Le origini greche di Napoli, ovvero i tempi do cipp’ a Furcell’

E sì guagliù, dicimmec’ a verità.
Furcell’ ‘a sapimm’ pecché se va a piglia’ ‘o fumm’ o a magna’ ‘a pizz’ addo Michel’.
Int’ ‘a stu quartier’ però, oltre ‘e piezz’ ‘e fumm’, ce sta pur’ ‘na pret’, nu bellu piezz’ ‘e pret’ .
Anzi, è nu piezz’ ‘e pret’ azzeccat’ cu nu recint’ attuorn’ addò purtroppo ‘a ggent’ ‘e mmunnezz’ jett’ ‘a munnezz’.
Chill’ è ‘o cipp’ a Furcell’!
Oiccann’ ‘o mutiv’ pecché se ric’ “Sì viecchj comm’ ‘o cipp’ a Furcell’!”, pecché chelli quatt’ pret’ addirittur’ e fravecaren’ ‘e Greci.
‘E Greci a livello di Ulisse, chilli fatt’ antic’ accussì.
E sì, pecché ‘a nosta città a fravecaron’ a ggenta grec’ che venette ccà e ‘a chiammà Neapolis, città nuova, pa distinguer’ ra Palepolis, chella cchiù vecchj che stev’ addò sta mò ‘o Castel dell’Ovo.
Tann’ era’ ‘n’isoletta, Megaride, strategica assaj pe’ se scagna’ a rrobb’ cu ll’ata gent’.
A proposit’ ‘e stu fatt’, ‘a leggenda rice che ‘a cchiù bell’ e tutt’ ‘e Siren’, Partenope, s’accerett’ pecché chist’Ulisse era tropp’ ‘nu figl’ ‘e ‘ndrocchj e ess’ accusaj malament’ pecché nun ‘a stev’ a sentì. ‘Na vot’ ca era mort’, ‘o cuorp’ se jett’ a ncatasta’ proprj ‘ncopp’ a chilli scogli llà e llà rummanett’.
Chisti Greci, i Cumani a vule’ esser’ precis’, allor’ praticament’ se spustaron’ ra llà e se jetten’ a fa’ nu gir’ cchiù ‘e part’ ‘e rint’, ‘o centro storico, e facetten’ vic’ e vicariell’ comm’ si foss’ ‘na scacchiera, pe’ sta cchiù sistimat’.
Vic’ e vicariell’ ca se chiammen’ plateiai e stenopoi.
(Po’ venetten’ ‘e roman’ e ‘e chiammajen’ cardi e decumani, pe’ fa riferimento all’accampamento addò se seven’ piazzat’.)
Si ve facit’ nu gir’ e appizzat’ l’uocchje, verit’ ca ce stann’ nu cuofan’ ‘e piezzicciull’ ‘e chilli tiemp’ llà.
Partimm’ ‘ra part’ cchiù avet’ che in greco se chiammav’ Acropoli: chest’ stev’ addò sta mò ‘a chies’ ‘e Sant’Aniello a Caponapoli.

Asott’ a ‘sta chies’ hanna truat’ piezz’ ‘re mur’ ca servevan’ pe’ difender’ ‘a città.
‘Sti mmur’, massicc’ assaj pecché ce vuttaron’ arint’ pur’ ‘o ttuf’, partevan’ ra llà ‘ncopp’ e scennevan’ pe’ via Costantinopoli, faceven ‘o ggir’ a piazza Bellini (addò ancor’ se ponn’ vere’ e semp’ ‘a ggent’ e mmunnezz’ jett’ ‘a munnezz’) p’arriva’ a San Domenico.
Ra llà po’ se facevan’ tutta via mezzocannon’ ( addò sta ‘o cinema Astra), giravan’ a sinistra a vij ‘e piazza Nicola Amore, poi aropp’ piazza Calenda  passaven’ pe’ Furcell’ (‘o cipp’ appunto!) fin’ abbasc’ a via Foria.
Comm’ ricev’ primm’, ‘sti mmur’ erano talment’ massicc’ che né Annibbal’ (ca sfunnav’ tutt’ cos’ cu gli elefanti) né i Goti (che stann’ pe’ tutt’ part’ e so’ semp’ stat’ ‘na minacc’. Chiammal’ Ostrogoti, Visigoti evan’ semp’ venì a sfruculia’ ‘a mazzarell’!) riuscetten’ ‘e vutta’ ‘nterr’!
Int’ a stì mmur’ a nord a sud a est e a ovest ce steven’ ‘e pport’, ovviament’, o si no ‘a ggent’ addò trasev’ e comm’ ascev’?
‘O decuman’ ‘e copp’, ‘o superior’, tenev’ a part’ ro lat’ occidental’ porta Romana e a chill’at’ Porta Carbonara che sta praticament’ addo sta via Carbonara e ven’ chiammat’ accussì pecché tann’ ce stev’ ‘o carbonarius addò appicciaven’ ‘a mmunnezz’.
(A chilli tiemp’ nun ce stev’ ancor’ l’asse mediano!)
Ccà ce sta pur’ ‘na bella chies’, cu ‘na bella scalinat’ ca ‘a facett’ Ferdinando Sanfelice ch’ era proprj ‘o mast’ re scalinat’!
Po’ venett’ Costantino, frisc’ frisc’ e a spusta’ addò sta a cchies’ ‘e santa Sofia (perciò se chiamm’ pur’ Porta Santa Sofia).
Pe’ chesta porta passajen’ Belisario, nu generale bizantino, e Alfonso D’Aragona usando nu puzz’ ca purtav’ direttament’ int’ ‘a città.
E n’ata maner’ nun putevan’ maj trasì!
Po’ venett’ Don Pedro di Toledo, ancor’ cchiù frisc’ e tuost’ ‘e Costantin’, e a vuttaj proprj ‘nterr’ e facett’ fa’ nu pont’, int’ ‘a zon’ ca mò se chiamm’ Pontenuovo.
‘O decumano cchiù gruoss’, ‘o maggior’, tenev’ Porta Puteolana e a est ‘a bella Porta Capuana ch’ era bella ross’ e strategica assaj (Perciò quann’ se ric’ “tien’ ‘o cul’ comm’ e porta Capuana”, pigliatel’ comm’ ‘a nu compliment’!). Chill’ abbasc’ a tutt’, l’inferior’, ca po’ foss’ o cchiù famos’, Spaccanapoli, Porta Cumana a ovest (che stev’ addò sta mò chella cosa long’ ca se chiamm’ “guglia” o “obelisco”, cu sant’ ca zell’ ‘n copp’, abbasc’ San Domenico appunto) e Porta Furcillensis, addò sta ‘o cipp’, a chill’atu lat’. A Nord ce stev’ Porta San Gennaro ma no addò sta mò, nu poc cchiù aret’ (‘a facett’ semp’ spusta’ chillu simpaticon’ ‘e Pietro Toledo che facett’ pur’ a via addò mò se fa ‘o struscio) e nun er’ comm’è mmò. Mò ce sta ‘nu dipint’ ‘e Mattia Preti, nu pittor’ ca venev’ ra Calabria (e perciò er’ chiammat’ il Cavaliere calabrese ) che avetta pitta’ tutt’ ‘e pport’ ra città pecché eva fatt’ ‘na mala tarantell’ e fujenn’ fujenn’ s’annascunnet’ a Napul’.Allora ‘o vicerè, che era ‘nu figl’ ‘e zoccol’, ce ricett’: “Guaglio’ tu vuò sta ccà e nun vuò jì carcerat’? Allor’ m’e pitta’ tutt’ e pport’ e Napul’! Piglia ‘e penniell’ e avviat’ va’!” E accussì chillu cristian’ se facett’ nu mazz’ tant’ e puveriell’ mò è rummas’ sul ‘stu dipint’Chi ‘o ssap’ quanta jastemm’ sta ancor’ mannann’!
‘Nfacc’ ‘a port’ ce sta ‘na via diritt’ che port’ int’ a Sanità che a chell’epoca era nu campusant’. 
E accussì è rummas’ int’ ‘o tiemp’, Greci Romani cristiani jeven’ tutt’ quant’ llà a ‘nterra’ ‘e muort’. Pe’ Greci se chiammaven’ necropoli, pe’ cristian’ catacombe. Sott’ ‘a chiesa da Sanità ce stann’ infatti ‘e catacombe ‘e San Gaudioso, addò ‘e dominican’ mettevan’ a scula’ ‘e capuzzell’ ‘e muort’ e cchiù allà chell’ ‘e San Gennar’ e pur’ chell’ ‘e San Severo, giusto pe’ nun fa’ piglia’ coller’ a nisciun’. A sud, proprio n’mmiezz’ via Mezzocannone, ce stev’ Porta Ventosa o Porta Licinia. O se chiammav’ comm’ ‘a primm’ pecché vuttav’ assaj vient’ e i pann’ s’asciuttavan’ ambress’ o pecché stev’ ‘e cas’ vicin’ n’omm’ ca se chiammav’ Lucio Alfio Licinio, nu cittadin’ ca si pur era romano, eva luat’ ‘e paccher’ ‘a facc’ a Napul’ e accussì ce retten’ ‘o nomm’ suoj a ‘sta port’.
(Stabben’ pe’ Lucio Alfio Licinio!)
Ma ‘o fatt’ cchiù massicc’, che fa vere’ proprj comm’ ‘a nostra città ten’ ‘e bbas’ int’ a cultura grec’ , so’ ‘e culonn’ ra basilic ‘e S.Paolo maggioreAddò sta mò a cchies’, infatti, ce stev’ primm’ nu tempio, ‘o tempio dei Dioscuri
Chisti dduj, Castore e Polluce, figl’ e Zeus, seven’ dduj gemell’ ca spaccavan’ assaj (cchiù re gemelli Derrick, ma cchiù poc’ attiggius’) anche se – puveriell’ – murevan’ ‘nu juorn un’ e nu juorn’ n’at’ e nun se putevan’ mai fa’ ‘na partit’ ‘e calcetto assieme.
Mò pecché seven’ raccomandat’ o pecché verament’ seven’ putent’, fatto sta ca ‘a ggent’ ‘e bbia’ a venera’ e facetten’ chist’edificio int’ ‘a zon’ ‘e l’agorà.
A Napul’ ‘a ggent’ ‘e priav’ quann’ jev’ pe’ mar’, pecché secondo a leggenda Poseidone ‘e mpara’ a cumanna’ acqua e vvient’.
Nu poc’ ‘e tiemp’ aropp’, venett’ nu certo Tiberio Giulio Tarso e int’ ‘a capata generale ‘e sistimazion’ ‘e tutta chella zon’ llà – ca ‘e tiemp’ de Roman’ sev’ ‘o Foro – ‘o vulett’ accuncia’.
Po’ venetten’ ‘e cristian’ e cu ‘na capat’ ancor’ cchiù putent’ ‘o facetten’ addiventa’ ‘na chies’ ca però rispettava comunque ‘o tempio comm’ er’ fatt’.
Rummanetten’ ‘a facciata e pe’ nun fa’ piglia’ coller’ ‘e person’ ca erano abituate a chelli ddoj divinità, sceglietten’ dduj sant’, San Pietro e San Paolo e ‘e mettetten’ int’ ‘e nicchie.
Nu terremot’ però sgarrupaj tutt’ cos’ e rummanetten’ sul’ quatt’ culonn’, ddoj ‘e luajen’ ‘a miezz’ e ddoj e lassajen’, pe’ fortuna.
Int’ ‘a sfravecatur’ hanna truat’ dduj bust’ ‘e marm’ ca raffiguravano Castore e Polluce e mò stann’ astipat’ ‘o Museo Archeologico.
A mme ‘sta chiesa piace assaj, concettualmente, pecché è proprj bell’ chist’ ammescafrancesc’ tra ‘a cultura pagana e chella cristiana.

Ammescafrancesc’ che è l’anima ‘e chesta città.

© 2015 Angela Giuliano

Annunci

3 Replies to “Le origini greche di Napoli, ovvero i tempi do cipp’ a Furcell’”

  1. Artforcuozzis: pillole di ‘sapere’ per tutti! A4C è un’idea geniale e uno splendido modo per conoscere e riconoscere i mille volti di Napoli. Il sentimento di una città passa anche attraverso la comprensione della sua storia, della sua anima. Insomma: si o’ssaje pecchè te sbatte o’core, l’ammore è ancora cchiù forte.
    Non vedo l’ora di leggere il secondo capitolo.

    (Si semp’tropp’astuta!)

    Liked by 1 persona

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

w

Connessione a %s...