuann’ Battista e S.Nicola che piglia pê capill’ nu criatur’ cu nu boccal’ e ‘na coppa mman’.
Praticamente ‘stu guagliunciell’ (Adeodato o Basilio, a seconda delle fonti) era stat’ pigliat’ da nu rre pagan’ che ‘o mettett’ a fa’ ‘o garzon’ suoje e chistu guagliunciell’ pria’ a S.Nicola che ‘o jett’ a piglia’ pê capill’ e ‘o purtaje a casa, nu poc’ comm’ fann’ e mamm’ quann’ vann’ a piglia’ e figli che stann’ pazziann’ a pallonn’ mmiezz’ â via e nun vonn’ turna’ a casa che sta ‘o piatt’ a tavola.
Assaje importanti so’ pure ciert’ affreschi che stann’ semp’ trasenn’ ‘n copp’ â destra, dint’ a ‘n arco: ce sta ‘n agnello mmiezz’ a dduje angeli, una accà e ‘n at’ allà, e asott’ ‘na prucession’ ‘e ggent’ vestut’ comm’ e chierichetti; nu poc’ cchiù allà nu vescovo co’ ‘e braccia annanz’ mentre sta benericenn’ nu muort’ stis’ ‘n copp’ ô liett’ ‘e mort’ .
Comm’ ricev’ primm’, nu poc’ comm’ tutt’ ‘o complesso, pure dint’ a ‘stu spazio ce metteten’ man’ nu sacc’ ‘e vot’ e pe’ sparagna’ pigliavan’ e piezz’ ‘e chell’ch’evan’ vuttat’ ‘n terr’ e l’usavan’ ‘n’ata vot’; e pittavan’ pur’ ‘a copp’ accussì capita ‘e vere’, vicino a cierti pittur’ medieval’ addò e cristian’ tenen’ l’uocchie ruoss’ ruoss’, cristian’ nu poc’ cchiù accunciatiell’ comm’ ‘stu Cristo, rô quattucient’, che quann’ l’agg’ vist’ m’ha colpito assaje. A proposito ‘e Cristo, assaje particolar’ è ‘na raffigurazion’ râ fin’ rô X secolo addò ‘o tema ‘e l’eucarestia è rappresentato câ figur’ ‘e Nostro Signore pe’ tre vvot’, comm’ si foss’ nu fotogramma; putimm’ dicer’ che è ‘n affresco futurista ante-litteram (po’ vô spiego chi so’ e futuristi…).
Pe’ nu itta’ tutt’ a rrobb’ ch’era avanzat’ aropp’ ‘e restrutturazion’ e che nun s’era putut’ usa’, hanna fatt’ ‘n antiquarium cu nu sacc’ ‘e rrobb’ d’età romana, paleocristiana, medievale e postmedievale; ce sta rrobb’ comm’ nu bellu sarcofago ‘e marmo addò mettetten’ ‘o cuorp’ ‘e l’arcipresbitero Adeodato e pur’ nu vas’ ruoss’ addò se mettevan’ ‘e ceneri rô muort’ e che fuje usato pe’ battia’ ‘e criatur’ dint’ a basilica vecchia ‘e S. Felice.
‘N’ata dimostrazione ‘e comm’ morte e vita so’ intrecciate, un’appriess’ all’at’, int’ a un unico ggir’.
Passann’ pe’ nu cunicolo, s’arriva alla cappella di S.Calonio, ca ce costruetten’ acopp’ ‘a chiesa di S.Felice in Pincis e mò sta talment’ ‘nterrat’ ca par’ ‘na catacomba.
‘A facett’ restaura’ Leone 13° forse quann’ ce mettetten’ ‘e reliquie ‘e S.Canione che a Cimitile ven’ chiammat’ S. Calionio o Calione; pur’ cca stann’ e mmur’ pittat’ cu S.Felice e S.Paolino ma ‘e pittur’ cchiù interessant’ so’ chell’ rê tende, pittat’ proprj bbell’ int’ ê particolar’. Acopp’ a chest’ steven’ disegnate mensole in prospettiva cu l’animal’ appuiat’ e mò è rummas’ sul’ ‘na colomba che vev’ ra rint’ a ‘na copp’; l’esempio cchiù antico ‘e nu fatt’ ‘e chist’, cu ‘sti mensole accussì, è ‘a decorazione che s’è pers’ che papa Leone 5° facett’ fa’ dint’ â chiesa sotterranea ‘e S.Martino a Roma.
Poco rumman’ râ cappella di S.Maria degli Angeli, sul’ ‘n affresco cu ‘na Maronn’ cô criatur’ int’ bracc’ (nu poc’ sproporzionat’, l’amma dicer’) mmiezz’ a duje angeli che ha ‘a stann’ priann’; attuorn’ ce sta ‘na curnice addò sta pur’ scritt’ ‘a dat’ ‘e quann’ è stat’ fatt’.
Della Basilica Nova che facett’ fraveca’ S.Paolino so’ rummas’ sul’ alcuni piezzicciull’ ca mò stann’ ‘nzippat’ dint’ â chiesa ‘e S.Giovanni che facetten’ praticament’ acopp’ a chell’ ca rummanev’ râ basilica che se sgarrupaje pe’ nu terremot’ che facett’ allaga’ tutt’ cos’; ‘e chest’ se ver’ ancor’ cocc’ culonn’, una sta dint’ a nu mur’, nu poc’ ‘e decorazion’ ‘e marmi tutt’ colorat’.
Aropp’ ‘o maciell’ ca facett’ l’alluvione infatti pigliajen’ ‘a part’ dell’abside trichora râ basilica addò stev’ pur’ nu bellu mosaico che però s’è perdut’ (ma ‘o sapimm’ pecché ne parla Paolino dint’ a ‘na lettera) e ce facetten’ ‘na chiesetta addò pittajen’ pur’ e mur’.
‘E chesti pittur’ se ver’ ancor’ coccos’ e particolarmente interessante è ‘na scena che sta ‘n copp’, vicin’ a ‘na fenest’, addò sta certa ggent’ e un’ ‘e llor’ ten’ ‘na tenaglia ‘n mman’: nun se capisc’ bbuon’ pecché so’ sul’ piezz’, ma forse è quann’ schiuajen’ a Gesù Crist’ râ croce.
L’ultima chiesa è chell’ ‘e S.Stefano addò arint’ ce stann’ ‘e piezz’ rô porticato che ‘a collegava câ basilica nova; bell’assaje so’ ddoje culonn’ scalanat’ rô 2° secolo ca fujen’ riutilizzat’ pe’ l’arco trionfale.
E piezz’ e mur’ ca stann’ ammiezz’ so’ probabilmente ‘a ripartizione rê spazi funerari; arricurdammec’ infatti comm’ originariamente era tutt’ nu campusant’ e ancora mò, pure ccà, se ponn’ vere’ e taut’ scavat’.
Pur’ ‘sta basilica era pittat’ e comm’ all’ati ppart’ e pur’ ccà pittajen’ acopp’; ‘a pittat’ cchiù recent’ è chell’ addò se veren’ ‘e pier’ ‘e chist’ affresco ca fuje distrutto quann’ aizzajen’ ‘o livell’ rô pavimento.
Insomma furnesc’ accussì ‘o tour’ dint’ a stu compless’ ca si pur’ è tutt’ scurticat’ e sgarrupat’ astip’ ‘na suggestion’ nun sul’ pê piezz’ rummas’ ma soprattutto pe’ l’atmosfera ca se respir’.
Se sent’, int’ all’aria, ca tanta ggent’ ha priat’ ccà, se ver’ ‘a storia ‘e ll’art’ ch’è passat’: paleocristiana, bizantina, barbarica, romanica.
Stu post’ è ‘na cosa unica, secondo me.
Me facc’ sul’ ‘na domanda: comm’ hanna truat’ pace e muort’ aropp’ che tutta ‘sta ggent’, int’ ê secoli, ha mis’ man’ nu sacc’ e vot’; e soprattutto comm’ ponn’ truva’ pace mò a vere’ comm’ sta cumbinat’ chistu piezz’ ‘e terr’ che è nu patrimonio ‘e l’umanità pecché c’arricord’ ca si pur’ jamm’ a furnì tutt’ quant’ sott’ ‘o turrien’ simm’ fatt’ ‘e spirito.
E chill’ rumman’, pur’ int’ ê pret’.
© 2015 Angela Giuliano
Art for cuozzis 
