Tutt’ quant’ sapen’ e Borbon’ pô fatt’ rô bidet; ok, eran’ cierti puliton’ e chest’ è ‘na granda cos’.
Pochi però sapen’ ca fravecajen’ nu sacc’ ‘e palazz’, bbell’ assaje, addò jeven’ a caccia’ o a pisca’ pecché ce piacev’ proprj assaje!
Un’associazione culturale, ORANGE reEvolution, ha organizzato ‘na mostra – chiammat’ 22 Double TWO – ‘ncopp’ a ‘sti vintiduje piezz’ ‘e storia scurdat’ rô Patatern’ ma non da ‘sta ggent’ ca cu passion’ e tanta tanta pacienz’ è gghiut’ annanz’ e aret’, alluccann’ l’importanza ‘e cierti fatt’ ca mò stann’ chin’ ‘e mmunnezz’.
Mò, poiché ‘a mostra ‘a fann’ a Castel dell’Ovo, poiché nun se pav’, poiché ve truvat’ e ve putit’ pur’ nu bellu selfie io consiglio ‘e jì a vere’ ‘e che se tratt’.Ma ata fa’ ambress’, sta fin’ a diman’!
Acchiappann’ chell’ c’hanna scritt’ ‘ncopp’ ‘o blog llor’aggia priparat’ a vol’ a vol’ 22 pinnulill’ ca putit’ piglia’ primm’ ‘e jì llà; innanzitutto ricimm’ ca eran’ ‘sti siti real’: posti, bell’ assaje e chiammat’ infatti pure Reali delizie, addò Re, Regina e tutt’ ‘a razz’ llor’ jeven’ a paria’. Ma ‘sti fatt’ so’ stat’ importanti, soprattutto, pecché so’ stat’ assaje innovativ’ pe’ chilli tiemp’, sfruttann’ comm’ megl’ putevan’ ‘o territorio cu costruzion’ bbell’ però.
Verimm’ nu poc’ ‘sti 22 ca so’ stat’ scigliut’ pe’ ‘sta mostra:
1) Il palazzo di Persano, uno rê cchiù importanti, era ‘a casa addò s’appuiav’ ‘o Re quann’ jev’ a caccia; fuje pruggettat’ forse da Barrios, ‘n architetto spagnolo ca però nun sta scritt’ ‘a nisciuna part’ a proposito ‘e stu palazz’, ma nuje ‘o sapimm’ pô Granatello di Portici. Altri studiosi invece ricen’ ca fuje ‘n atu spagnol’, Juan Domingo Piana.
Fatto sta che Vanvitelli, int’ a ‘na lettera mannat’ ô frat’, rice che è ‘o Rre ca ‘o prugettaje, cosa assaje probabile pecché comm’ int’ â Reggia ‘o Rre eva ricer’ semp’ coccos’.
Mò però va a vere’ si è vver’! Se sap’ che Vanvitelli jev’ pazz’ pô Rre e pâ Regina, tant’è che chest’ ricev’ semp’ che quann’ vuliv’ ‘na cosa fatta bbon’, aviva chiamma’ a iss’.
Fatto sta che comm’ tant’ata vot’, ‘o Rre primme fuje ospite, po’ affittuario e po’ – pe’ fa’ ‘o sboron’ – s’accattav’ ‘o post’ si ce piacev’. E accussì facett’ pur’ cu stu palazz’.
2) La Favorita, sta a Ercolano, ‘ncopp’ ‘a via rô Miglio d’Oro e ‘a facett’ Ferdinando Fuga. ‘O principe Stefano Reggio Gravina organizzaje ‘na granda festa pe’ Ferdinando IV e Maria Carolina d’Austria ca tann’ s’erano appena spusat’; quann’ ‘o principe murett’ passaje a Ferdinando IV che ce mettett’ l’Accademia degli Ufficiali di Marina. ‘Sta villa però era famosa soprattutto pecché se ballav’ ‘na bellezz’ e infatti Gioacchino Murat, nonostante ‘o poco tiemp’ che stett’ a Napul’, ce facett’ nu sacc’ ‘e fest’!
Int’ a ‘sta villa se jev’ a balla’ praticamente, llà facevan’ praticamente e MakP reali.
3) La casina del Fusaro nu sacc’ ‘e ggent’ ‘a sap’ pecché è ‘a casa râ Fata Turchina int’ a Pinocchio; quann’ er’ piccerell’ tenevo ‘sta fantasia ‘e correr’ ‘ncopp’ a chillu pontil’ annanz’ e aret’ e trasì arint’ e truà ‘a fata Turchina cu pan’ e nutella. In realtà Ferdinando IV ‘a facett’ fa’ pâ siconda muglier’, Lucia Migliaccio. Fuje progettata da Vanvitelli che però, comm’ int’ â Reggia ‘e Caserta, nun facett’ a ttiemp’ a furnì e sô verett’ ‘o figl’. Fuje concepita comm’ ‘na
casarell’ addò ‘o Rre se jev’ a ripusa’ aropp’ ‘a caccia e se putev’ abbuffa’ ‘e ostriche poiché ce facett’ fa’ ‘n allevamento. Ra llà putev’ pur’ spara’ all’auciell’ che passavn’ proprj p’allà, infatti Carlo Vanvitelli fravecaje ‘e terrazz’ ra addò se putev’ spara’ in tutta comodità. L’avessa sape’ ‘a fata Turchina…
4) Primm’ ‘e mappatella beach, a Licola stev’ ‘na granda Riserva di caccia chiena chiena ‘e cinghiali, tassi, cervi, daini, lepri e volpi. Cioè ‘na fauna nu poc’ meglio ‘e chell’ ‘e mò, si
proprio amma essere sinceri…
5) La Reggia di Capodimonte nascett’ percché praticamente a Carlo di Borbone, ca ra poc’ s’era assettat’ ‘ncopp’ ‘o trono ‘e Napul’, servev’ nu sacc’ ‘e spazi pe’ sistima’ ‘a rrobb’ ch’eva ereditato ra mamma, Elisabetta Farnese.
Infatti si pur’ jat’ mò, oltre a Giuditta ca tagliaje ‘a capa a Oloferne e tant’ata capolavor’, truvat’ ‘a collezione Farnese, nu sacc’ ‘e rrobb’, talmente tanta che l’hanna dovuta sistima’ pur’ô Museo archeologico e int’ ‘o Palazzo Reale.
6) La Reggia di Carditello ‘a facett’ fraveca’ Carlo di Borbone comm’ residenza ‘e caccia ma soprattutto p’alleva’ e cavall’, ‘na razza, chella napulitan’, assaje famos’.
(‘O stemm’ original’ rô Napul’, infatti, nun er’ ‘o ciuccio ma nu cavall’…)
Ferdinando IV ‘a trasformaje int’ a ‘na fattoria modello, esempio ‘e comm’ sti borbon’ steven’ annanz’ co ‘e cerevell’. È stata trasformata int’ a ‘na discarica, a dimostrazione che ‘a cerevella râ ggent’ va aret’ invece ‘e jì annanz’!
7) Villa d’Elboeuf è ‘a primm’ rê 122 ville rô Miglio d’Oro ca fuje fravecat’; ‘a pruggettaje Sanfelice e ‘o principe d’ Elboeuf ‘a regnett’ ‘e nu sacc’ ‘e robb’ scavat’ llà a Ercolano.
Poi s’accattaje Carlo di Borbone ca se ‘nnammuraje ‘e chilli post’ e infatti ‘a facett’ addivinta’ ‘na cusarell’ cchiù piccerell’ râ Reggia di Portici. Si ‘a verit’ mò chiagn’ ‘o cor’ pe’ comm’ sta cumbinat’…e l’arragg’ è ‘o sentimento cchiù ffort’ ca se sent’.
8) Int’ ‘o bbuc’ ‘e nu vulcan’ stutat’ dei Campi flegrei, chill’ degli Astroni, Alfonso il Magnanimo facett’ ‘na riserva ‘e caccia ch’era troppa bbell’ pecché ‘e bbestie nun putevan’ ascì. Ce stev’ pur’ ‘na torre e si pur’ nun è ‘a cchiù bell’ rê tenute ‘e caccia rê Borbon’, è comunque nu post’ suggestivo assaje.
9) Appena s’assettaje ‘n’ copp’ ‘o trono napulitan’, Carlo di Borbone s’acchiappaje a Procida e a Ischia pe’ luà ra man’ a famiglia d’Avalos che evan’ sbagliat’ a se cumpurta’; tra l’altro Procida era nu post’ bbuon’ pe’ caccia’ e poiché ‘o Rre tenev’ ‘sta fissazion’ (s’è capit’!) e accussì facett’ addiventa’ Palazzo d’Avalos ‘na riserva ‘e caccia.
Ce mettett’ man’ pure Ferdinando Fuga e Carlo Vanvitelli prugettaje ‘na rampa che purtava ô castell’ rô mar’. Ferdinando I ce facett’ ‘na scola militare, Francesco I invece nu carcer’.
10) La collina di San Leucio fuje accattat’ râ Carlo cu l’intenzion’ – ma va!! – ‘e fa ‘na riserva ‘e caccia e ‘nu fattariell’ addò putev’ sbania’ câ famiglia. Ferdinando IV avett’ ‘a brillante idea ‘e ce fa’ ‘na fabbrica pe’ fa’ ‘a seta e dà a magna’ â ggent’ rô posto tanto che facett’ proprj ‘na colonia ca tenev’ e leggi soje. Uno rê fatt’ cchiù illuminat’ ca ‘sti sovran’ facetten’.
11) Vanvitelli pe’ fa’ ‘a cascat’ int’ â Reggia di Caserta, accussì comm’ ‘a vulev’ ‘o Rre avett’ costruì ‘n acquedotto – che partev’ ra Maddaloni, raggiungeva il monte Briano addò l’acqua passav’ pe’ grott’ artificial’ e scennev’ abbasc’ a vall’ facenn’ ‘a cascat’.
Dicenn’ accussì par’ ‘na strunzat’, ma chillu pover’ cristian’ jetta’ ‘o sang’ pe’ fa’ arriva’ l’acqua llà.
È nu fatt’ monumental’ assaje e si passat’ p’allà mannat’ nu pensier’ a chillu pover’ cristian’ ca suraje fridd’ quann’ s’evan’ fa’ ‘a primma pprov’ e l’acqua nun arrivav’! Llà vicino ce facetten’ pur’ nu mulin’ e ‘na fabbrichetta pe’ fatica’ ‘o ffierr’ (ca fuje trasformata int’ a ‘n atu mlun’) pe’ sfrutta’ ‘a forz’ ‘e ll’acqua. Nu sacc’ ‘e ggent’ ca venev’ in Italia pô Grand Tour rummanev’ a vocca aperta quann’ ‘o verev’.
12) La Reale Tenuta di Torcino e Mastrati fuje accattat’ da Carlo III, ‘na zzon’ che ce piacev’ assaje fin da quando era piccirill’; ce piacev’ talemente tanto ca s’accattaje proprj tutt’ ‘o bbosc’! ‘A cosa bbell’ llà vicin’ è ‘na specie ‘e circo ca fravecajen’ pâ caccia “sforzata” ca praticament’ significava fa’ arraggia’ e cinghiali che trasevan’ tutt’ ‘ncazzat’ int’ ô recint’ e llà venevan’ accis’.
13) A ‘stu bosco era collegato, pe’ mmezz’ ‘e nu ponte, il Palazzo reale di Venafro addò ‘a famiglia reale e gli ospiti che jeven’ a caccia s’appujavan’ quann’ jeven’ llà. Purtroppo, come altri siti, sta proprj a ppiezz’…
14) ‘A cchiù antica rê cas’ rê Borbon’ è il Palazzo di Quisisana a Castellammare che se chiamm’ accussì perché Carlo II, che ‘o facett’ fa’, guarett’ grazie all’aria bbon’ che stev’ llà; e ce crer’, cô panorama rô golfo ‘e Napul’ ca se verev’ ra llà putiv’ sul’ sta bbuon’!
15) ‘A primma costruzione del Casino delle delizie di Ischia era ‘na casa ‘e villeggiatur’ ‘e nu mierec’ ischitan’ ca invitav’ llà ospiti illustri ca currevan’ soprattutto pê terme. Quann’ murett’ ‘o nipote ospitaje Ferdinando IV ca s’annammuraje rô post’ e l’ann’ appriess’ ce purtaje ‘a muglier’. Fuje Francesco I ca sô accattaje, Ferdinando II nun sul’ furnett’ e lavor’ ma facett’ pur’ trasforma’ chill’ ca era nu lago int’ ô puort’ pe’ migliora’ ‘o collegamento câ capital’.
16) Carlo III vulev’ ‘n atu Palazz’ Reale ‘a for’ Napul’ aropp’ che c’era piaciuta assai Villa d’Elboeuf e accussì scegliett’ Portici, si pur’ cocc’ tiemp’ primm’ ‘o vesuvio eva fatt’ for’ Torre del Greco. ‘O post’ già er’ bbell’ e infatti nu sacc’ ‘e nobili fin da ‘o Cincucient’ evan’ fatt’ fraveca’ nu sacc’ ‘e vill’, ma quann’ po’ se piazzaje llà pur’ ‘o Rre ‘sti costruzion’ aumentajen’ ancor’ cchiù assaje. Grazie a Ferdinando II poi ‘a Reggia fuje collegata cu nu tren’ c’arrivav’ direttament’ a Napul’ e ca è stata ‘a primma ferrovia d’Italia.
17) Altro Casino borbonico ca se ne car’ a ppiezz’ e trasformato int’ a nu munnezzaio è il Demanio di Calvi a Sparanise. ‘Stu post’ ricimm’ che e Borbon’ sô pigliajen’ câ prepotenza e niente putetten’ fa’ e duje comun’ ‘e Calvi e Sparanise: s’avettan’ sta a ‘sta smania ‘e ‘sta famiglia reale ‘e caccia’ pe’ tutt’ part’. Ca po’ ric’ io, ma cu tanta post’ ca tenevan’, pecché avevan’ usurpa’ nu demanio?
18) La Reggia di Caserta
19) Tra i tanti animali che s’avevan’ caccia’, nun putevano manca’ e faggian’! E accussì fuje fravecat’ la Reale Faggianeria; Carlo ce tenev’ accussì assaje ca purtaje Vanvitelli a vere’ chell’ ‘e Capodimonte pecché ne vulev’ una tal e qual, si no pur’ meglio, nella Piana di Caiazzo.
20) Primm’ rô mercato, a Resina ce stav’ ‘n’ata faggianeria, la Real Fagianeria di Resina addò ‘a selvaggina er’ cchiù selvaggia pe’ l’aspetto cchiù selvaggio.
21) Pur’ a Mondragone ‘a famiglia Reale teneva ‘na tenuta ‘e caccia!
22) Il Palazzo Reale di Napoli
Io, diman’, stong’ llà.
© 2015 Angela Giuliano
Art for cuozzis 