Il culto di Cibele e il cuozzo fujente

Gaetano Gigante Ritorno da Madonna dell'Arco‘O juorn’ ‘e Lunedì aropp’ Pasc’ nun te scet’ l’addor’ rô cafè né l’allucc’ ‘e mammà che te chiamm’ pe’ te fa’ magna’ ‘na fell’ ‘e pastiera…no…te scit’ cô burdell’ re fujent’.
È un classico.
E puntualmente ti chiedi PECCHÉ, quanta genio ten’ ‘sta ggent’ pe’ se metter’ a sbania’ mmiezz’ â via, a se sbatter’ accussì cu chella music’ a pall’ int’ê recchie e nun ave’ ‘o mal’ ‘e cap’ comm’ ‘o fann’ venì.
Devozione, tutta devozione.
Primm’ ‘e jastemma’, verimm’ ‘e che se tratt’.
Tutt’ cos’ accuminciaje ô 1450 quann’, pazziann’ a pallamaglio, nu tip’ sbagliaie ‘o tir’ e jastemmann’ pâ stizz’ chiavaje ‘na pallinat’ ‘nfacc’ ô dipint’ ‘ra Maronn’ ‘e ll’arco che se chiammav’ accussì pecché stev’ astipat’ int’ a ‘n’ edicola votiva vicin’ a ‘n arc’ ‘e n’acquedotto roman’.
Tant’ er’ fort’ ‘o colp’ che â facett’ ascì ‘o sang’ e se facett’ addirittur’ ‘na mulignan’ ‘n facc’.
Inutile dire ‘a meraviglia e ‘a ggent’ che vulev’ accider’ chill’ omm’ ‘e nient’ .
Ra chillu mument’ s’abbiaje a venera’ chest’immagin’ e ô post’ ‘e chest’edicola se fravecaje nu santuario addò ogni anno, ô lunnerì in albis, vann’ in pellegrinaggio tutt’ e devoti ‘e chesta Maronn’.
Se chiammen’ fujenti pecché praticament’ corrono comm’e pazz’ int’ all’ultimo tratto ra prucession’ p’espia’ i peccat’ ‘e tutt’ quant’ e fann’ comm’a chillu disgraziat’ che aropp’ ch’eva ciaccat’ a Maronn’ abbiaje a correr’ e nun se putev’ ferma’ cchiù.
Arrivat’ a cchies’ scavez’ abbian’ a se ‘mbrusciuna’ pe’ tterr’, se fann’ venì ‘e convulsion’, chiagnen’, svenen’.
Tutt’ ‘stu burdell’ nun è pazzarìa, né esibizionismo ma ‘na forma precisa ‘e continuazion’ ‘e rituali antic’ assaje, ca se praticavan’ assaje primm’ ro cristianesimo.
‘A maggior parte ro cult’ cristian’, infatti, altro nun è che ‘na rielaborazion’ de religion’ pagan’; ‘o cristianesimo, pe’ se diffonder’ soprattutto mmiezz’ ‘a ggent’ ‘gnurant’, eva usa’ ‘e stess’immagini e i stess’ tradizion’ cui chella ggent’ era abituat’.
Se po’ vere’ innanzitutto nu fatt’ legato all’iniziazione primaveril’, praticament’ ca primmaver’ se mor’ ‘e allergia ma se nasce ‘n’ata vot’ comm’ Attis che, tal’ e qual’ a Gesù Crist’, mor’ e risorge accussì comm’ ‘a vegetazion’.
Infatti tutt’ ‘o sbattimient’ e tutt’ e tarantell’ che fann’ è nu fatt’ dionisiac’ a celebra’, co burdell’, ‘o risveglio ra natur’ aropp’ ‘o silenzio ‘e l’inviern’.
Pur’ ‘o fatt’ che caren’ e po’ s’aizzen’ ‘n’ata vot’ sta a significa’ ‘a forza riproduttiva , int’ a nu ciclo continuo ‘e vita e mort’.
Aret’ a chesta devuzion’ ce sta infatti nu cult’ antic’, chill’ pâ dea Cibele, ‘a dea ra fertilità, che tenev’ nu tempio proprj addò hanna fravecat’ ‘o santuario.
Secondo De Simone ‘stu cult’ è pur’ ‘na maner’ p’esorcizza’ ‘a paur’ ra castrazion’, cioè pe’ nun fa’ ‘a fin’ ro marit’ ‘e Lorena Bobbit e ‘a storia ‘e chella cristian’ che jastemmaje ‘a Maronn’ e se ne caretten’ ‘e pier’ è ‘o simbolo ‘e chesta paura che è antica assaje.
Ma ce sta soprattutt’ nu sens’ ‘e tragicità assaje fort’, ‘e dulor’ che ven’ espiat’ cu ball’ cant’ e compagnia bbell’; l’espiazione re peccat’ pe’ mmezz’ ra mortificazion’ ro cuorp’, purtann’ ‘n guoll’ e tosell’ ca atu nun so’ che tutt’ e peccat’ ra ggent’, currenn’ scavez’ a ringrazia’ ‘a Maronn’.
È ‘o dulor’, l’angoscia soprattutt’ ra povera ggent’ che int’ ‘a fest’ trov’ nu mument’ ‘e riscatt’ ra miseria ‘e semp’ facenn’ tutt’un’ ca comunità re peccat’ quotidian’ e nun è nu cas’ si ‘sta devozion’ è cchiù diffus’ tra ggent’ “malament’”.
‘O legam’ tra ‘a sessualità e ‘o sens’ tragic’ e l’esistenz’, ca è semp’ stat’ int’ e cult’ dionisiaci, se ver’ pur’ int’ ‘e fujent’: ll’aste re bandier’ so’ ‘nfizzat’ int’ a ‘na custodia vicin’ e genital’ stann’ a significa’ ‘o fall’ ‘ntustat’, quann’ se moven’ annanz’ e aret’ (comm’ quann’ abballan’ ‘e Gigli) è comm’ se fa’ ‘na pell’; ll’arc’ è comm’ si foss’ ‘na port’ che sta a significa’ nun sul’ chell’ ca tenen’ ‘e femmen’ mmiezz’ ‘e ccosce, ma pur’ nu passagg’ ra mort’ â vit’, comm’ si foss’ ‘na rinascita spiritual’ aropp’ che un’ s’è puluzzat’ ra tutt’ e peccat’.
‘O caratter’ soprattutt’ maschil’ ‘e chesta rinascit’ che se port’ appriess’ ‘na rinascita general’ è nu fatt’ arcaic’ assaje ca se trov’ int’ ‘e cchiù antic’ religion’ ro munn’.
‘A vesta janc’ sta a significa’ ‘a purezz’, ‘a cors’ ‘mpazzut’ serv’ pe’ se libera’ da ‘o mmal’ ‘n cuorp’, tant’è vver’ che tanta ggent’ se rivolge a Maronn’ e ll’Arc’ pe’ se fa’ leva’ fattur’ ‘a cuoll’ oltre che pe’ chiedere ‘e ggrazie.
Semp’ De Simone ver’ int’ a ‘stu fujì ‘na maner’ pe’ cumbatter’ e diavol’ ca un’ se port’ ‘n’cuorp’, phobos e lyssa, ca fosser’ ‘a paur’ e l’arragg’; second’ a iss’ chist’ è ‘o mutiv’ pe’ cui ce stann’ tant’ element’ ca ricordan’ ‘na uerr’ comm’ ‘a memoria ai caduti, e tambur’, e tromb’.
Ma l’element’ cchiù important’, chill’ che fa’ veramente libera’ è ‘a musica: tarantelle e tammurriate, ‘a giuglianese in particolar modo pecché è cchiù aggressiv’, cchiù guerresc’, cchiù ferrign’ comm’ ‘sta Maronn’ che fa ‘e grazie ma fa tremmer’ pur’.
Ritual’ è pur’ ‘o zumpulia’ ‘n copp’ ‘e nnot’ râ musica cu chill’ c’allucc’ comm’ nu pazz’ “’A Maronn’! ‘A Maronn’!” pe’ trasmetter’ tutt’ l’emotività e batten’ ‘e pier’, comm’ int’ a ‘na danz’ e pe’ cchest’ venen’ chiammat’ pur’ vattient’; second’ ‘n’ata interpretazion’ se chiamman’ accussì pecché se chiavaven’ ‘e mazzat’ llor’ sul’, nu fatt’ ca mò fann’ sul’ a Guardia Sanframondi.
In effetti int’ a tutt’ cult’ collegat’ e ritm’ ra natur’ s’evan’ vatter’ ‘e ppiant’ pe’ fa’ circola’ ‘n’ata vot’ ‘a linfa vital’; probabilmente è chist’ ‘o mutiv’ per cui int’ a leggend’ ro cult’ ra Maronn’ ‘e ll’arc’ chill’ che jastemmaje ‘a maronn’ fuje ‘mpiccat’ a ‘n albero che poi se seccaje.
A me, personalmente, me piace pensa’ che ‘o termin’ fa riferimento â verb’ “vattiare”, “battezzare” che ven’ a significa’ appunt’ nu rit’ ‘e iniziazione.
‘A cosa bbell’ è che comm’ int’ a tutt’ ‘e tradizion’ popolar’, ‘a ggent’ nun ten’ idea ro significat’ ‘e chell’ che porta annanz’ e proprj l’entuasiasm’, int’ ‘o sens’ etimologic’ ro termin’, enthusiasmos cioè tene’ ‘a divinità arint’, è ‘a forz’ cchiù putent’ che resiste ô tiemp’ e che ce port’ a esser’ nu pont’ tra ciel’ e terr’.

© 2015 Angela Giuliano

 

Annunci

9 Replies to “Il culto di Cibele e il cuozzo fujente”

  1. Mentre te stongo liggenno e penzo a chello ca he scritto, allo stesso tempo penzo ‘o tifoso d’o Napole acciso a Roma e ‘a mamma soja ca ha ricevute chelli offese ‘nfame; penzo ‘e strade e ‘e piazze, e musei e viche e vicarielle battuti d’o chiovere e d’o maletiempo e a centenare e centenare e ggente d’e zone noste e gente furastiere ca nonostante tutti i nostri limiti organizzativi e ati ccose, simmo ‘na terra, na città ‘e mare e cielo ca attira ll’uocchie, ‘o core e ll’anema ‘e chi stà luntano. Chello ca tu he scritto avesse essere liggiuto a tutta chesta ggente ca comme rundinelle, farfalle e api se songo appusate e ppo’ vulate, a nu pizzo a n’ato d’a toponomastica dell’anima, mbriacannese d’e bellezze strepitose e senza eguali d’a città nosta. E sottolineo nosta, ma senza essere proprietari di nulla, se non della sua bellezza, d’a cuntentezza e d’a pucundria, ca comme ‘nnammurate, te scioglie ‘o sango dint’e vvene. ‘Na vota Eduardo amariggiato e forse sconfitto pe’ sempe, dicette: – Fujtevenne. – Zittu zitto, chianu chiano è accumminciata, fort’assaje, l’emigrazione. Songo e giuvane ca se ne vanno … eppure nun simmo nu paisiello sperduto mmiezz’e muntagne … ‘e strade, ‘e piazze, e monumente, e giuvane stesse … tutto sango frisco ca se lascia scorrere dint’e saittelle. E’ innanzitutto lavoro ca po’ fermà st’emorraggia, ma pure ‘a bellezza nun solo d’a ruimila anne, ma stà bellezza ca passa ‘a nu cuorpo a n’ata; chesta è ‘na bellezza staffetta: nun fernesce mai. Guagliù, chesta terra è a terra vosta, anzi nosta, nosta, nosta. Ccà è venuto, ha campato e nun se ne gghiuto cchiù Virgilio. E ccà, isso, sta pure sutterrate. E n’atu cumpagne suie di tomba, è Giacumino Leopradi ‘o Ranavuottolo Scartellato. Tutt’e dduje grandi poeti. Pecchè stà femmena-città adda essere ‘na zoccola, p’e quanta bbona e bella, nzevata, vajassa, erotica e sensuale, cattolica pe’ tradizione comme quanno se veste a fujente e corre scaveza e maleziosa, chiavata a nuje e d’e furastiere, le damme 30 euro o mille, conta appena, e a rota torna ‘a girà.

    Piace a 1 persona

    1. Con quello che scrivi, potresti aprire un blog che seguirei volentieri.
      Grazie per questo regalo che mi fai lasciando qui i tuoi pensieri, condividendo l’amore e la sofferenza per questa città cui apparteniamo.

      Mi piace

  2. A Giuni Russo

    Staje cantanno ‘a lengua
    ‘e na musica surgiva.

    Staje cantanno ll’onne
    d’o mare ca sciuscenea.

    Staje cantanno ll’ammore
    d’o cuorpo e ll’anema;

    e t’accumpagna ‘o sole,
    dint’a ll’urdemo suspiro.

    Sì comme ‘na criatura,
    c’annascunn’o male

    ‘cu nu cappelluccio ‘e lana:
    ce vo’ curaggio a suppurtà.

    E ‘na ninna nanna nunnarella
    te voca tra ‘e stelle e ‘a luna,

    comme ‘na mamma astregna
    ‘a figlia soja mentre allatta.

    PS: Guardando e ascoltando un video con Giuni Russo in cui canta: A cchiù bella. ‘O saccio ca sta cosa nun c’azzecca niente c’o Post, però chello ncoppa so’ parole napulitane comme ll’onne d’o mare.

    Cià guagliò.

    Mi piace

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...