Saturnali, tombola e capitone

pompeii_-_osteria_della_via_di_mercurio_-_dice_players

Quann’ ven’ Natale stamm’ tutt’ elettrizzat’, esaurit’ a correre annanz’ e aret’ pe’ fa’ ‘e regali, accatta’ ‘o capiton’, ‘e trick – track  e nun verimm’ ll’ora ‘e ce assetta’ a tavola a magna’ ‘o spavettiell’ co’ e vongol’ e ‘a frittura ‘e calamar’. ‘E piccirill’ hanna dicer’ ‘a poesia, ‘o zio s’adda ‘mbriaca’ e ‘a nonna aropp’ magnat’ caccia’ ‘a tumbulell’. 

Scene che vann’ annanz’ ogni anno, puntualmente.

E da nu cuofan’ ‘e tiemp’, a livell’ che pure gli antichi romani festeggiavano ‘sta jurnat’ ca se chiammav’ però festa rô Sol Invictus pecché chillu juorn’, ‘o 25 dicembre, nasceva Mithra  nu ddij ca se purtava assaje a chilli tiemp’ e che comm’ a Gesù  era ‘o sole che illuminava e scarfav’ e cor’ ‘e tutta l’umanità.

‘O Sol invictus quindi è ‘o sol’ ca nun mor’ ma s’arripiglia addiventann’ cchiù ffort’ ‘e primm’! È chiesta ‘a jurnat’, infatti, ca ‘o sol’ sta cchiù luntan’ rȃ terr’, comm’ si stess’ murenn’ e ‘a notte è cchiù long’ rȏ juorn’ tanto che è ‘a jurnat’ cchiù cort’ ‘e ll’ann’. Continua a leggere “Saturnali, tombola e capitone”

Annunci

Alisandro ‘o Ruosso – ‘o mosaico cu l’albero ca se fa sicco ma nun more

Battaglia_di_IssoTra i tanta piezzi massicci assaie ca fúieno scavati a Pompei quanno ‘a scupirchiaieno ce sta nu mosaico assaie gruosso ‘a ddò ce sta n’ accisatorio ‘e ggente, uommene e cavalli cu ll’uocchie spalancati e ‘n albero sicco.

‘Stu piezzo steva nderra ȃ na casa ‘e uno ca aveva stà bbuono a ssordi  e ‘a ggente jeva llà e se faceva e ggiri ‘a coppo, tanto ca sta cunsumato dint’ a cierti punti. Ma sta nu pucurillo nguaiato pure pecché è stato nu sacco ‘e tiempo all’acqua e ȏ viento nfino a quanno nun ‘o purtaieno ȏ Museo Archeologico ca tanno se chiammava Real Museo Borbonico.

È na scena ‘e uerra addò a sinistra ce sta nu bellu giuvinotto cu e capilli ȏ viento e ‘a chill’atu lato, dint’ a nu carnaio, gente ca se ne fuje, chi sta nderra, chi more acciso e chi ‘a coppo a nu carrettiello pare ca s’è scurdato ‘o ggasse appicciato.

Ma che r’è ‘stu maciello, ca sta succedenno?

Continua a leggere “Alisandro ‘o Ruosso – ‘o mosaico cu l’albero ca se fa sicco ma nun more”

Adrian Tranquilli – chill’ rȏ Batman ‘n’copp’ ȇ craun’

Batman_mini

Al Museo Archeologico ‘e Napul’ – ‘o Museo, praticamente – sta nu fatt’ tropp’ bbell’: tu tras’ e bell’ e bbuon’ vir’ a nu Batman appis’ a capa sott’ e a chell’ata part’ nu Superman ca par’ che ten’ ‘e braccia allargate comm’ a nu Gesù Crist’.

Che sta succerenn’ ? So’ asciut’ pazz’ cca ddint’, pensa ‘a ggent’.
E invece no, succer’ ca ’n artista che se chiamm’ Adrian Tranquilli bbuon’ ha pensat’ e piazza’ e piezz’ suoi ammiscannel’ cu chill’ antic’ rȏ museo e chell’ ca ne ven’ for’ è nu fatt’ assaje massiccio!
Praticamente chist’artista famoso ‘e l’arte contemporanea ha semp’ faticat’ co’ i super eroi nun tant’ perché ce piacen’ assaje e fumetti ma pecché fondamentalmente ha capito ‘na cosa che è semp’ ‘a stessa: ca tutt’ quant’ amma semp’ tenut’ bisogno ‘e coccurun’ che ce veness’ a salva’.
L’eroe se pò chiamma’ Ercole, Gesù Cristo o Batman semp’ chell’ è.
E allora ha pigliat’ i piezz’ suoi (vint’ann’ ‘e piezz’) e l’ha mis’ a confronto cu chill’ rȏ museo e chell’ ca se capisc’ è che a ffinal’ l’arte è ‘na cosa circolare, ce sta poco ‘a fa’.

Continua a leggere “Adrian Tranquilli – chill’ rȏ Batman ‘n’copp’ ȇ craun’”

Gesù câ cap’ dint’ ‘e scell’, la crocifissione di Capodimonte

Crucifix_Masaccio

 

A Capodimonte ce sta ‘na Crocifission’ cu nu Gesù Crist câ cap’ dint’ ‘e scell’ comm’ a Maurizio Costanzo e ‘na cristian’ cu ‘na vesta rossa co’ ‘e braccia spalancat’ manc’ foss’ ‘na vrenzola che sta alluccann’ pecché hanna arrestat’ ‘o marit’ ca er’ tant’ nu buon guaglion’. È chest’ una rê crocifission’ chiù interessant’ râ storia ‘e ll’art’ pê tanta mutiv’ ca mò ve cont’.
Allora, innanzitutto era nu piezz’ che stev’ â part’ ‘e copp’ ‘e nu polittico che ‘o vulev’ nu tip’ ca se chiammav’ Ser Giuliano di Colino ca poiché era nu notaio tenev’ nu sacc’ e sord’ e se putev’ permetter’ ‘e chiamma’ a fatica’ a Masaccio che a chilli tiemp’ – ô 1426 – era nu giuvinott’ ‘e belle prospettive. Continua a leggere “Gesù câ cap’ dint’ ‘e scell’, la crocifissione di Capodimonte”

Art for casalesis

Allora, abbiamm’ subito a dicer’ che ‘a camorr’ è ‘na muntagn’ ‘e mmerd’ e purta’ l’arte e ‘a bellezza dint’ a ‘na terra ca se cunosce sul’ pô schif’ ‘e ‘sta ggent’ ‘e mmunnezz’ è ‘na granda cosa.
Detto ciò, stat’ ancor’ a ttiemp’ (fin’ ô 21 ottobre) a jì a vere’ ‘sta mostra a Casal di principe, “La luce vince l’ombra”, che sta dint’ a ‘na casa confiscata a nu camurrist’.

‘A luce, pecché ‘a luce?
Pecché ‘a luce è guarigione e speranza.
‘A luce venc’ semp’, nun ce sta nient’ ‘a fa’; ‘o dicett’ pur’ ‘o Patatern’ quann’ facett’ ‘o munn’, sia fatta luce.
E ‘a luce è pur’ ‘a granda protagonista ‘e l’opera ‘e chillu scurnacchiat’ ‘e Caravaggio che quann’ stett’ nu poc’ a Napul’ nun facett’ sul’ tarantell’ ma facett’ sciamì pur’ nu sacc’ ‘e ggent’ câ pittura soja, tanto che nu sacc’ ‘e pittor’ abbiajen’ a vule’ pitta’ comm’ a iss’.
Era ‘na pittura assaje originale e vigorosa, ‘na rappresentazion’ carnale e sincera, ca guardav’ ‘nfacc’ a realtà cu dulor’ e solidarietà.
Nu sguardo lacerato ‘e ‘na città lacerata, piezz’ ‘e pittura come frammenti ‘e ‘na quotidianeità addò ‘na femmen’ ‘e nu vascio è ‘na maronn’.

E so’ appunto chisti pittori ca ‘o vuletten’ imita’ – insieme a nu piezz’ ‘e arte assai antica, ‘a Mater Matuta, e uno contemporaneo, FATE PRESTO di Andy Warhol – ca so’ esposti ccà.
È in mostra ‘o Seicient’ napulitan’ ca fuje nu secolo assaje chin’ ‘e fermento, ca cagnaje proprj ‘a faccia râ città tra restrutturazion’ e ‘a costruzion’ ‘e palazz’, cchiese, spital’, monte ‘e pietà e tutta ‘na serie ‘e fatt’ ca s’avettana fa’ pe’ mmezz’ râ Controriforma.
Int’ a tutt’ ‘stu ferment’, venetten’ chiammat’ a fatica’ nu sacc’ ‘e llor’: stuccatori, piastrellist’, artigian’ ca facetten’ cos’ ‘e pazz’ tanto che fuje chiammat’ il secolo d’oro dell’arte napoletana!

‘Na plasticità rivoluzionaria,’na spiritualità nova e nu sguardo classico râ realtà so’ fondamentalmente ‘e caratteristiche ‘e sti pittori comm’ a Massimo Stanzione, Pacecco De Rosa, Battistello Caracciolo e altri c’hanna fatt’ ‘a storia râ pittura a Napul’ e che mò portan’ a luce addò ce ne sta assaje bisogno.

 

© Angela Giuliano 2015

 

 

San Gennaro, faccia gialla e doppia

 

Settembre è ‘o mes’ rȃ palestra, rȇ criatur’ ca tornan’ a scol’, rȏ Napul’ che ha già abbiat’ a juca’ e staj ancor’ a tiemp’ pe’ te fa’ l’abbonamento tra nu “ADL pappone” e ‘a speranza ca chist’ann’ nun facimm’ figur’ ‘e mmerd’.

Ma settembre è, pȇ napulitan’, soprattutto ‘A FEST’ ‘E SAN GENNAR’!
S’aspett’ ca se squagl’ ‘o sang’ rȏ Santo cȃ stessa speranza ‘e vere’ Maggio ca ‘ngarr’ nu cross’!
Sul’ che si succer’ ‘a primma cos’, stamm’ tutt’ cchiù tranquill’ ma si Maggio nun vott’ ‘a pall’ a cap’ ‘e cazz’ e ‘o ngarr’ ‘o cross’, allora sì che c’avimma preoccupa’.
In ogni caso se tratt’ semp’ ‘e sang’ ca voll’, vuò pe’ e jastemm’ vuò pe’ miracolo.

Ma chi era chist’omm’ ca se facett’ taglia’ ‘a cap’ pecché crerev’ a Gesù Crist’?
Innanzitutto se chiammav’ Ianuario, anzi chill’ era ‘o cognome pecché appartenev’ a Gens Januaria cioè fedele al dio Giano, e dicen’ che in realtà se chiammav’ Procolo, nu nomm’ che, ‘o ssacc’, nun c’azzecc’ nient’ cȏ sant’ nuost’ ca per noi sarà solo e sempre Gennarin’. Continua a leggere “San Gennaro, faccia gialla e doppia”

Ogni scarrafon’ è bell’ ‘a mamma soja

Tutt’ quant’ annanz’ a nu quadro medievale rȃ Maronn’ cȏ criatur’ ‘mbracc’ amma fatt’ ‘a stessa pensat’: Gesù bambiniell’ e bbuon’, mammamà quant’è brutt’!
Co’ tutt’ ‘o rispett’, nun se po’ guarda’.

Ma pecché?

‘O fatt’ è chist’: praticamente ȏ medioevo ce stev’ ‘a cuncezion’ che chillu criatur’ era già omm’, bell’ e fatt’ tant’è che dint’ a cierti quadr’ tenev’ pur’ nu poc’ ‘e scuccia!
Po’ a chilli tiemp’ nun se ne ‘mpurtavan’ nient’ rȏ realismo e allora accussì facevan’ ‘sti quadri cu ‘sti maronn’ e ‘sti bambiniell’, tutt’ brutt’ e cierti vvot’ pur’ cu l’uocchie ruoss’ comm’ si s’eran’ fatt’ ‘na bbott’ a volo a volo.
Po’ pe’ fortuna venett’ ‘o rinascimento e accunciaje nu poc’ ‘e ccos’: ‘e criatur’ erano cchiù accunciatiell’ e bellill’, chiattullill’ e nu mettevano suggezion’.
Chest’ pecché innanzitutto nun se pittav’ cchiù sul’ pȇ chiese, pur’ ‘a gent’ ca tenev’ ‘e sord’ vulev’ ‘e dipint’ dint’ ȇ cas’ llor’ e non necessariament’ ‘e bambiniell’ evan’ esser’ Gesù Crist’; po’ cagnaje pur’ ‘a concezion’ ‘e ll’arte…nun sul’ attenzion’ ȃ realtà accussì comm’era ma pur’ proporzione e armunia, bast’ cu chelli cos’ scuncicat’ sul’ pecché evan’ idealizza’!
Accussì fuje che e criatur’ (ma nun sul’ llor’) eran’ cchiù bbell’, ‘a genta pittat’ parev’ cchiù cristian’ e nun parev’ azzeccat’ ‘nfacc’ a nu mur’ comm’ si c’era passat’ ‘na press’ pe’ cuoll’ pecché cȏ rinascimento venett’ pur’ l’umanesimo, ossia ‘na concezion’ nov’ ‘e l’omm’ ca stev’ ȏ centro ‘e tutt’ cos’, no comm’e primm’ che ‘o centro era sul’ Ddij!

‘A festa rê luci ê pier’ râ muntagn’

festa-delle-lucerne

Dint’ ô borgo medievale ‘e Somma, a Casamale precisamente, ogni quatt’ann’ ce sta ‘a festa rê lucerne pe’ celebra’ ‘a Maronna râ neve, dint’ a vic’ e vicariell’ addò abitavan’ e contadini ê tiemp’ ‘e l’Aragones’, accucchiat’ aret’ a mmur’ che nun sul’ difendevano ‘a città ma pure ‘e tradizion’.
E infatti ‘sta tradizion’ antica ancora se manten’ quann’ dint’ a ‘sti vicariell’, ê primm’ juorn’ ‘e aust’ ogni quatt’ann’, pe’ tre juorn’ s’appiccian’ nu sacc’ ‘e lumin’ sistimat’ dint’ a telai ‘e lignamm’, da ‘o cchiù gruss’ ô cchiù piccerill’, a fa’ ‘na prospettiva addò l’uocchie se perden’ arint’ comm’ quann’ mitt’ nu specchio annanz’ all’at’.
‘Sti telai, ca se chiammen’ squadri, tenen’ ‘a form’ ‘e nu triangol’, ‘e nu rombo, rô quadrat’ e rô cerchio, simbolismi antichi assai cu nu significat’ assai preciso: ‘o triangolo ven’ a significa’ ‘a magia rô nummer’ tre, ‘o quadrato ‘a stabilità, ‘a perfezion’, ‘o cerchio ‘a ciclicità râ natur’e ‘o rombo è nu riferimento ô strumento musicale ca s’ausav’ durante e cortei ‘e Bacco.
Accussì infatti comm’ quasi tutt’ e ffest’ religios’, le origini s’hanna cerca’ dint’ ê cult’ pagan’ ‘e l’antichità e dint’ a stu cas’ era nu cult’ agricolo comm’ se capisc’ pur’ da tutt’ e feston’ appis’ for’ ê ccas’ râ ggent’ ca metten’ pur’ ‘o mangia’ ‘ncopp’ ê banchetiell’. Continua a leggere “‘A festa rê luci ê pier’ râ muntagn’”

‘E zizz’ ‘e Partenope, ‘a funtan’

Fontana-delle-zizze.-Napoli

‘A funtana rê zizz‘ finalmente è stata accunciata!
Aropp’ tant’ann’ che ce vuttavan’ arint’ ‘a munnezz’, è stata puluzzat’ e sistimat’.

Nun se sap’ precisament’ chi ‘a facett’ e quann’: dint’ a nu documento rô 1498 sta scritt’ ca stev’ già llà, azzeccat’ â chies’ ‘e S.Caterina della Spina Corona, ‘na chiesa che se chiamm’ accussì pecché secondo ‘a tradizion’ ai tiempi ‘e l’ Angioni se priav’ ‘na spin’ râ curon’ ‘e Gesù Crist’.
Mò nun è cchiù ‘na chiesa, è stata sconsacrata: inizialmente era ‘na sinagoga (dint’ a ‘sta zon’ ce steven’ nu sacc’ ‘e ebrei, chist’ ‘o mutiv’ ‘sta zon’ se chiamm’ ‘a “Giudecca”) e chest’ se po’ vere’ da ‘o fatt’ che è fatt’ comm’ nu quadrato cu ‘na cupola acopp’; poi ô 1354 ‘a ggenta nobile rô Sedile rô Nilo ‘a trasfurmaje int’ a ‘na chies’, pecché ‘a sinagoga s’er’ tutta sgarrupat’ e nisciun’ jev’ cchiù. Durante ‘o 1300 ‘sta chiesarell’ l’usavan’ ‘e cap’ ‘e pezz’ ‘e nu munaster’ che stev’ llà vicin’ fino a quando nun fujen’ spustat’ e l’Arcivescovo Alessandro Carafa ‘a facett’ addiventa’ nu conservatorio addò stevan’ astipat’ tutt’ ‘e figliol’ ebraiche ca s’eran’ convertite ô cristianesimo.
Mò praticamente ‘o Viceré Don Pietro di Toledo se truvaje a sistima’ Napul’ pe’ nu fatt’ strategico militare e ce vuttaje arint’ pur’ cierti piezz’ comm’ a chesta funtan’: incaricaje nu cert’ Giovanni da Nola ‘e accuncia’ chell’ ca già stev’ llà e che pigliav’ ll’acqua da ‘o ciumm’ Sebeto ca mò nun ce sta cchiù; pe’ fa vere’ che era stat’ iss’ ce mettett’ ‘o stemm’ suoj rê scacchi insieme cu chill’ râ città. Continua a leggere “‘E zizz’ ‘e Partenope, ‘a funtan’”

‘O chiammavan’ Nitsch ‘o chianchier’

NitschCe sta ‘nu museo a Napul’, vicin’ ô cavon’, assai particolare: ccà nun ce stann’ appis’ o mur’ dipinti cu maronn’ o belli giuvinott’ o statue, no niente ‘e chest’.
‘A particolarità è che è totalmente dedicato a ‘n artista austriaco, Hermann Nitsch, che praticamente l’arte soja è chell’ ‘e squarta’ l’animal’.
Par’ infatti ‘e trasì dint’ â putec’ rô chianchier’ sul’ che invece rê caprett’ appis’ e ‘o Volto Santo se veren’ video ‘e cristian’ ‘n copp’ â croce e sang’ pe’ tutt’ part’; tras’ llà dint’ e sicuramente è nu fatt’ assai diverso rispetto a quann’ accumpagn’ a mammà a fa’ ‘a spes’; tras’ làl ddint’ e par’ ‘e sta’ dint’ a nu suonn’.
‘A cosa bbella ‘e ‘stu museo è che tant’ann’ fa’ era ‘na centrale elettrica ca servev’ pe’ sustenta’ ‘o teatro Bellini e manco a farlo apposto pur’ mò conserva chillu spirit’ ‘e alimenta’ cu l’arte nu quartier’ nu poc’ sgarrupat’.

Ma cercamm’ ‘e capì che ce pass’ pe’ dint’ ê cerevell’ e pô stommac’, soprattutto, a ‘stu cristian’.

Continua a leggere “‘O chiammavan’ Nitsch ‘o chianchier’”