San Gennaro, faccia gialla e doppia

 

Settembre è ‘o mes’ rȃ palestra, rȇ criatur’ ca tornan’ a scol’, rȏ Napul’ che ha già abbiat’ a juca’ e staj ancor’ a tiemp’ pe’ te fa’ l’abbonamento tra nu “ADL pappone” e ‘a speranza ca chist’ann’ nun facimm’ figur’ ‘e mmerd’.

Ma settembre è, pȇ napulitan’, soprattutto ‘A FEST’ ‘E SAN GENNAR’!
S’aspett’ ca se squagl’ ‘o sang’ rȏ Santo cȃ stessa speranza ‘e vere’ Maggio ca ‘ngarr’ nu cross’!
Sul’ che si succer’ ‘a primma cos’, stamm’ tutt’ cchiù tranquill’ ma si Maggio nun vott’ ‘a pall’ a cap’ ‘e cazz’ e ‘o ngarr’ ‘o cross’, allora sì che c’avimma preoccupa’.
In ogni caso se tratt’ semp’ ‘e sang’ ca voll’, vuò pe’ e jastemm’ vuò pe’ miracolo.

Ma chi era chist’omm’ ca se facett’ taglia’ ‘a cap’ pecché crerev’ a Gesù Crist’?
Innanzitutto se chiammav’ Ianuario, anzi chill’ era ‘o cognome pecché appartenev’ a Gens Januaria cioè fedele al dio Giano, e dicen’ che in realtà se chiammav’ Procolo, nu nomm’ che, ‘o ssacc’, nun c’azzecc’ nient’ cȏ sant’ nuost’ ca per noi sarà solo e sempre Gennarin’. Continua a leggere “San Gennaro, faccia gialla e doppia”

Annunci

‘A festa rê luci ê pier’ râ muntagn’

festa-delle-lucerne

Dint’ ô borgo medievale ‘e Somma, a Casamale precisamente, ogni quatt’ann’ ce sta ‘a festa rê lucerne pe’ celebra’ ‘a Maronna râ neve, dint’ a vic’ e vicariell’ addò abitavan’ e contadini ê tiemp’ ‘e l’Aragones’, accucchiat’ aret’ a mmur’ che nun sul’ difendevano ‘a città ma pure ‘e tradizion’.
E infatti ‘sta tradizion’ antica ancora se manten’ quann’ dint’ a ‘sti vicariell’, ê primm’ juorn’ ‘e aust’ ogni quatt’ann’, pe’ tre juorn’ s’appiccian’ nu sacc’ ‘e lumin’ sistimat’ dint’ a telai ‘e lignamm’, da ‘o cchiù gruss’ ô cchiù piccerill’, a fa’ ‘na prospettiva addò l’uocchie se perden’ arint’ comm’ quann’ mitt’ nu specchio annanz’ all’at’.
‘Sti telai, ca se chiammen’ squadri, tenen’ ‘a form’ ‘e nu triangol’, ‘e nu rombo, rô quadrat’ e rô cerchio, simbolismi antichi assai cu nu significat’ assai preciso: ‘o triangolo ven’ a significa’ ‘a magia rô nummer’ tre, ‘o quadrato ‘a stabilità, ‘a perfezion’, ‘o cerchio ‘a ciclicità râ natur’e ‘o rombo è nu riferimento ô strumento musicale ca s’ausav’ durante e cortei ‘e Bacco.
Accussì infatti comm’ quasi tutt’ e ffest’ religios’, le origini s’hanna cerca’ dint’ ê cult’ pagan’ ‘e l’antichità e dint’ a stu cas’ era nu cult’ agricolo comm’ se capisc’ pur’ da tutt’ e feston’ appis’ for’ ê ccas’ râ ggent’ ca metten’ pur’ ‘o mangia’ ‘ncopp’ ê banchetiell’. Continua a leggere “‘A festa rê luci ê pier’ râ muntagn’”

Agg’ vist’ nu rummor’ e nu fantasma

 

Napul’ è ‘na città accussì bbell’ ca manc’ e muort’ se ne vonn’ jì; ‘o legame è accussì ffort’, visceral’, ca spesso e vulentier’ accumparen’ fantasmi ‘e ggent’ senza cap’, femmen’ ca fujen’, chi chiagne, chi s’allament’, suspir’, rummor’ ‘e carrozz’ e cavall’. E chiammel’ fess’ ‘sti fantasm’, nun sul’ nun se ne vann’, ma se so’ scigliut’ pur’ e megl’ palazz’ ‘e Napul’ p’accumparì! Me piacess’ ‘e ne parla’, arricurda’ ‘sta ggent’ ch’è stat’ , ggent’ ca nott’ e juorn’ s’ammesca cu culur’ e voci ‘e ‘sta città. Ne so’ assaje e io vogl’ abbia’ a ricurda’ nu piezzicciull’ â vot’… Partimm’ ra piazza San Domenico che pâ concentrazion’ ‘e cumpars’, leggende e fattariell’ chin’ ‘e mister’ è ‘a nummer’ un’; putimm’ dicer’ ca marc’ proprio a ppest’ e infatti non a caso chill’obelisco cu S.Domenico ‘ncopp’ a tutt’ ‘o facetten’ pe’ ringrazia’ pâ fin’ ‘e ‘sta malatìa c’accerett’ nu sacc’ ‘e ggent’ e l’osser’ ‘e paricchj ‘e llor’ ‘stann’ astipat’ int’ ô Cimitero rê funtanell’. Continua a leggere “Agg’ vist’ nu rummor’ e nu fantasma”

Iside a Benevento, ‘na maronna ‘e strega

Quanno se parla ‘e Beneviento a tutta quanta veneno a mment’ ‘e streghe e a me, personalmente, ‘e minacce ‘e quanno ero criatura e nun vuleva mangià (‘na voooota!): “Si nun faje ‘a bbrava te faccia venì a piglia rê streghe ‘e Beneviento!”
(A casa mij l’uomo nero nun è stato maie discriminato ‘o fatto ‘e chesta…)
Più precisamente però ce vene a mmente ‘a butteglia ca ‘a nonna tene dint’ ô stipetto e ca caccia fore quanno veneno e cummare a ffà l’augurie oppure e ciucculattina cu chella carta gialla ca quanna eri piccirillo nun t’e putiva magnà pecché tenevana ‘o liquore dinto.
Pochi sapeno che a Beneviento ce sta ‘na mala concentraziona ‘e reperti egizi ca servevena pô culto ‘e Iside.
E sì, proprio accussì.
Mò tutta quanta a sbanià cu ‘stu museo egizio a Torino, accà allà, ma intanto nisciuno rice ca proprio a Beneviento s’è truato nu cuofano ‘e rrobba, a livell’ ca è nu fatto incredibile pe nu posto ca nu sta in Egitto!
‘Stu culto arrivaje in Campania pe mmezzo rê puorta commerciala ‘e Neapolis ca tanna erana frequentata assaje da mercanti alessandrini, e stessa ca facettene fà ‘o cuorpo ‘e Napule, e pura chillo ‘e Puteoli, ca fosse l’attuale Pozzuoli che pigliaje ‘stu nomme pecché ce steva nu puzzo ca feteva malamenta.
Primm’ ‘e feter’ ‘e pesce, fetev’ ‘e zzolfo praticamente.
Ma fuje pur’ pe’ mmiez’ re mercant’ campan’ che probabilment’ s’eran’ ‘mparat’ a pria’ ‘sta dea jenn’ annanz’ e aret’ int’ e puort’ vari râ Magna Grecia e int’ a chill’ ‘e Delo, addò ce stev’ nu grand’ tempio dedicato a Iside.
E puzzulan’ â fravecajen’ pur’ llor’ nu tempio  che è ‘na testimonianza rô legam’ assaje stritt’ che tutt’ e Campi flegrei tenevan’ cu l’Oriente e tutt’a cultur’ ‘e chelli ppart’ llà.
Nun ve ric’ proprj quann’ po’ e Roman’ vincetten’ e guerr’ punic’, aej, nun se capett’ cchiù nient’ e ‘o golfo ‘e Pozzuoli, ca tann’ se chiammav’ Colpos Cumano, addiventaje ‘o primm’ puort’ commercial’ e militar’ ro Mediterraneo.
Cioè spaccav’ proprj.
Fuje allor’ ca ‘stu cult’ pigliaje per’ malament’ tant’è che ‘stu tempio – ca se chiamm’ Iseo – truat’ pe’ scagn’ ‘ncopp’ a ‘na spiaggia annanz’ all’Acropoli ‘e Cuma, er’ probabilmente cchiù gruoss’ ‘e chill’ ‘e Pompei addò pur’ se venerav’ ‘sta divinità egiziana.
Tra lattin’ ‘e coca col’, carta stagnol’ e ata mmunnezz’ truvajen’ pur’ tre statuett’, una cu ess’, ‘n’ata cu ‘na sfinge e l’altra cu nu sacerdote ma senza cap’ pecché quann’ s’abbiajen’ a cumanna’ e cristian’ proibirono tutt’ ‘sti fatt’ e comm’ e taleban’ distruggetter’ tutt’e testimonianz’ pagan’; mò stann’ astipat’ ô Museo Archeologico ‘e Napul’, int’ a ‘na sala dedicata proprj a Iside. Continua a leggere “Iside a Benevento, ‘na maronna ‘e strega”

Il culto di Cibele e il cuozzo fujente

Gaetano Gigante Ritorno da Madonna dell'Arco‘O juorn’ ‘e Lunedì aropp’ Pasc’ nun te scet’ l’addor’ rô cafè né l’allucc’ ‘e mammà che te chiamm’ pe’ te fa’ magna’ ‘na fell’ ‘e pastiera…no…te scit’ cô burdell’ re fujent’.
È un classico.
E puntualmente ti chiedi PECCHÉ, quanta genio ten’ ‘sta ggent’ pe’ se metter’ a sbania’ mmiezz’ â via, a se sbatter’ accussì cu chella music’ a pall’ int’ê recchie e nun ave’ ‘o mal’ ‘e cap’ comm’ ‘o fann’ venì.
Devozione, tutta devozione.
Primm’ ‘e jastemma’, verimm’ ‘e che se tratt’.
Tutt’ cos’ accuminciaje ô 1450 quann’, pazziann’ a pallamaglio, nu tip’ sbagliaie ‘o tir’ e jastemmann’ pâ stizz’ chiavaje ‘na pallinat’ ‘nfacc’ ô dipint’ ‘ra Maronn’ ‘e ll’arco che se chiammav’ accussì pecché stev’ astipat’ int’ a ‘n’ edicola votiva vicin’ a ‘n arc’ ‘e n’acquedotto roman’.
Tant’ er’ fort’ ‘o colp’ che â facett’ ascì ‘o sang’ e se facett’ addirittur’ ‘na mulignan’ ‘n facc’.
Inutile dire ‘a meraviglia e ‘a ggent’ che vulev’ accider’ chill’ omm’ ‘e nient’ .
Ra chillu mument’ s’abbiaje a venera’ chest’immagin’ e ô post’ ‘e chest’edicola se fravecaje nu santuario addò ogni anno, ô lunnerì in albis, vann’ in pellegrinaggio tutt’ e devoti ‘e chesta Maronn’. Continua a leggere “Il culto di Cibele e il cuozzo fujente”

Piazza del Plebiscito quann’ nun se pazziav’ a pallon’

Chell’ ch’è succies’ a piazza del Plebiscito è ‘nu fatt’ ca me fa’ saglì ‘o sang’ ‘n cap’ e veramente m’ fa’ pensa’ ca ‘a mamm’ ‘re chiavec’ è semp’ prena!
Indimen’ manc’ ‘e Vandal’ – ‘e Vandal’ ‘o ver’, chill’ ca tant’ ann’ fa’ facevan’ maciell’ pe’ tutt’ part’ – puteven’ esser’ accussì ggent’ ‘e mmerd’.

‘Sta piazza n’ha vist’ ‘e tarantell’.
Primm’ ro concerton’ ‘e Pino Daniele, primm’ e esser’ nu grand’ parcheggio, primm’ ‘ro burdell’ pecché amma vinciut’ ‘a coppa Italia a facc’ ra Juventùs, ccà ce steven’ ‘e mmur’ ‘e l’antica Palepolis e chell’ romane del Castro Luculliano.
Po’ ce costruetten’ tre conventi ch’ era chill’ ra Croce e ra Trinità, ro Santu Spirit’ e chill’ ‘e San Luigi.
Quann’ ‘e spagnuol’ venetten’ a Napul’, ‘a via ro Cincucient’, vuletten’ accuncia’ nu poc’ ‘e fatt’.
Pietro di Toledo, ‘o vicerè cchiù famos’, facett’ fa’ ‘na via ,ca se chiammav’ comm’ a iss’, ca re Quartier’ addò stev’ l’accampamento de surdat’, arrivava direttament’ fin’ ‘o palazz’ suoj (‘o primm’ palazz’ vicereale) e po fa’ costruì avetten’ schiana’ tutt’ cos’ e accussì nascett’ Largo San Loise.
‘A via ro milleseicient’ ‘o vicerè e conte di Lemos, Fernando Ruiz de Castro – ca secondo me cu ‘stu nomm’ putev’ fa’ l’attor’ int’ ‘a ‘na telenovelas – vulett’ fa’ cchiù bbell’ ‘o Palazz’ Reale accussì ‘o Rre, Filippo III di Spagna, se putev’ appuia’ quann’ scennev’ e ppart’ ccà.
Mò, lass’ ca chill’ ‘o Rre po’ nun è maj venut’, ‘o vicerè vulev’ fa’ bella figur’ e soprattutto vulev’ fa’ ‘na cosa divers’ r’e castiell’ addò seven’ stat’ Angioni e Aragonesi, accussì nun parev’ nu cupion’.
Chiammaje allor’ a Domenico Fontana ch’eva faticat’ bell’ a Roma pe’ Papa Sisto V (chill’ ca facett’ nu mument’ nu mument’ fa’ ‘a cappella Sistina) facenn’ indimen’ rrobb’ comm’ ‘a scalinat’ di Trinità dei Monti, il Quirinale e pur’ ‘a Cupola ‘e San Pietro!!
E infatti ‘stu Fontana spaccaje tutt’ cos’ e poiché ce piacev’ assaj chell’ ch’eva fatt’ a Roma, vulett’ riproporr’ cchiù ‘o meno ‘o stesso stile tipico ra cultura romana, soprattutto int’ ‘a facciat’ bella long’ cu culonn’ ‘e granit’, iscrizion’ latin’, fronton’ e altri fatt’ accussì.
(Fu Umberto I ca facett’ metter’ ‘e statue e tutt’ ‘e Rre ‘e Napul’ int’ ‘e nicchie.)
Accussì “Largo di San Loise”  addiventaj  “Largo di Palazzo”, sede ‘ro puter’ vicereal’ e spazio addò se facevan’ tutt’ ‘e manifestazion’ pubbliche. Continua a leggere “Piazza del Plebiscito quann’ nun se pazziav’ a pallon’”

Le origini greche di Napoli, ovvero i tempi do cipp’ a Furcell’

E sì guagliù, dicimmec’ a verità.
Furcell’ ‘a sapimm’ pecché se va a piglia’ ‘o fumm’ o a magna’ ‘a pizz’ addo Michel’.
Int’ ‘a stu quartier’ però, oltre ‘e piezz’ ‘e fumm’, ce sta pur’ ‘na pret’, nu bellu piezz’ ‘e pret’ .
Anzi, è nu piezz’ ‘e pret’ azzeccat’ cu nu recint’ attuorn’ addò purtroppo ‘a ggent’ ‘e mmunnezz’ jett’ ‘a munnezz’.
Chill’ è ‘o cipp’ a Furcell’!
Oiccann’ ‘o mutiv’ pecché se ric’ “Sì viecchj comm’ ‘o cipp’ a Furcell’!”, pecché chelli quatt’ pret’ addirittur’ e fravecaren’ ‘e Greci.
‘E Greci a livello di Ulisse, chilli fatt’ antic’ accussì.
E sì, pecché ‘a nosta città a fravecaron’ a ggenta grec’ che venette ccà e ‘a chiammà Neapolis, città nuova, pa distinguer’ ra Palepolis, chella cchiù vecchj che stev’ addò sta mò ‘o Castel dell’Ovo.
Tann’ era’ ‘n’isoletta, Megaride, strategica assaj pe’ se scagna’ a rrobb’ cu ll’ata gent’.
A proposit’ ‘e stu fatt’, ‘a leggenda rice che ‘a cchiù bell’ e tutt’ ‘e Siren’, Partenope, s’accerett’ pecché chist’Ulisse era tropp’ ‘nu figl’ ‘e ‘ndrocchj e ess’ accusaj malament’ pecché nun ‘a stev’ a sentì. ‘Na vot’ ca era mort’, ‘o cuorp’ se jett’ a ncatasta’ proprj ‘ncopp’ a chilli scogli llà e llà rummanett’.
Chisti Greci, i Cumani a vule’ esser’ precis’, allor’ praticament’ se spustaron’ ra llà e se jetten’ a fa’ nu gir’ cchiù ‘e part’ ‘e rint’, ‘o centro storico, e facetten’ vic’ e vicariell’ comm’ si foss’ ‘na scacchiera, pe’ sta cchiù sistimat’.
Vic’ e vicariell’ ca se chiammen’ plateiai e stenopoi.
(Po’ venetten’ ‘e roman’ e ‘e chiammajen’ cardi e decumani, pe’ fa riferimento all’accampamento addò se seven’ piazzat’.)
Si ve facit’ nu gir’ e appizzat’ l’uocchje, verit’ ca ce stann’ nu cuofan’ ‘e piezzicciull’ ‘e chilli tiemp’ llà. Continua a leggere “Le origini greche di Napoli, ovvero i tempi do cipp’ a Furcell’”