Saturnali, tombola e capitone

pompeii_-_osteria_della_via_di_mercurio_-_dice_players

Quann’ ven’ Natale stamm’ tutt’ elettrizzat’, esaurit’ a correre annanz’ e aret’ pe’ fa’ ‘e regali, accatta’ ‘o capiton’, ‘e trick – track  e nun verimm’ ll’ora ‘e ce assetta’ a tavola a magna’ ‘o spavettiell’ co’ e vongol’ e ‘a frittura ‘e calamar’. ‘E piccirill’ hanna dicer’ ‘a poesia, ‘o zio s’adda ‘mbriaca’ e ‘a nonna aropp’ magnat’ caccia’ ‘a tumbulell’. 

Scene che vann’ annanz’ ogni anno, puntualmente.

E da nu cuofan’ ‘e tiemp’, a livell’ che pure gli antichi romani festeggiavano ‘sta jurnat’ ca se chiammav’ però festa rô Sol Invictus pecché chillu juorn’, ‘o 25 dicembre, nasceva Mithra  nu ddij ca se purtava assaje a chilli tiemp’ e che comm’ a Gesù  era ‘o sole che illuminava e scarfav’ e cor’ ‘e tutta l’umanità.

‘O Sol invictus quindi è ‘o sol’ ca nun mor’ ma s’arripiglia addiventann’ cchiù ffort’ ‘e primm’! È chiesta ‘a jurnat’, infatti, ca ‘o sol’ sta cchiù luntan’ rȃ terr’, comm’ si stess’ murenn’ e ‘a notte è cchiù long’ rȏ juorn’ tanto che è ‘a jurnat’ cchiù cort’ ‘e ll’ann’.

Mò pensat’ ‘a ggent’ antica ca pe’ campa’ dipendeva sulament’ rȃ terra, pensat’ a comm’ se cacavan’ sotto si ‘o sol’ se facev’ cchiù debole e nun facev’ ascì bbell’ ‘e pummarol’; chist’ è ‘o mutiv’ pecché facevan’ nu cuofan’ ‘e riti propiziatori, pe’ scaccia’ ‘a paur’ rȃ mort’ e fa’ nascer’ ‘n’ata vot’ ‘a natur’! ‘A ggent’ antica, infatti, dava grande importanza ai solstizi (che significa quann’ ‘o sol’ se ferma in cielo) e agli equinozi (cioè quann’ ‘a nott’ e ‘o juorn’ durano ‘o stesso tiemp’) pecché era ‘o mument’ ‘e passaggio da ‘na fase a ’n ata e l’energia rȏ munn’ scurrev’ cchiù libera; tann’  ‘o tiemp’ era considerato comm’ nu fatt’ circolare e tenev’ sul ddoj dimension’: ‘o present’ che addiventa antico e poi da llà se torn’ ’n’ata vot’ ȏ present’ che è rigenerato pe’ abbia ’n atu ciclo. Comm’ si foss’ ogni vvot’ ‘na reincarnazione, ‘na resurrezione: ‘o futur’ ca torn’ aret’ pe’ riscatta’ ‘o passat’.

‘A ggent’ antica teneva proprio ‘na fissazione pȏ tiemp’ circolare e ‘o munn’ sȏ facevan’ annanz’ all’uocchie comm’ si foss’ ‘o quadrant’ ‘e ll’orologio cu tant’ ata quadranti cchiù piccirill’ incatasta’ arint’ e chell’ ca succerev’ ’n’copp’ ȃ terra era nu riflesso ‘e chell’ ca succerev’ in cielo. Chist’ è ‘o mutiv’ pecché tutti i riti, ‘e celebrazion’, ‘e ffest’ ca facevano in certi periodi ‘e l’anno erano comm’ si vulevan’ fa’ rivivere chell’ ca er’ succies’ quann’ nascett’ ‘o munn’ e perciò ‘sti mument’ erano nu fatt’ sacro, pecché erano appunto ‘na ripetizione ‘e chillu mument’ ca fuje.

Mò praticament’ ‘e chiesti tiemp’, cioè ‘o mese ‘e dicembre, ‘o sol’ stev’ murenn’ e s’eva fa’ coccos’ pe l’aiuta’ a vivere ‘n’ata vot’ cu ‘sti culti, tant’è vero che anticamente l’anno abbiav’ a Marzo, cioè a primavera quann’ se scet’ ’n’ ata vot’ ‘a natura! ‘Sta festa però era parte ‘e ‘na celebrazione cchiù llong’ che i Romani chiammavan’ Saturnalia pecché erano dedicate al dio Saturno e abbijaven’ ‘o 17 fino ȏ 25 e furneven’ con i Larentalia, ‘a festa rȇ muort’ rȃ famiglia ca pruteggevan’ ‘a casa e pure ‘e vvie (Po’ ne parlamm’).

Sta scritto che ‘sti ffest’ se facevan’ tal e quale pure in Grecia e se chiammavan’ Cronie (da Cronos, il dio del tempo appunto) ma poiché i Greci s’attiggiavan’ che ‘a cultura romana eva cupiat’ tutt’ cos’ da llor’, i Romani abbiajen’ a dicer’ ca ‘stu Saturno secondo ‘a leggenda arrivaje a Roma pe’ mmar’ addò truvaje a Giano, ‘a divinità cu ddoj facce, che l’accugliett’; ccà purtaje ‘a pace, ‘a prosperità e ‘mparaje ȃ ggent’ pur’ l’agricoltura (pare che ‘o nomm’ a chest’ fa riferimento, ossia alla semina pecché sator significa chill’ ca vott’ ‘a semment’).  A Giano, pȏ ringrazia’ ‘e l’ospitalità, ce regalaje ‘o fatt’ ca putev’ vere’ ‘o futur’ e chist’ fuje accussì cuntent’ che ce facett’ fraveca’ nu tempio a Roma. Quann’ sȃ cumannav’ Saturno se campav’ bbell’, ‘a ggent’ nun s’appiccicav’, ‘a terra era ‘e tutt’ quant’ e nun ce steven’ uerr’…insomma, era l’età dell’oro proprio! ‘Na divinità comunista, putessem’ dicer’, ma senza ca se magnav’ ‘e criatur’ (se gliuttev’ infatti).

‘A ggent’ antic’ se sentev’ proprio parte della natura, no comm’ e mmò che  l’amma accis’; e allora si nascev’ ’n’ata vot’ ‘a natur’, pur’ llor’ evan’ nascer’ ’n’ata vot’. Ma per rinascere s’adda murì e infatti Saturno ten’ pure ‘na falce in mano (oh, è proprio assaje comunista!), ca veness’ a significa’ ‘a mietitura, quann’ se taglia ‘o ggran’; ’na figur’ che c’arricord’ chell’ rȃ mort’…e in effetti stamm’ llà, eh! Tant’è vero che primm’ ca ‘a ggent’ si civilizzav’ nu poc’, facevano sacrifici umani e avett’ passa’ Ercole a chelli ppart’ llà e lua’ ‘a pazziell’ ra man’ ȇ criatur’ mettennecc’ ’n’ mman’ ‘e statuett’ d’argilla ȏ post’ rȇ cap’ ca tagliavan’ e pur’ ‘e candele pe’ significa’ e tiemp’ bell’ ‘e ‘na vot’. Fuje accussì che i Romani abbiajen’ a se scagna’ statuett’ e lumini, chell’ ca facimm’ praticamente nuje a Natale. In particolare modo se scagnavan’ ‘e strenne ca erano praticamente fraschetelle ‘e na pianta ca purtav’ bben’ pecché stev’ dint’ a nu boschett’ addò se priav’ a dea Strenia ca portava appunto ‘a felicità.

Insomma stu Saturno se vulett’ fa vule’ accussì bben’ ca i Romani organizzavano ‘sta festa ad alto livello: se putev’ fa tutt’ chell’ ca se vulev’, nun se jev’ ȃ scol’, nun se facev’ ‘a uerr’,  gli schiavi cumannavan’ ȇ padroni e addirittura ‘e pigliavan’ p’e cul’, se putev’ pazzia’ a dadi  e tutt’ cos’ se vutav’ sott’ e ’n’ gopp’.

‘Stu Saturno era ‘a manifestazione rȃ divinità che fravecav’ e sfravecav’ ‘o munn’ ogni vvot’, a ogni ciclo, chill’ che jev’ pe’ mmar’ da nu pizz’ a ’n at’, ‘o pizz’ viecchj (‘o scur’) e ‘o pizz’ nuov’ (‘a luce). Tra ‘o primm’ e ‘o sicond’ pizz’ ce sta chillu mument’ primm’ ca se facev’ ‘o munn’, ‘o mument’ ca nun se capisc’ nient’, tutt’ cos’ è ammiscat’, senza forma, cioè ‘o caos; oiccann’, durante ‘sti ffest’ chest’ se facev’: se turnav’ a chillu mument’ ‘e maciell’ addò nun ce stev’ l’ordine. E allora se magnav’, se bevev’, se facevan’ tarantell’ pecché s’eva sfuga’ malament’ primm’ ‘e abbià ’n ata vot’ l’ann’ ca stev’ trasenn’. Chist’ ‘o mutiv’ pecché se sciuglievan’ e laccettin’ che ‘a statua ‘e Saturno tenev’ vicin’ ȇ pier’  e se scigliev’ nu cristian’ ca era ‘o rre ca poi veniva’ accis’, simbolicamente, comm’ quann’ s’appiccia ‘o pupazz’ ‘e carnevale. 

Pure quann’ pazziamm’ a tombola o ce magnamm’ ‘o capiton’ nun facimm’ altro che fa’ chell’ ca se facev’ tant’ ma proprio tant’anni fa! E sì, pecché comm’ ricev’ primm’ durante i Saturnalia, tra le tante cose, se putev’ pure pazzia’ co’ i dadi ca era proibito ll’ati juorn’ pecché era nu fatt’ ca anticamente solo gli dei putevan’ fa’ e chistu  juoc’, infatti, era nu fatt’ che servev’ p’addivina’ ‘o futur’; Saturno infatti, ca era chill’ ca rinnovava tutt’ i fatti, attraverso i numeri te ricev’ qual era ‘o destin’ tuoj. Iss’ tenev’ ‘e cchiav’ del Grande Gioco cosmico ca servevev’ a metter’ nu poc’ e sistimazion’ dint’ a tutt’ chillu burdell’ che eran’ chilli juorn’. Platone, ‘o filosofo,  ricev’ ca ll’uommen’ erano comm’ ‘e pazziell’ mman’ agli dei pe’ paria’, comm’ e pedine ’n’copp’ a ‘na scacchiera. Stu fatt’ ca anticamente stu juoc’ servev’ pe’ cunoscer’ ‘o futur’ è rummas’ dint’ ‘o primm’ e l’urdem’ nummer’, 1 e 90, che arapan’ e chiuren’ ‘o ciclo facenn’ fujì ‘a paur’ ‘e chell’ che adda venì.

Per quanto riguarda ‘o capiton’, invece, a maggior parte rȃ ggent’ ‘o schif’ pecché par’ ‘na serp’ e ogni vvot’ m’arricord’ mia nonna ca ricev’ ca capiton’ se magn’ pe’ devozion’ e pe’ bbuon’ augurio.

Mò, a parte che è sapurit’ assai, ‘a saggezz’ rȃ nonna ten’ radici antiche e infatti se magnav’, ȇ tiemp’ antic’, pecché arricurdav’ ‘a vittoria contro l’ “antico serpente” che poi ‘o cristianesimo ha fatt’ addiventa’ ‘o riavol’ ma in realtà ‘o serpente nun era considerato ‘na cosa malament’ a chilli tiemp’, anzi! Inoltre si tȏ magn’ port’ bbuon’ pecché ‘a form’ arricord’ chell’ ca dint’ a tombola è ‘o nummer’ 30 e quindi magnann’ pigli forza, comm’ si fosse ‘o viagra. Ma ‘a notte rȃ Vigilia se magna tutto a bbas’ ‘e pesce pecché innanzitutto ce sta nu rimando all’acqua che è ‘o simbolo rȃ nascita (e rinascita) e poi pecché ‘a carne è peccato, ce sta ‘o sang’ ca secondo ‘a tradizion’ chiamm’ e riavul’ che tra Natale e Epifania vann’ scuncicann’ l’armonia e fann’ appiccica’ marit’ e muglier’  perciò nun se magn’ primm’ ca nasce ‘o bambiniell’. Pure ‘e struffoli, comm’ ‘o capiton’, so’ ‘a riproposizion’ ‘e ‘na simbologia rȏ serpent’ tagliat’ a ppiezz’ comm’ si se vuless’ taglia’ ‘o tiemp’ pȏ fa’ abbia’ ’n’ata vot’. Guardate e struffoli dint’ ȃ guantier’ e dicitem’ si nun ve ven’ a mment’ ‘o serpent’ ca se magn’ ‘a coda! ‘O spasso poi, ‘a semment’ ca nun pò mai manca’, è nu fatt’ simbolico  pecché è nu rimando ȇ muort’ ca dint’ a chistu periodo che ce sta meno luce, infatti, vengono festeggiati.

‘O fatt’ ca e muort’ tornano ’n’copp’ ȃ terra, ‘e chiesti tiemp’, succer’ pecché dint’ a stu mument’ ‘e sospensione, comm’ ricev’ primm’, ce sta nu mument’ vacant’ addò tutt’ cos’ è possibile, passato e presente so’ ‘o stess’ mument’. ‘O tiemp’ ‘e primm’ se vott’ ’n’ terr’ pe’ fa’ spazio a chillu nuov’ però nel frattempo se balla e se parea! E infatti a Capodanno da copp’ ‘o balcon’ se jett’ da copp’ abbasc’ tutt’ chell’ che è vecchio e nun ce serv’ cchiù. Tutti ‘sti fatt’, quindi, l’umanità l’ha semp’ sentut’ e pure nuj ca stamm’ into ȏ 2016 ancor’ tenimm’ ‘a stessa esigenza ‘e ce puluzza’ l’anima, e ce cagna’ arint’ cu l’ann’ nuov’ che è semp’ chin’ ‘e bbuone intenzioni.

‘O presepe! Parlamm’ rȏ presepe che è il superclassico rȏ Natal’. Pastur’, bambiniell’, ‘a Maronn’, San Giuseppe, l’angiulill’ e i Re magi. ‘O ‘mbriacon’ cȏ fiaschietiell’ ‘e vin’, ‘o guagliunciell’ addurmut’ e ‘o chianchier’. E ‘a grott’ addò nasce ‘o bambiniell’. Ve crerit’ vuje ca so’ sul’ belle statuine, eh?

E no, ce sta ’n atu significat’ a sott’.

Innanzitutto ‘a grotta: è il centro rȏ munn’, ‘o meglj post’ addò se pò nascer’ e rinascer’; ‘o cor’ rȃ terra e pure e tutt’ l’uommen’ ca dint’ ȃ notte ‘e Natale  senten’ ‘e nascer’ arint’ nu spirito nuovo, chin’ ‘e luce. È ‘a raffigurazione simbolica rȏ cammin’ spirituale ca tutt’ quant’ putimm’ fa’; ‘a consapevolezz’ ca tutt’ quant’ putimm’ essere meglio ‘e chell’ ca simm’. ‘O presepe è infatti ‘na rappresentazione rȏ percorso spirituale ‘e l’omm’ addò niente sta mis’ llà ngopp’ a casaccio; più specificamente è comm’ si foss’ ‘a raffigurazione ‘ncopp’ ȃ terra rȏ Paradiso terrestre accussì com’era quann’ passate ‘a stella cometa e tutt’ quant’ se ‘mbalsamjen’ comm’ ‘e statuine appunto.

‘A parola ven’ da ‘o latino prae saepes che significa annanz’ ‘o recinto e Paradiso invece dal greco paradeisos che ven’ a ddicer’ “giardino recintato” e ’n ata capat’ che ce fa capì che ce sta stu collegamento è ‘o fatt’ che i romani e gli etruschi ȏ mese ‘e nuvembre, quann’ se celebravan’ e muort’, fravecavan’ statuette di cera e poi ‘e criatur’ ‘e piazzavan’ dint’ a nu recint’ accussì comm’ ce ricev’ ‘a cap’ a via rȏ 20 dicembre e facevano ‘na festa che se chiammav’ Sigillaria, da sigillum ca significava figura. A chilli tiemp’ ancora nun ce steven’ ‘e figurin’ rȇ calciatori e ‘e ‘na maniera s’evan’ arrangia’! ‘O juorn’ aropp’ po’ e criatur’ truavan’ e pazziell’ ȏ posto ‘e chelli statuine che erano ‘e muort’ llor’ piazzat’ dint’ ȏ Paravis’.

Pure ‘a decorazione ‘e l’albero è nu fatt’ antico assai e semp’ legato ai Saturnali! I Romani infatti ce mettevan’ a copp’ nu sacc’ ‘e rrobb’ pe’ bbuon’ augurio pe’ ll’anno ‘e fatica dint’ ȇ  terre ch’eva venì; ‘o fatt’ poi che l’albero ‘e Natale è l’abete che è sempre verde è nu simbolo rȏ fatt’ che ‘a vita continua a essere pure quann’ fa fridd’ e tutta ‘a natura è morta. Ma l’albero è nu simbolo cosmico, nu fatt’ che collega ‘a terra cȏ ciel’, chell’ ca sta asott’ cu chell’ che sta acopp’, ‘e viscere rȃ terra cu chell’ rȏ cielo.

Mò, poiché ogni vvot’ ca se fa’ nu rituale, comm’ pure chill’ ‘e fa’ ‘o presepe o l’albero, se fa nu fatt’ sacro cioè che riproduce ’n’ata vot’ chell’ ca è stat’ quann’ fuje fatt’ ‘o munn’, è chist’ o mument’ ca ogni omm’ ‘ncopp’ a ‘sta terra se fa n’ata vot’, si rinnova dint’ ȏ spirito.

E accussì comm’ a gente antica chist’ è ‘o periodo ca tutti quanti ce sentimm’ cu chella voglia e ce puluzza’ arint’, ittann’ for’ tutta ‘a negatività ‘e l’anno passato e co desiderio ‘e cagna’ vita, almeno l’illusione ca ‘o putimm’ fa’.

Stamm’ mman’ a Saturno, ‘o ddij rȃ appucundria che ce fa sentì chella nostalgia ‘e ‘na cosa ca mor’ e ȏ stess’ tiemp’ l’euforia pe’ chell’ c’adda venì.

Tiemp’ ca mor’ e tiemp’ ca nasce.

Stamm’ semp’ e simm’ semp’ stat’ dint’ a nu cerchio e abbastass’ ca ce fermassem’ nu mument’ pe’ ce sentì dint’ all’anima l’eco ‘e chell’ che è stat’ e ‘e chell’ ca putimm’ essere.

© Angela Giuliano 2016

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

w

Connessione a %s...