Al Museo Archeologico ‘e Napul’ – ‘o Museo, praticamente – sta nu fatt’ tropp’ bbell’: tu tras’ e bell’ e bbuon’ vir’ a nu Batman appis’ a capa sott’ e a chell’ata part’ nu Superman ca par’ che ten’ ‘e braccia allargate comm’ a nu Gesù Crist’.
Che sta succerenn’ ? So’ asciut’ pazz’ cca ddint’, pensa ‘a ggent’.
E invece no, succer’ ca ’n artista che se chiamm’ Adrian Tranquilli bbuon’ ha pensat’ e piazza’ e piezz’ suoi ammiscannel’ cu chill’ antic’ rȏ museo e chell’ ca ne ven’ for’ è nu fatt’ assaje massiccio!
Praticamente chist’artista famoso ‘e l’arte contemporanea ha semp’ faticat’ co’ i super eroi nun tant’ perché ce piacen’ assaje e fumetti ma pecché fondamentalmente ha capito ‘na cosa che è semp’ ‘a stessa: ca tutt’ quant’ amma semp’ tenut’ bisogno ‘e coccurun’ che ce veness’ a salva’.
L’eroe se pò chiamma’ Ercole, Gesù Cristo o Batman semp’ chell’ è.
E allora ha pigliat’ i piezz’ suoi (vint’ann’ ‘e piezz’) e l’ha mis’ a confronto cu chill’ rȏ museo e chell’ ca se capisc’ è che a ffinal’ l’arte è ‘na cosa circolare, ce sta poco ‘a fa’.
Appena tras’ annanz’ all’uocchje ce ‘sta ‘a basilica ‘e San Pietro fatta cu 5000 carte ca tenen’ ‘a faccia rȏ Jolly in tante maniere.
‘A gent’ se fa ‘e croce ȃ smerz’, coccurun’ at cacc’ ‘o rusario, chi se ratt’ insomma l’impatto è già ‘na bella capata ‘nfacc’.
Mò, luann’ ‘a miezz’ ‘o satanism’ ca secondo me nun c’azzecc’ nient’ proprio, ‘o fatt’ bbell’ è che annanz’ a chest’opera – accusi comm’all’at’ – ce stann’ nu cuofan’ ‘e cos’ a pensa’.
Innanzitutto ‘o fatt’ ca so’ cart’ fa pensa’ che bell’ e bbuon’ se ne car’ tutt’ cos’, bast’ ca vott’ nu poc’ ‘e vient’ arrivederci, comm’ a dicer’ ca ‘o sistem’ rȇ credenze ca ce ‘mpar’ ‘a religion’ nun tenen’ nu fondamento massiccio e che nu Joker, ca par’ nu diavolo, pò scumibina’ tutt’ cos’.
‘O diavolo se chiamm’ pur’ Lucifero, ca significa chill’ ca port’ ‘a luce: e allora forse ‘o sens’ è chist’, ‘a luce è chell’ ca te fa vede’ ‘e cos’ ‘e ’n’ata maner’ e ‘o Jolly è ‘na carta ca serv’ pe’ tutt’ cos’, è ‘a creatività. Diavolo pur’ è ‘na parol’ ca ven’ rȏ greco e significa “dividere” e pensandolo accusì chella faccia ’n copp’ a chela ccart’ forse chest’ vuless’ dicer’, comm’ si fosse ’n invito a sparter’ ‘e cerevell’ rȃ tutt’ ‘e strunzat’ ca ce fann’ creder’.
E po’ guardann’ bbuon’ comm’ è fatt’ ‘a form’, chest’installazion’ par’ ‘na tenaglia che te stregn’ nu poc’ comm’ fa ‘a religion’ ca pò si pur’ pensamm’ a che significa ‘sta parola nu sens’ ‘o truvamm; religione ven’ rȏ latino religere ca significa rinchiudere pecché tant’ann’ fa ‘e prievt’ ‘e tann’ ca se chiammavan’ sacerdoti se chiurevan’ dint’ a nu recinto sacro e là ddint’ facevan’ tutt’ cos’.
Mò pur’ è accussì, sul’ che ‘a religion’ invece ‘e chiudere i spazi ce chiur’ ‘e cerevell’.
A proposito ‘e sacralità, assai sacri so’ pur’ e due super eroi – Batman e Superman – appis’ ȏ mur’ un’ ‘nfacc’ all’at’: ‘o primm’ ce fa pensa’ a S.Pietro ca fuje crocifisso a capa asott’ e chill’at’, o Superman, a Gesù Cristo cȏ sang’ che jesc’ rȏ custat’. Bell’, bell’assaje, escen’ da dint’ ȏ mur’ comm’ si se stessen’ sfurzann’ ‘e ascì.
Primm’ e jì annanz’, dint’ ȃ Galleria Farnese addò stann’ ati fatt’, for’ ȏ ciardin’ cestann’ tre statue gigantesche ‘e Batman ca par’ che stann’ attuorn’ a nu fucular’.
So’ avet’ e solenni assaje, cu nu pann’ arravugliat’ dint’ ȇ cianc’ ca ‘e fa’ pare’ antiche e moderne dint’ ȏ stess’ mument’. Tutt’e tre guardan’ ’n terr’ comm’ si ci foss’ coccos’ ammiezz’: un’ ten’ ‘e braccia allargat’ comm’ si stess’ chiammann’, chill’at’ ‘e tten’ comm’ si stess’ pigliann’ coccos’ e chill’at’ ancora ‘e tten’chius’.
Tutt’e tre – ma forse è uno sul’ ca se ver’ dint’ ȃ tre mument’ contemporaneamente – paren’ ca stann’ ricevenn’ coccos’ rȏ ciel’ e rȃ terr’ e ‘o stann’ celebrann’, comm’ si foss’ ‘na comunion’; pe’ mme è ‘na trinità.
Comm’ ricev’ primm’ ati piezz’ stann’ dint’ ȃ Galleria Farnese è ‘o primm’ è ‘o custat’ ‘e Superman co’ ‘e frecce ‘e fierr’ ‘nfizzat’. ‘A primma cosa ca ven’ a mment’ è “Uà! Ma nun er’ ‘a criptonite che ȏ accerev’?” e invece no, frecce ‘e fierr’’ c’acciren’ l’omm’ ‘e fierr’. Accusi come il simile cura il simile,vale pure ‘o cuntrario forse, che ‘o fierr’ accir’ all’omm’ ‘e fierr’. Chi ‘o ssap’, fatto sta che comunque a livello iconografico fa veni a mment’ a San Sebastiano, poco ma sicuro.
Camminan’ ’n’atu ppoc’ ce truvamm’ a mmiezz’ a sala nu mappamondo cu tutt’ ‘e facce ‘e V-per vendetta, chill’ rȏ film ca ggent’ ca se crer’ ‘e fa ‘a rivoluzion’ accusi se mett’ ’n copp’ ȇ magliett’ comm’ se facev’ ‘na vot’ cu Che Guevara sul ca mò se creren’ rȃ fa condividendo ‘e frasi ‘e chist’.
L’opera se chiamm’ After the West ca veness’ a dicer’ Dopo l’Occidente e secondo me è comm’ si foss’ ‘na critica ȏ capitalism’ e ‘a globalizzazion’ ca ce fa tutt’ quant’ tal e qual e grazie a internet però ne simm’ assaje ca putimm’ fa’ ‘na rete e cumbatter’ contro a chilli poc’ ca cumannan’ tutt’ cos’.
Allora accusi nun è cchiù sulament’ l’eroe singolo ma simm’ matant’, tanti eroi cu ‘na sola faccia.
(Po’ after the West a mme me fa vent a mment’ pur’ ‘o far west e i film cu l’american’ a cavall’ c’accerevan’ agli indiani e se pigliavan’ ‘e terr’ llor’…ma chest’ è ’n ata capat’).
‘A stessa faccia ‘a truamm’ pur’ ’n’copp’ a tutt’ addò dint’ a ‘na torre ‘e Babel’ tagliata a metà ce stann’ ‘e maschere ‘e V – per vendetta. ‘O fatt’ è ‘o stess’ e anzi si spiega pur’ meglio si un penz’ che biblicamente ‘a caratteristica rȃ torre ‘e Babele era ‘o fatt’ che era fatt’ ‘e nu sacc’ ‘e roba diversa mentre chest’ invece è tutta janc’ e liscia ‘a for’ e arint’ cu tanta facce ugual’. Cioè, l’omologazion’ proprio.
Semp’ dint’ a ‘sta galleria, ‘ncopp’ a na culunnett’, ce sta n’uovo cu nu buc’ ca se chiamm’ Calimero – The Big Bang: mò perché Calimero e non Paperino nun se sap’ ma fatto sta che l’uovo è nu simbolo assale putent’, è da là che accumenc’ tutt’ cos’, è simbolo ‘e rinascita e infatti nun è nu cas’ che a Pasc’ ce sta ll’ov’. E guardann’ sto piezz’ un’ pens’: è nato prima l’uovo o ‘a gallin’? E chi ‘o ssap’, chest’ è ‘na domanda nu poc’ comm’ “Chist’ann’ ȏ vincimm’ ‘o scudett’?”
Appriess’ all’uovo ce sta nu Yoda, ‘o cos’ brutt’ ma saggio assaje, ‘e Guerre Stellari: sta cȏ bbaston’ ‘ncopp’ ȇ libri e par’ nu rabdomante, ca foss’ chill’ che ca nu baston’ riuscev’ a capì si ‘a sott’ ȏ terrien’ ce stev’ o no l’acqua. L’opera se chiamm’ The guardian – ‘o guardian’ e par’ ca iss’ sta là ‘ncopp’ comm’ nu rabdomante a acchiappa’ e a custodì ‘a sapienza ca jesc’ for’ rȇ libri.
Cammenann’ arrivamm ȃ ’n ata sala addò ce sta ‘na Venere cu nu mostro ca jesc’ rȃ panz’: Alien – the Artist se chiamm’ e secondo me vò rappresenta’ proprio ‘o process’ ‘e creatività che ’n artista fa quann’ crea. Cioè secondo me sente proprio ‘stu bisogno ‘e caccia’ for’ nu mostr’ ca ten’ arint’, comm’ si l’avesse parturì perché si to tien’ arin’ chill’ te magna.
È comm’ l’emozione, s’adda caccia’for’ o si no t’accir’ arint’.
E po’ secondo me ‘fatt’ che è blu nun è nu cas’ ma è ’n omaggio a Klein, nu pittor’ ca se inventaje stu culor’ – chistu blu appunto – ca se chiamm’ comm’ a iss’.
Girann’ l’angolo ce stann’ dati dduje piezz’ ca spacchen’, assaje, aret’ all’Ercole Farnese: nu Batman ‘ncopp’ ȇ craun’ e nu Spiderman ‘ncopp’ ȏ ssal’.
Tutt’ e dduje stann’ chiat’, cioè nun s’atteggian’; anzi, Batman par’ ca nun se fir’ cchiù e dic’ “facit’ comm’ vulit’ vuje, nun ce pozz’ fa’ cchiù nient’”.
Guardann’ comm’ stann’ mis’, un’ annanz’ all’at’, a me me venen’ a mment’ Penitenza e Fede. I craun’ stann’ a significa’ ca ce stat’ coccos’ che s’è appicciat’ e ‘o fuoc’ è ‘nu fatt’ catartico ca te libera e ‘o ssal’ invecenu fatt’ assaje prezioso e pur’ simbolicamente è putent’ assaje, foss’ ‘a sapienza.
Saglienn’ ȏ pian’ ‘e copp’ oltre a nu Yoda vestut’ comm’ nu papa cȃ bilancia ’n’mman’ dint’ ‘a sala ‘e Iside, truamm’ Batman Superman e Spiderman piccirill’ ‘e argient’, dint’ ȃ sala addò stann’ l’argient’ appunto. Guardann’ agg’ pensat’ che ‘stu Adrian Tranquilli mica l’ha scigliut’ a caso i superoi: tutt’ ‘e tre stann’ ‘a probblem’ cȃ famiglia, uno nun ‘a ten’ proprio e ven’ rȏ spazio, ’n at’ ten’ ‘o maggiordomo che ce fa da pat’ e chill’at’ è stato adottato.
Uno è ’n alieno, n’at’ è ‘na mutazione genetica e chill’at’ nun ten’ e superpoter’ ma nu sacc’ ‘e sord’!
Primm’ ‘e arriva’ all’ultima opera che sta dint’ ȃ sala rȇ Papiri, s’hanna vere’ quatt’ Batman ’n croce.
Uno piazzat’ ’n’copp’ ‘a croce classica, uno ’n’copp’ a chell’ ‘e S.Andrea, n’at’ n’copp’ ȏ pal’ rȃ croce latina (foss’ cella a T) l’ultimo ’n’copp’ a chell’ ca par’ ‘na svastica ma nun è ‘na svastica!
L’ultimo pezzo, comm’ ricev’, sta dint’ a ‘na sala assai importante rȏ Museo ed è praticament’ nu Batman cuccat’ cȃ vocc’ apert’ e ‘e frecce ‘nfizzat’ ’n piett’ e se chiamm’ Extasy – The Golden Dream e non perché par’ ca sta tutt’ fatt’ a trip ma pecché arricord’ nu piezz’ assai importante rȃ storia rȃ scultur’ che è l’Estasi di Santa Teresa ‘e Bernini.
Insomma, ‘sta mostra è proprio ‘na capata assurda.
Chist’artista recupera l’iconografiatradizionale e l’ammesc’ cȃ cultur’ ‘e massa e chell’ che ne ven’ for’ – soprattutto dint’ a cheta mostra – è nu fatt’ assaje massicc’.
Innanzitutto Adrian Tranquilli parea comm’ ’n’anguilla e se ver’ ! Po’ te port’ a pensa’ a comm’ sta ‘nguaiat’ ‘a società moderna, comm’ se ne sta carenn’ tutt’ cos’ e ‘o fra truann’ ‘na maner’ assaje innovativa che a ffinal’ fa veni for’ nu munn’ assaje particolar’ che te fa cagna’ proprio ‘o sguard’. Te fa cammena’ ‘e cerevell’ e vott’ ’n terr’ ‘o mur’ ‘e l’ovvio.
E te fa vere’ ca ce putess’ sta aret’.
© Angela Giuliano 2016 | Foto © Claudio Abate
Art for cuozzis 