‘A festa rê luci ê pier’ râ muntagn’

Dint’ ô borgo medievale ‘e Somma, a Casamale precisamente, ogni quatt’ann’ ce sta ‘a festa rê lucerne pe’ celebra’ ‘a Maronna râ neve, dint’ a vic’ e vicariell’ addò abitavan’ e contadini ê tiemp’ ‘e l’Aragones’, accucchiat’ aret’ a mmur’ che nun sul’ difendevano ‘a città ma pure ‘e tradizion’.
E infatti ‘sta tradizion’ antica ancora se manten’ quann’ dint’ a ‘sti vicariell’, ê primm’ juorn’ ‘e aust’ ogni quatt’ann’, pe’ tre juorn’ s’appiccian’ nu sacc’ ‘e lumin’ sistimat’ dint’ a telai ‘e lignamm’, da ‘o cchiù gruss’ ô cchiù piccerill’, a fa’ ‘na prospettiva addò l’uocchie se perden’ arint’ comm’ quann’ mitt’ nu specchio annanz’ all’at’.
‘Sti telai, ca se chiammen’ squadri, tenen’ ‘a form’ ‘e nu triangol’, ‘e nu rombo, rô quadrat’ e rô cerchio, simbolismi antichi assai cu nu significat’ assai preciso: ‘o triangolo ven’ a significa’ ‘a magia rô nummer’ tre, ‘o quadrato ‘a stabilità, ‘a perfezion’, ‘o cerchio ‘a ciclicità râ natur’e ‘o rombo è nu riferimento ô strumento musicale ca s’ausav’ durante e cortei ‘e Bacco.
Accussì infatti comm’ quasi tutt’ e ffest’ religios’, le origini s’hanna cerca’ dint’ ê cult’ pagan’ ‘e l’antichità e dint’ a stu cas’ era nu cult’ agricolo comm’ se capisc’ pur’ da tutt’ e feston’ appis’ for’ ê ccas’ râ ggent’ ca metten’ pur’ ‘o mangia’ ‘ncopp’ ê banchetiell’.
Poiché ‘sta festa se fa all’inizio rô mes’ ‘e aust’ putess’ significa’ ‘a fine râ fatic’ dint’ ê campagn’ e ‘o ringraziamento pe’ chell’ ca s’è cugliut’; si pur’ stamm’ int’ ô cchin’ rô calor’ infatti ‘a staggion’ è furnut’, è mort’ e tutte ‘sti luci so’ comm’ nu percorso dint’ a nu tunnel ca te port’ ‘a chell’ata part’ e infatti camminann’ p’allà mmiezz’ te sient’ comm’ a ‘n’anima ca se ne va cammenann’ dint’ a ‘na dimensiona magica.
‘A simbologia râ mort’ è evidente pur’ pe’ mmezz’ rê zucche svacantat’ comm’ si foss’ Halloween e a forma ‘e capuzzell’ ‘e muort’ co’ ‘e luci inzippat’ arint’ c’addobbano ‘o percorso insieme a festoni e magna’ ca truov’ dint’ a tutt’ ê vasc’: ccà truov’ tavulat’ apparicchiat’ cu duje pupazziell’, ‘n omm’ e ‘na femmen’ oppure dduje cristian’ ‘o ver’, ‘n omm’ e ‘n at’ vestut’ comm’ ‘na femmen’ cu tutt’attuorn’ ‘e ccos’ pe’ fatica’ dint’ê campagne, pummarulell’ rô piennolo e catalanesca, ‘o vin’ bbianc’ râ zon’.
Ce stann’ pur’ ‘e vasc’ co’ ‘e paparell’* ca fossen’ animali sacri a Diana Tifatina, ‘a divinità pagana a cui primm’ râ Maronn, probabilmente, era dedicata ‘sta festa: chest’infatti era ‘a protettrice rê boschi e rêmuntagn’ e pur’ ‘e l’agricoltura, comm’ a Cerere che cu ess’ s’ammesc’.
Chill’ anticamente accussì facevan’, ammiscavan’ tutt’ ‘e divinità, tutt’ ‘e cultur’ e n’ascev’ for’ coccos’ ca er’ nuov’ ma semp’ ugual’: chist’ ‘o mutiv’ pecché ‘e fest’ ‘e paes’ astipan’ cierti fatt’, cierti gest’ che ‘o tiemp’ nu cagn’.
A proposito ‘e Diana chest’era pur’ ‘a protettrice râ ggent’ che jev’ pê vvie e ‘a truav’ dint’ ê nicchie comm’ vir’ mò ‘e marunnell’ co’ ‘e luci: infatti ‘o lumin’, ‘a lucern’ è ‘n atu fatt’ ‘e Diana comm’ se po’ vere’ dint’ â statua astipat’ ô museo ‘e Capua addò ‘a dea ten’ ‘na curon’ ‘e luci ‘ncap’.
Insomma ‘o tema ‘e sta fest’ è ‘a mort’, ma no chell’ che marc’ a ppest’…’a mort’ che po’ aropp’ fa’ nascer’ ‘n’ata vot’ tutt’ cos’ e accussì partecipann’ par’ che un’ fa’ nu percorso ‘e liberazion’, ognuno camminan’ ‘n’cuorp’ a iss’, mmiezz’ a tutt’ chelli lucell’ ca so’ ‘o simbolo râ lucell’ ca tenimm’ arint’ e c’arricorden’ che l’amma appiccia’ pe’ fa’ luce dint’ all’oscurità.
‘O terz’ juorn’ ce sta ‘a prucession’ râ Maronna râ neve ca sicond’ una rê tanta version’ râ tradizion’ ô 1200 circa, ‘o juorn’ râ celebraziona soj, l’aria attuorn’ ô Vesuvio se facett’ cchiù scur’ râ mezzanott’ e ‘a gente ‘e Casamale avett’ appiccia’ ‘e lanterne; da tann’ chest’ fujen’ associate ô cult’ râ Maronn’.
‘A cosa particolare è ‘o cant’ lamentus’ rê femmen’ quann’ pass’ a prucession’: chest’, annascos’ chi ‘o ssap’ addò, accumpagnan’ ‘a celebrazion’ cantann’ comm’ si stessen’ chiagnenn’.
Probabilmente no pecché nun ponn’ jì pur’ llor’, ma pecché ce sta aret’ nu fatt’ ‘e penitenz’ assai antic’, quann’ se crerev’ che ‘e femmen’ “malament” evan’ sta aret’ a tutt’ â prucession’ e in generale ‘a femmen’ quann’ tenev’ ‘o ciclo evan’ sta luntan’ o si no scuncicavan’ chell’ ca se cugliev’ râ terr’ o quann’ se mettevan” ‘e pummarol’ dint’ ê buatt’.
‘A nev’ in ogni caso è ‘o simbol’ râ purezz’ (nun sul’ râ cocain’!) e quindi râ salut’ sia spirituale ca fisica; chist’ ‘o legame quindi cu l’agricoltura, comm’ ricev’ primm’, pecché ‘a neve è ‘na cosa fresca e pulit’, è fatt’ ‘e acqua ca serv’ semp’ comm’ ‘o ppan’ quann’ nu chiov’ e ‘a terr’ ne ten’ bisogn’.
‘A statua râ Maronn’ jesc’ da rint’ ‘a chiesa râ Collegiata, ‘na chiesa antica assai (rô milleccient’) ca po’ è stata ristrutturata e arint’ ce sta nu suffitt’ tutt’ ‘e oro zecchino rô Seicient’ oltre a cierti piezz’ ‘e scultur’ ‘e lignamm’ rô coro ca so’ tropp’ bbell’ pe’ comm’ so’ fatt’ bbuon’; ‘na vot’ ch’è asciut’, ‘a ggent’ ‘a ringrazia priann’ pe’ ‘n’at’ann’ ‘e bbona salut’ e prosperità.

Passan’ l’ann, e millenni ma cierti fatt’ so’ etern’, comm’ ‘e speranz’ ‘e l’uommen’ ca so’ semp’ ‘e stess’.

*’e paparell’ secondo De Simone so’ legate pureô culto ‘e Priapo, ‘o dio râ fecondità e ‘o simbolo râ putenza generatrice râ natura.

 © Angela Giuliano 2015