Agg’ vist’ nu rummor’ e nu fantasma

 

Napul’ è ‘na città accussì bbell’ ca manc’ e muort’ se ne vonn’ jì; ‘o legame è accussì ffort’, visceral’, ca spesso e vulentier’ accumparen’ fantasmi ‘e ggent’ senza cap’, femmen’ ca fujen’, chi chiagne, chi s’allament’, suspir’, rummor’ ‘e carrozz’ e cavall’. E chiammel’ fess’ ‘sti fantasm’, nun sul’ nun se ne vann’, ma se so’ scigliut’ pur’ e megl’ palazz’ ‘e Napul’ p’accumparì! Me piacess’ ‘e ne parla’, arricurda’ ‘sta ggent’ ch’è stat’ , ggent’ ca nott’ e juorn’ s’ammesca cu culur’ e voci ‘e ‘sta città. Ne so’ assaje e io vogl’ abbia’ a ricurda’ nu piezzicciull’ â vot’… Partimm’ ra piazza San Domenico che pâ concentrazion’ ‘e cumpars’, leggende e fattariell’ chin’ ‘e mister’ è ‘a nummer’ un’; putimm’ dicer’ ca marc’ proprio a ppest’ e infatti non a caso chill’obelisco cu S.Domenico ‘ncopp’ a tutt’ ‘o facetten’ pe’ ringrazia’ pâ fin’ ‘e ‘sta malatìa c’accerett’ nu sacc’ ‘e ggent’ e l’osser’ ‘e paricchj ‘e llor’ ‘stann’ astipat’ int’ ô Cimitero rê funtanell’. L’eva fa’ Fanzago, po’ ‘a facett’ Picchiatti ma po’ s’avettan’ ferma’ pecché truvajen’ piezz’ rê mmur’ râ città antic’, addò stev’ ‘a Porta Puteolana. Pare però ca ce stev’ pur’ nu tempio dedicato a Vesta e ‘ncopp’ a chist’ ce facetten’ ‘na cchiesa, Santa Maria della Rotonda, ca se chiammav’ accussì pecché tenev’ ‘a stessa forma circolar’ rô tempio. Mò nun è rummas’ nient’ pecché ‘o duca di Sangro a facett’ vutta’ ‘n terr’ p’allarga’ ‘o palazzo Casacalenda che a sua volta ô 1922 ‘fuje letteralmente tagliat’ int’ a ‘na part’ p’allarga’ via Mezzocannone e fuje proprj tann’ che scavann’ scavann’ ce truvajen’ piezz’ râ cchies’ (mò astipat’ ô Museo Archeologico) e rô tempio. Praticamente ‘a duchessa Marianna de Sangro vulett’ fa’ ristruttura’ ‘nu fatt’ ca già ce stev’ cu l’ordine ‘e nun tucca’ sul’ ‘na scal’ che stev’ int’ ô cortil’ câ facett’ Fanzago e affidaje ‘o pruggett’ a Mario Gioffredo il quale bbuon’ facett’ usaje pur’ e piezz’ ch’erano stati scavat’ vuttannel’ arint’. Ma poiché ‘o sparagn’ nun è maje guaragn’, ci furono tanta probblem’ strutturali e accussì ‘a duchessa nun ‘o vulett’ pava’; aropp’ ca furnetten’ a pisci fetient’ chiammaje a Vanvitelli ca tann’ er’ un’ rê architetti ca cchiù se purtavan’ (pensat’ a chellu ppoc’ ca facett’ â Reggia ‘e Caserta!). Chist’ praticamente sistimaje ‘e guaje ca facett’ chill’ ‘e primm’ e poi ‘o curtil’ addò facett’ nu portico cu quatt’ archi mantenuti rê culonn’ asciut’ for’ quann’ scavajen’ pe’ fa’ ‘e fondamenta. Ma ‘a cosa cchiù bell’ ‘e ‘stu palazz’ so’ gli affreschi di Fedele Fischetti pittat’ ‘ncopp’ ‘o suffitt’: alcuni so’ stat’ purtat’ a Capodimonte, altri so’ rummas’ llà e chi ten’ ‘a furtun’ e se jì a piglia’ nu cafè int’ a ‘sta cas’ ch’è privata ‘e po’ vere’. Dint’ ‘o curtil’ ce stev’ ‘na scala a chiocciola ca scennev’ abbasc’ a cierti cunicoli ca purtavan’ direttament’ a mmar’; ccà se ricev’ ca ‘o duca eva annascus’ nu tesoro e ‘a figlia râ purtier’, curiosa, scennett’ llà abbasc’ e nun turnaje cchiù. A chilli tiemp’ nun ce stev’ ancor’ “Chi l’ha visto?” e ‘a mamma râ guagliona ‘a jett’ a cerca’, ‘a chiammaje, disperata, alluccann’ comm’ ‘na vajassa ma niente ‘a guaglion’ nun se truvaje; accussì ‘a povera cristiana, scunsulat’, se n’avetta saglì chin’ e dulor’ e sang’ e s’appuiaje a ‘na culonn’ addò ancor’ mò se ne ponn’ vere’ i segni. ‘Sta città parla semp’ pe’ segni, è chiena chien’ ‘e nu linguaggio occulto (significa annascus’) ca par’ ‘na contraddizion’ int’ ‘a città rô sol’ ma in realtà è ‘na caratteristica tutta soja, sacro e profano, luci e ombre, mare e vicariell’. Rummanenn’ semp’ int’ a ‘sta zzon’ ce sta ‘n atu palazz’, ‘assaje famoso, che è chill’ rô Principe ‘e Sansevero: ‘nguoll’ a ‘stu cristian’ se ricen’ nu sacc’ ‘e cos’ e ce sta pur’ chi ‘o ver’ ‘e cumparì senza cap’ ma nun è mò ‘o mument’ ‘e ne parla’ , troppo luong’ ‘o fatt’ ne parlamm’ ‘n’ata vot’. Insomma, vulev’ dicer’ che pur’ pe’ ‘stu palazzo ce ‘sta ‘na leggenda, chell’ ‘e Maria D’Avalos, ‘na femmena assaje bbell’ ca se ‘nsuraje cu Carlo Gesualdo da Venosa, nu tip’ ca scriveva ‘a musica pâ chies’; comm’ tanti rê matrimoni ‘e chilli tiemp’ nun ce stev’ ammor’ ma sul’ convenienza e accussì fuje che ‘sta guaglion’ s’annammuraje ‘e nu bellu giuvinott’ Fabrizio Carafa. Erano accussì ‘nnammurat’ ca nun se ne ‘mpurtavan’ nient’ rê chiacchiere râ ggent’ e parev’ ca ‘o marit’, si pur’ stev’ chin’ ‘e corn’, pensava sul’ a scrivere ‘a musica. Evidentemente nu juorn’ se scucciaje ‘e passa’ pô curnut’ cchiù famoso râ zona e priparaje proprio ‘n agguato: facett’ ‘a fint’ che se ne jev’ a caccia e quann’ turnaje acchiappaje a tutt’e dduj int’ ‘o liett’ e l’ accerett’; pe’ fa’ vere’ che er’ stat’ omm’ che s’era luat’ e schiaff’ râ faccia e pur’ ‘e ccorn’ râ cap’ piazzaje ‘o cuorp’ râ povera femmen’ for’ ‘o palazz’ accussì tutt’ quant’ ‘a putevan’ vere’. Iss’, pâ legge rô tiemp’, non fuje cundannat’ ma se n’avetta fujì o si no ‘e famiglie ‘e chisti dduje puveriell’ accis’ ‘o accerevan’ a iss’. (Torquato Tasso, che tra l’altro ‘o cunuscev’ ô curnut’, chin’ ‘e pietà scrivett’ nu sonetto “In morte di due nobilissimi amanti” ) Da allora l’anima ‘e Maria va girann’, chiagnenn’, annanz’ e aret’ tra l’obelisco e ‘o purton’ rô palazz’, forse cercann’ l’ammor’ suoje col quale avett’ nu destino infame. Fuje proprio ‘a mamma rô guaglion’ accis’ che facett’ costruì ‘a cappella della Pietatella – conosciuta pur’ comm’ la cappella Sansevero – affidando l’anima rô figlio â Maronn’ comm’ sta scritt’ int’ a ‘n’ iscrizion’ ‘ncopp’ a tutt’; po’ venett’ Raimondo di Sangro e ‘a trasfurmaje int’ a ‘n atu fatt’ ma po’ ne parlamm’ ‘n atu mument’. Ancora gelusia e sang’ dint’ a ‘n’ata storia, chella râ damigella ‘e Palazzo Spinelli, a via dei Tribunali: praticamente Bianca era ‘na povera criatura crisciuta senza mamma ca facev’ ‘a damigella ‘e ‘sta signora, antipatica assaje, Lorenza; chest’ era accussì brutt’ ca manc’ ‘o marit’ ‘a suppurtav’ tant’è che preferiva cchiù jì a fa’ uerr’ ca sta’ câ muglier’! Nu juorn’ ‘a guaglion’ stev’ accunciann’ e capill’ â signor’ quann’ chist’ trasett’ pâ saluta’ primm’ ‘e partì pe’ ‘na battaglia e chest’ ‘o rispunnett’ malament’ tanto che Bianca ‘o guardaje cu cumpassion’, comm’ a dicer’ “Nun ‘a penza’, tien’ pacienz’” ma ‘a signora fuje mala pensant’ e pe’ gelusia ‘a facett’ mura’ viva. ‘A guaglion’ facett’ giust’ a tiemp’ a ce dicer’ ca in occasione ‘e ‘na cosa bella o brutta ess’ accumparev’; ra tann’ se ric’ ca tre juorn’ primm’ ‘e nu fatt’ bell’ o brutt’ ca capitav’ â famiglia Spinelli se verev’ ‘o fantasm’ râ guaglion’. Camminann’ semp’ pô centro storico, sgorgano da ‘e vicariell’ ata storie ca contano ‘e apparizion’ addirittura rô riavol’ ca s’appresentav’, anticament’, comm’ a nu puorc’. Precisamente a piazza Pietrasanta addò fuje fravecat’ ‘a primma cchiesa ‘e Napul’ dedicata â Maronn’, Santa Maria Maggiore alla Pietrasanta appunto. ‘Sta chiesa ‘a facetten’ – comm’ tante altre – addò stev’ primm’ nu tempio dedicato a Diana, ‘na dea ca sul’ e femmen’ putevan’ pria’; fuje accussì ca l’uommen’, ‘mmurius’, abbiajen’ a dicer’ ca ‘sti femmen’, chiammat’ janar’, sâ facevan’ cô riavol’ , se ‘nzivaven’ ‘e scell’ cu l’uoglj e vulavan’. (Riguardo ‘a stu fatt’ agg’ scritt’ già ‘na cusarella ccà) Fuje proprj pecché ‘stu post’ er’ chin’ ‘e misteri e apparizioni che ‘a ggent’ jett’ addò vescovo ‘e tann’, Pomponio ca poi fuje fatt’ sant’, a chiedere ‘e pria’ ‘a Maronn’; chest’ bon’ facett’ ce jett’ ‘n suonn’ e ce ricett’ ‘e glì llà addò cumparev’ ‘o riavul’, cerca’ ‘na mappina azzurra e quann’ l’eva truat’ scava’ llà ‘na buca fino a truva’ ‘na pret’ ‘e marm’ addò po’ eva fa’ costruì ‘a cchies’. Accussì facett’, fuje fravecat’ ‘sta cchies’ ca ancora però se port’ ‘n cuorp’ ‘e tracce rô passat’ int’ ô campanil’, ‘o cchiù antic’ ‘e l’Italia, addò ‘int’ a bbas’ stann’ ‘e tracce dell’opus reticulatum, ca foss’ ‘a maner’ ‘e fraveca’ e mur’ rê roman’ e ata rrobb’ ca ce vuttajen’ arint’ quann’ ‘o facetten’. Ricimm’ pur’ che ‘o campanil’ è l’unico piezz’ rummas’ râ version’ original’ ‘e chist’edificio ca fuje trasformat’ nu sacc’ ‘e vot’ fino ad arriva’ a mmò ‘int’ ‘a version’ barocca pe’ mmez’ ‘e Cosimo Fanzago. Sotto â cripta, addò sta l’antico acquedotto, hanna truat’ scavat’ int’ ‘e mmur’ cierti ccroc’ particolar’ e se ric’ ca so’ ‘e ccroc’ rê templari che erano assai devoti â Maronna nera; ‘sta Maronn’ atu nun è ca ‘na rielaborazione cristiana ‘e Iside, ‘a divinità egiziana a ‘o cult’ fuje purtat’ rê mercanti alessandrini ca proprj llà, int’ a chella zzon’ s’eran’ piazzat’. Insomma pur’ ‘ncopp’ a ‘sti fatt’ Napul’è ‘na città incredibile, int’ ‘o sens’ che è proprio ALDILÀ ‘e chell’ ca se crer’ ; chell’ ca se ver’ ccà â nisciun’ ata part’ rô munn’…’na città che quann’ se ne scenn’ ‘o sol’ cagn’ scenografia e ‘sti fantasm’ piglian’ vita, ognuno ‘ncopp’ ô palcoscenico suoj.

 

 

© 2015 Angela Giuliano

Annunci

One Reply to “Agg’ vist’ nu rummor’ e nu fantasma”

  1. Avevo e ho ancora, il desiderio sicuramente carnale, giacché parliamo dei sentimenti e della morte, o meglio è la morte che ci parla attraverso i sentimenti delle persone finite tutte al cimitero, di tradurre nella mia lingua, definito dai molti, uno dei tanti dialetti del sud italia, mentre io lo considero una lingua come tante altre, l’antologia di E. L. Masters. Ma se ricordo bene, poiché è accaduto una di queste notti o forse quann’ero stupetiato dint’a cuntrora, che quelli di Spoon River, ma anche quelli d’o vico della mia infanzia, sono venuti in sogno a farmi visita, poiché, ma non so come, sapevano di questo mio desiderio e del fatto che, loro, songo accumparute comme voci: voce ‘e criature ca se ne so gghiute tropp’ambresso; voce ‘e femmenee uommene anziane, ca nun appena le raccuntava quaccosa d’o passata e d’a vita, chi sa pecchè, se metteveno a chignere comme criature, ma senza fa ammuina; voce d’e guagliune e d’e guaglione ca teneno ‘a vita dint’e mmane comme si maniasseno ll’acqua ‘e ‘nu puzzo, chella ‘e sott’a funtana, chella ‘e ‘na surgente e d’o sciuomme, am non chello d’o mare.

    Molti di loro mi hanno fatto capire che vogliono esser lasciati in pace, a riposare, come in fondo meritano. Posizione del tutto legittima, ho detto a quante ce ne steveno. Però, ho detto loro, pensate che ciò che avete vissuto quanno eravate in vita, viene vissuto anche oggi e domani dalle vecchie generazioni che stanno pe’ attraversà ‘o sciummo e chelle nove ca teneno assai paura ‘e suffrì. Che si sappia nella lingua universale del dolore e della sofferenza che si viveva e si vive per una vita degna di questo nome e per l’amore e senza esagerare per la felicità. Mi han guardato e e chin’e malincunia hanno accumminciato a piangere. Anche a me son venuti gli occhi lucidi e poiché non riuscivo a trattenermi, li ho abbracciati tutti a uno a uno. Avevo la sensazione di abbracciare le ombre e le luci d’o nnir’e vascio e dei mulini a vento. E così, il desiderio, la carnalità, forse l’amore immortale, almeno nelle intenzioni e, innanzitutto, dei sentimenti.

    Mi piace

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...