«Amo Napoli perché mi ricorda New York, specialmente per i tanti travestiti e per i rifiuti per strada. Come New York è una città che cade a pezzi e nonostante tutto la gente è felice come quella di New York».
Warhol s’è truat’ bbuon’ a Napul’ pecché l’arricurdav’ New York pȃ mmunnezz’, accucchiat’ dint’ȇ vic’ comm’ nu piezz’ ‘e arredamento kitch vicin’ ȇ monument’ storici e pȇ femmeniell’, vere e proprie dive rȇ quartier’: chist’ ca se muvevan’ comm’ figure mitologiche ‘ngopp’ ȇ tacc’, doppie e sinuose ‘ngopp’ a ‘na terra fatt’ ‘e acqua e fuoc’, in un equilibrio ca ten’ custanz’ sul’ dint’ȃ precarietà.
Mò si pur’ chist’artist’ tenev’ nu mod’ ‘e vere’ allisciat’, superficial’ (dint’ o sens’ che scorr’ ‘ngopp’ a superficie) è stat’ capace ‘e affunna’ e mman’ dint’ o magma simbolico ‘e chesta città e ha regalat’ a ‘na maner’ tradizional’ ‘e vere’ Napul’ nu sguard’ nuov’.
Dint’ a ‘na città mai tal e qual a se stessa, è stat’ cazz’ ‘e azzecca’ ‘o marchio suoj fatt’ ‘e serialità, ripetizione, rispettandone però ‘a natura anarchica e straripante facenn’ e ritratt’ rȃ ggent’ cu tutt e culur’ scumbinat’, che ascevan’ pe’ ffor’.
Praticamente ‘stu cristian’, che primm’ ‘e fa l’artista facev’ ‘o pubblicitario, bbuon’ pensaje ‘e usa’ tutt’ e marc’ re pubblicità pittan’ acopp’, cu culur’ nuov’ pecché vulev’ dicer’ che l’arte aveva esser’ pe’ tutt’ quant’ nun sul pe’ poca gente!
Nascett’ accussì ‘a pop art e ‘na buatt’ ‘e zupp’ addiventaje ‘n’opera d’arte, comm’ pur’ tutte le immagini rȃ ggenta famos’ tipo Marylin Monroe e Liz Taylor ma pur’ ‘e paggin’ rȇ giurnal’ addò steven’ scritt’ incidenti, accisatorie e fatt’ accussì; l’arte è ‘na merce, comm’ si foss’ coccos’ ca se po’ venner’ a tutt’ quant’ e se po’ fa’ nu sacc’ ‘e vot’.
Ma comm’ è che arrivaje a Napul’?
‘O purtaje ccà nu grand’ gallerista napulitan’, Lucio Amelio, il quale capett’ bbuon’ ‘a putenz’ ‘e Warhol e vulev’ rilancia’ nu poc’ ‘a situazion’ cultural’ rȃ città a livell’ internazionale; accussì bbuon’ pensaje ‘e fa’ nu pont’ fra Napoli e New York, ca steven’ ‘ncopp’ ‘a stessa latitudine e che a pensarci bbuon’ portan’ tutt’e ddoje dint’ o nomm’ ‘o concett’ ‘e novità.
Città che steven’ annanz’, avanguardie ‘e n’umanità spartut’ tra mar’ e viscere, part’ ‘e copp’ e underground.
Accussì Warhol venett’ a Napul’ e pȃ primma vot’ se stett’ sul’ tre juorn’; quann ce turnaje, poiché ‘a città ce piacett’, se stett’ cchiù tiemp’ e ce venett’ a mment’ ‘e pitta’ ‘e cchiù maner’ ‘o Vesuvio, ‘a muntagna, ca ‘o ‘mpressiuna’ assaje pecché nu vulcan’ che s’affacc’ ncopp a ‘na città è a cchiù grande espression’ rȏ fatt’ ca può murì bell’ e bbuon’ e quindi sta llà a t’arricurda’ ca ‘a vita è ‘na tarantell’ ca mort’.
Se ‘mpressiunaje accussì assaje che ‘o pittaje nu sacc’ ‘e vot’ e pur’ ‘e nu sacc’ ‘e culur’, pecché era nu fatt’ tropp’ terribile, ‘nu vulcano ca s’appoia ‘ncopp’ all’acqua è nu fatt’ ca nun po’ esser’ cos’ ‘e nient’.
Ma nun sul’, se integraje accussì bbuon’ che quann’ ‘o Napul’ vincett’ ‘o primm’ scudett’ se truvaje mmiezz’ ‘o burdell’ bandier’, clacson, gente che pȃ primma vot’ pruvav’ chell’emozion’ ‘e esser’ primm’; accussì, tutt’ gasat’ pur’ iss, trasett’ dint’ a ‘na ferrament’, accattaje ‘a vernice azzurra e pittaje ‘na machin’, ‘na Diana, che stev’ parchiggiat’ llà ffor’; se pigliaje ‘sta mala capat’ e facett’ ‘n’opera d’arte che chissà poi int a qual’ scass’ è jut’ a furnì.
Insomma, Warhol dint’ a ‘na città pop che cchiù pop nun se po’ allattaje malament’ e era accussì legat’ a ‘sta terra ca quann’ ce fuje ‘o terremot’ in Irpinia pigliaje ‘a primma pagin’ rȏ Mattino addò stev’ scritt’ “FATE PRESTO” e ‘a facett’ addiventa’ ‘n’opera d’arte che mò sta astipat’ ȃ Reggia ‘e Caserta, dint’ ‘a collezione Terrae motus.
L’opera ‘e stu cristian’ ca Achille Bonito Oliva ha paragonato a nu Raffaello rȇ tiemp’ ‘e mò (Raffaello chill’ c’ha fatt’ l’angiulill’, no ‘o cantant’!), pò pare’ nu poc’ superficial’, fredd’ ‘e chiammat’ ma in realtà ten’ assaje a che ffa’ cȏ sacro, cȃ vita e cȃ mort’, cierti fatt’ ca ha saput’ bbuon’ sfrutta’ dint’ a ‘na città comm’ e Napul’ addò ‘sti ccos’ so’ bbon’ ammiscat’.
Mò fino ȏ 19 ‘e luglio ce ‘sta ‘na bella mostra dint’ ‘o chiostro ‘e Sant’Agostino alla Zecca, ‘ncopp’ ȏ rettifilo, che è ‘na bella capat’ pecché vir’ culonn’ antic’ e quadri, l’arte dint’ a nu post’ addò è passata nu sacc’ ‘e storia.
Passann’ pe’ ffor’ nun se ver’ nient’ pecché quann’ se facett’ ‘o Risanamento vuttajen’ nu sacc’ ‘e rrobb’ ‘n’derr’ e s’è astipat’ chell’ ca se ver’ mò che comunque ce metteten’ man’ nu sacc’ ‘e llor’.
Allora, tanto p’accumincia’ ‘stu chiostro fuje fravecat’ ‘ncopp’ a nu piezz’ addò stev’ ‘a polis greco-romana (e infatti so’ stati usat’ ‘n’ata vot’ cierti piezz’ ‘e culonn’ romane rȏ tempio ‘e Giove che stev’ llà e nu poc’ cchiù allà, addò sta ‘o cipp’ a Furcell’, ce steven’ ‘e mmur’ greche) e se chiamm’ alla Zecca non perché ce steven’ e punk a bbestia o pecché era zuzzus’, ma pecché llà vicin’ ce stev’ nu post’ addò facevan’ e sord’.
Ai tiempi rȇ gli Angioni ce stev’ ‘n antico monastero cu ‘na piccola chiesa dedicata a San Vicienz’; ‘e cap’ ‘e pezz’ che ce steven’ arint’, poiché er’ tutt’ sgarrupat’ e nun tenevan’ sord’ pȏ accuncia’ ,’o detten’ ȇ muonac’ agostiniani che aspettajen’ ‘e ave’ coccos’ ‘e sord’ da ‘o Rre e pur’ ‘n atu ppoc’ ‘e terr’ pe’ fa’ nu fatt’ nu poc’ cchiù sistimat’. A fin’ rȏ 1200 furnetten’ e lavor’ e ‘stu munaster’ er’ nu fatt’ assaje organizzato tant’è che ce stev’ nu spital’, ‘na farmacia, ‘na bibliotec’ e pur’ ‘na scol’ e dduje chiostri. L’unica cosa che rumman’ ‘e tutt’ ‘sti fatt’ è ‘a Sala capitolare che è uno rȇ rari esempi ‘e architettura gotica-francese ‘e l’Italia meridionale; particolarmente interessanti pe’ capì l’antichità ‘e chst’ambient’ so’ e capitelli rȇ culonn’ ca stann’ ammiezz’ ca probabilmente so’ sveve, pecché ce sta l’aquila acopp’ e comunque fatto sta che c’hanna vuttat’ arint’ pȃ costruì nu sacc’ ‘e fatt’ già usat’, piezz’ ‘e culonn’ pigliat’ da ati ppart’.
Ra ccà partett’ ‘a ribellion’ all’Inquisione spagnola che infatti a Napul’ nun accerett’ a nisciun’ e po’ chesta sala addiventaje nu seggio popolare e semp’ ccà ce fuje ‘o prucess’ a Masaniello aropp’ ch’er’ muort’.
Nu terremot’, un rȇ tant’ che ‘na terra vulcanica adda pava’ comm’ tributo pȃ bellezz’ e pȃ fertilità che ce regal’, distruggett’ ‘a cchies’ e sgarrupaje ‘o chiostro tant’è che e muonac’ avettan’ chiamma’ a Bartolomeo Picchiatti p’accuncia’ ‘a situazion’.
Chell’ che nun facett’ ‘o terremot’, ‘o facett’ ‘o Risanamento per cui quann’ levajen’ ‘a miezz’ ‘a categoria rȇ muonac’ facetten’ ‘e ccas’ e vuttajen’ ‘n terr’ ‘o sicond’ chiostro pe’ costruì ‘o corso Umberto.
‘O Risanamento at’ nun fuje ca nu sventramient’ e ‘n accisamient’ ‘e ‘na città che già stev’ ‘nterr’ pȏ culer’ e che cȃ scus’ rȃ pulizza’ rȃ malatia ‘a furnett’ ‘e ‘nguaia’.)
Insomma, jatev’ a ffa’ nu gir’ a ‘sta mostra pecché ce stann’ nu sacc’ ‘e opere ‘e Warhol (103) e po’ pecché ‘stu chiostro è veramente nu bellu fatt’ e comm’ tanta cos’ tropp’ bell’ ‘e Napul’ so’ annascos’ e s’adda sape’ che ce stann’, pecché nu piezzicciull’ ‘e bellezza ca nun ven’ sprecata è nu grande passo pe’ tutta l’umanità.
© 2015 Angela Giuliano
Art for cuozzis 
