Alisandro ‘o Ruosso – ‘o mosaico cu l’albero ca se fa sicco ma nun more

Battaglia_di_IssoTra i tanta piezzi massicci assaie ca fúieno scavati a Pompei quanno ‘a scupirchiaieno ce sta nu mosaico assaie gruosso ‘a ddò ce sta n’ accisatorio ‘e ggente, uommene e cavalli cu ll’uocchie spalancati e ‘n albero sicco.

‘Stu piezzo steva nderra ȃ na casa ‘e uno ca aveva stà bbuono a ssordi  e ‘a ggente jeva llà e se faceva e ggiri ‘a coppo, tanto ca sta cunsumato dint’ a cierti punti. Ma sta nu pucurillo nguaiato pure pecché è stato nu sacco ‘e tiempo all’acqua e ȏ viento nfino a quanno nun ‘o purtaieno ȏ Museo Archeologico ca tanno se chiammava Real Museo Borbonico.

È na scena ‘e uerra addò a sinistra ce sta nu bellu giuvinotto cu e capilli ȏ viento e ‘a chill’atu lato, dint’ a nu carnaio, gente ca se ne fuje, chi sta nderra, chi more acciso e chi ‘a coppo a nu carrettiello pare ca s’è scurdato ‘o ggasse appicciato.

Ma che r’è ‘stu maciello, ca sta succedenno?

Allò, innanzitutto tenimmo annanze all’uocchie nu capolavoro ‘e ll’arte antica.

Na testimonianza ‘e comm’ era ‘a pittura greca ‘e livello, pecché stu mosaico è ‘na trasposizione – ncopp’ ȃ pret’ – ‘e nu dipinto ca secondo ‘a tradizione ‘o facette Filosseno di Eretria o addirittura Apelle.

Ma chi è ‘sta ggente?

A destra uno rȇ cchiù grandi condottieri rȃ storia ‘e ll’umanità: Alisandro Magno ca praticamente partette rȃ Grecia e conquistaie tutto l’oriente, tanto ca arrivaie fino all’India!

A chell’ata parte, chill’atu cu l’uocchie spalancati ca quasi nun ce crere ca nu muccuso ’o sta facenno fujì è Dario III, ca ‘o chiammavano “il Re dei Re” tanta ca era putente.

E sì, pecché chistu era ‘o rre rȃ Persia, ca a chilli tiempe era na super potenza a livello mondiale e nun sulo pecché facevano bbuon’ e tappeti! L’episodio è ‘a battaglia ‘e Isso, na battaglia ca facette capì a Dario chi teneva annanze: na machina ‘e uerra, nu guaglione ca quann’era ancora vivo – primm’ancora ‘e murì – già addiventaie nu mito, comm’ a Maradona a Napule!

Ma primma ‘e parlà specificamente ‘e ‘stu mosaico ve vulesse dicere nu poco ‘e Alisandro Magno ca ggente comme a Cesare, Napoleone e personaggi ‘e chilli livelli llà considerava ‘o top rȇ top! Chist’era ‘o figlio ‘e Filippo il Macedone, re di Macedonia ca a chilli tiempe era sulamente nu regno piccirillo rȃ Grecia, ca pȇ radical chic ‘e Atene e Sparta  era tutto ‘o bblocco nu regno ‘e muntanari (makednos  significava chilli ca viveno ncopp’ ȇ muntagne) tanto ca nun venevano manco considerati greci.

Piccolo e buono grazie a Filippo ‘stu regno chianu chiano addiventaie sempe cchiù putent pecché ‘a primma cosa ca facette fuie organizzà meglio l’esercito: chiammaie cchiù ggente, mparaie a cumbattere a chi teneva ‘e tterre e facette cchiù liggiera ‘a falange oplitica mettennece mmano ‘a sarissa, ‘na lancia ca teneva ‘na ponta annanze e una addereto; ma soprattutto sfruttaie ‘e potenzialità rȃ cavalleria ca era fatta tutta rê cumpagna suoie. Dint’ a vint’anni ‘a Macedonia addiventaie ‘na granda potenza rȏ Nord rȃ Grecia ma Atene Sparta e Tebe nun ce pensavano proprio a vulè  ricanoscere ‘stu putere pecché pe llor’ erano barbari a ffinale.

Allora Filippo, pe dispietto e pe se mettere acoppa, facette na granda opera ‘e acculturazzione tanta ca Pella, ca era ‘a capitale rȏ regno – da villaggio ca nun valeva niente se trasfurmaie dint’ a na granda metropoli. Ce teneva accussì assaie ȃ cultura ca facette venì indimeno Aristotele a ffà ‘a scola Âlisandro ca se mparaie nu sacco ‘e fatti ‘e s’appassiunaie ȃ cultura greca, all’arte, ȃ filosofia e spicialmente  ô mito ‘e Achille, nu granda eroe greco. E fuie probbabilmente Aristotele ca ce mettette ncapa ‘e conquistà ‘o regno râ Persia ca cient’anna primma aveva fatto nu maciello in Grecia, distruggendo tutte cose e appiccianno l’acropoli ‘e Atene.

Chistu criscette accussì, mparato a cumbattere co’ e mmane e cȃ capa. E in effetti teneva na bella capa!  Nun sulo pecché teneva belli capilli ma pure pecché ‘a sapeva usà bbona.

Dicimmo ca pure ‘a mamma, Olimpia, ‘o pumpava assaie pecché ‘o mettette a crerere ca isso era ‘o figlio ‘e Zeus pecché quanno nascette ‘nu fulmine ‘a mettette incinta. ‘O criaturo criscette accussì nu poco muntatiello ‘e cap’ e ‘stu fatto è na caratteristica ca sfruttaie bbuon’, pe tutt’ e trentadoje anna ca campaie.

‘A primma occasiona pe s’attiggià malamente l’avetta a riciassette anna quanno ‘o pate ‘o chiammaie a cumbattere cu isso.

I Macedoni erano considerati chini ‘e cattiveria e infamità tanto ca Demostene, n oratore ca tutta quanta Âtene steveno a sentì, muntaie na polemica contr’a Filippo – na filippica appunto – pe ffà stà accuorti ra ‘sta ggenta ca se steva allarganno assaie.

Mo, poiché tutte ‘e città – stato rȃ Grecia (‘e poleis ) s’appiccicavano tra lloro, spicialmente a proposito ‘e ll’oracolo ‘e Delfi, nu santuario importante assaie, Filippo se mettette ammiezzo e dicette ca sȃ vereva isso. Furnette ca ‘e poleis greche se ncazzaieno e facetteno n’alleanza pe luà ‘a miezzo e Macedoni e se ncuntraieno a Cheronea pe s’accidere.

Alessandro era ‘o capo rȃ cavalleria c’accerette a tutt’ ‘o battaglione rȇ Tebani ca era invincibile; furnette accussì ‘a Grecia classica e abbiaieno a cumannà e Macedoni.

‘A cavalleria fuje l’arma vincente: accussì comm’ l’eva pensat’ Filippo, addiventaje micidiale cu Alessandro pecché chist’ fuje brav’ a coordina’ ‘a falange, nu poca pesant’ quann’ se muvev’, cȃ cavalleria ca era abituata a combattere cu tutta chella roba ‘nguoll’ e se muvev’ veloce.

Âtene se cacaieno sotto ma Filippo invece ‘e accidere a tutta quanta ‘e lloro facette na cosa assai intelliggente: n’alleanza contro i Persiani ca sulamente ‘e Spartani nun vuletteno fà. L’obiettivo era chillo ‘e liberà tutt’ e colonie greche ‘e l’Asia Minore ca steveno assuggettate ȇ Persiani ma Filippo murette primma rȏ verè e accussì Alisandro, a vint’ anna, se truvaie cu ‘stu fatto mmiezzo.

‘O pate fuje sicuramente nu granda generale, ma ‘o figlio teneva na fantasia ca nun truava paragoni; ‘o pate era uno ca sapeva cumannà, ‘o figlio era uno ca se vuleva magnà ‘o munno.

E sȏ magnaie.

Gli Ateniesi se crerevano ca se ne putevano apprufittà e Demostene se mettette mmiezzo n’ ata vota a sbanià e ‘a lega ‘e Corinto, l’allianza ch’eva fatta Filippo, vulette fà n’ata uerra; Alisandro, allora, se ncazzaie e appicciaie tutta Tebe pe dà l’esempio.

‘A sentettena  bbona ‘a canzona l’ata poleis, Atene innanzitutto ca se paraie ‘o culo n’ata vota e fuie accussì ca acalaieno ‘a capa e ricunuscettano Âlisandro ca cumannava isso. Chisto sapeva ca ce serveva l’appoggio ‘e tutta ‘a Grecia pe cummattere contro a Dario. A chilli tiempi l’impero persiano era ‘o cchiù puntente e uno rȇ primma esempi di impero universale rȃ storia; India, Egitto, Asia Minore, muntagna e deserti era tutta rroba lloro! Pure Babilonia, ‘a città cchiù bbella ‘e l’Oriente era persiana e llà sȃ faceva Dario III, ll’urdemo parente ‘e Ciruzzo ‘o gruosso ch’eva fravecato l’impero. Ma ‘a capitale, ‘o core ‘e ‘stu regno, era Persepoli, na città ca se verimmo chella ca rummane mo ce fa capì quant’era importante; e bassorilievi spicialmente ce fanno capì  ammescafrancesca ‘e ggenta ca ce steva: siriani, egiziani, arabi, indiani e babilonesi! Sulo ‘a Grecia nun se riuscetteno a piglià  pecché ‘e poleis erano ‘e fierro e nun se facevano assuggettà facilmente comme se pò verè dint’ ‘o film 300.

Insomma,‘sti persiani stevano bbuona piazzata pure cu l’esercito ca si pure steva vestuta bellillo comunque faceva nu sacco ‘e muorti!

Sulo ‘na capa gloriosa comm’ Alisandro puteva pensà ‘e sfidà ‘sta putenza! È comma si Sarri facesse iucà ‘a primmavera rȏ Napule contr’ ‘a primma squadra rȃ Juventus a Torino.

Cioè chisto nun era sulo pecché aveva stabilizzà ‘o putere macedone, ma comm’Achille se senteva proprio ll’urdemo difensore rȃ Grecia nu poco comma Hamsik ca aroppa ca se ne sò iuti Lavezzi, Cavani e Higuain isso è rummaso a difennere ‘e culuri rȏ Napule!

Abbiaie accussì una rȇ cchiù ggrosse spedizioni militari rȃ storia ‘e ll’umanità.

‘A primma vittoria nun tardaie a venì e subito Alisandro facette verè ‘e caccosa era capace: se mettette annanzo a tutta quanta e caricaie. Fuie chesto ca facette ‘a fortuna soia, ‘o fatto ca era ‘o primmo a se menà dint’ ȇ tarantelle, si pure era ‘o rre; e ‘a ggenta ca cumbatteva pe isso ovviamente se gasava malamente e se faceva pure accidere pe isso.

Dario capétte allora ca pur’ isso s’aveva mettere mmiezzo pecché pensanno ca Alisandro era nu muschillo, aveva mannato annanze l’esercito rê mercenari a Granico.

Chianu chiano quindi Alisandro se facetta sempe cchiù annanze fino a quanno nun se ncrociaie cu ll’esercito persiano a Isso addò finalmente se verette annanze a Dario ca steva tutta bell’ acchittatiello ncopp’ ô carretto. Ancora na vota Alisandro se vuttaie a capa annanze, comma se vere pure dint’ ȏ mosaico, e Dario se ne putette sulo fujì pe nun se fa accidere. Chisto fuienno fujenno se scurdaie dint’ all’accampamento nu sacco ‘e rrobba: oro, sorda, ‘a mamma ,’a mugliera e un rȇ figli ca Alisandro però trattaie bbuono senza accidere a nisciuno.

Alisandro arrivaie fino in Egitto addò fuie fatto faraone aroppo c’aveva dumannato all’oracolo egiziano si isso era ‘o figlio ‘e ddio, sempre cu chella fissaziona ca c’eva miso ‘a mamma ’n capa rȃ quanno era criaturo. Nu rummanette  assaie llà, ‘o tiempo ‘e fà na città cȏ nomme suojo: Alessandria d’Egitto.

Ma poiché nun s’abbuffava manco ‘e terrieno ‘e campusanto se mettette ’n capa ‘e arriva’ fino all’India pecché isso aveva veré ca ce steva a chell’ata parta addò nisciuno era mai ghiuto! Però a cuoppo chino poco pepe cape, e cumpagna suoje se rumpetteni ‘e scatole ‘e sta ancora a cumbattere appriesso a isso e ce ricetteno “‘o fra’, cu tutt’ ‘o bbene, c’hê acciso. Fa’ arriciatà nu poco ‘e cerevella e viretenne bbene ‘e tutta chella ca tieni!” E chillo nun truava pace fino a che nun accereva a Dario, se l’eva miso ’n capa e nun ce steva niente ‘a fa’!

Si guardammo ‘o mosaico putimmo veré comm’ Alisandro sta comma ‘o pazzo a correre appriesso a Dario e tutt’ e duie se guardano dint’ all’uocchie, già sapenno chi ‘e llor’ fa na brutta fina.

Di certo na brutta fina ‘a fa chillu povero cristiano ca pe difennere a Dario (nun se sape si era ‘o frato o uno ca ce teneva assaie pe isso) vene appizzato dâ sarissa ‘e Alisandro e s’arravoglia iss’o e ‘o cavallo.

Dint’ a tutta ‘stu burdello ‘o carrettiello cu Dario acoppa avota ‘a cap’ ȏ cavallo accussì all’intrasatta ca mena nderra a tutta quanta, pur nu puveriello ca fa a tiempo a se guardà dint’ ȏ specchio primma ‘e murì; ‘a girata è accussì viulenta ca pare ca jesce fora rȏ mosaico! Quanno ce staie annanza pare ca partecipi pure tu a chella ca sta succerenno tanto ca è dinamico ‘o fatto.

Nun ce sta nu poco ‘e sole e manco nu poco d’ evera, sulo ’n albero sicco ca sta llà comma si vulesse bilancià ‘a cumpusizzione ca se votta tutta ’n guoll’ a Dario. ‘E chist’ albero ne parla pure Marco Polo – chillo rȃ bonanima rȃ milla lira – dint’ all’opera soia ca racconta e viaggi ca isso facetta ‘a chella parta llà addò ‘a ggenta s’attiggiava ricenno ca po lloro appartenevena Âlisandro Magno.

Mo però vulessa ricere comma chist’albero tene cchiù n’importanza a livello ‘e simbologia pecché steva a rappresentà ‘o confine rȏ munno e comma stu guaglione ‘o vulev’ superà pecché era uno ca ce piaceva assaie ‘e sapé e nun se vuleva fermà maie.

‘N capa a isso se senteva ‘na divinità: bello, senza barba (‘a purtaie isso ‘a moda) e cu nu cavallo massiccio assaie ca a chilli tiempa era comm’ avé nu granda mezzo.

Se senteva comm’ Âchille, ma pure comm’ a Dioniso, chillo rȏ vino, nu ddio ca ‘a mamma ‘o mparaie a canoscere ra quanna era piccirillo; se mbriacava accussì a pazzo ca na vota appicciaie Persepoli! Ma oltre â bubbazza comm’ a Dioniso facette nu viaggio, ma tutt’ ȏ cuntrario, râ Grecia all’Oriente; Dioniso, ca da llà veneva, purtaie cu isso l’agricoltura, ’o vvino e l’allegria, na manera p’apparà tutta ‘e ggenta cȏ magna’ e cȃ bbona cumpagnia.

Dicimmo ca nu fatto accussì ‘o vuletta fà pur’ Alisandro, pecché praticamente dint’ ȃ capa soia vulev’ accucchià nu munno novo addò s’ammiscava ‘a cultura greca cu chella orientale. Teneva na cosa ca se chiamma comm’ a na malatìa ma in realtà è nu fatt’ assaie ruosso: ‘a megalopsichia, cioè ‘a grandezza ‘e ll’anima.

Riuscetta, a chilli tiempa, a fà na cosa incredibile: purtà annanza ‘o cuncetto ca i’ nun songo meglio ‘e te, si pure vengo dint’ ȃ casa toia e me piglio tutt’e ccosa toia. ‘O fatto era tipo accussì: “Nun t’acciro, anzi faccio nsurà ‘e femmene toie cu ll’uommene mia accussì ammescamma ‘o sanghe e simma tutta quanta rȃ stessa razza”.

© Angela Giuliano 2016

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...