La Reggia di Caserta, frittatin’ ‘e maccarun’ e Super Santos

Pasqua si avvicina e comm’ ‘o caprett’ ca ce vuttamm’ ‘n cuorp’ ‘a dummenec’, simm’ pront’ a zumpa’ direttamente a Pasquett’ che – dicimmec’ ‘a verità – è ‘o juorn’ c’aspettamm’ pe’ ce scufana’ ‘e frittatin’ ‘e maccarun’, pazzia’ a pallon’, romper’ ‘o caxx’ a chillu scem’ ca s’è purtat’ ‘a chitarr’ appriess’ e c’ha accis’ cu Lucio Battisti.
Mò, chi nun è impegnato a fa’ ‘o fujent’, ten’ sul’ nu pensier’ ‘n cap’: ‘a Reggia ‘e Caserta.
Cu chillu ciardin’ e chella cascat’ se sta ‘na bellezz’.
Ma nisciun’ sap’, per esempio, che ce vuletten’ 22 ann’ pa fraveca’, è avet’ 36 metri, ten’ 1220 stanz’, 34 scalinat’ interne e 1742 finestre e che custaje cchiù ‘e 6 milon ‘e ducat’, giusto pe’ dicer’ cocc’ nummer’.
Tutt’ chest’ pecché Carlo III di Borbone, cocc’ tiemp’ aropp’ che era addiventat’ Rre (1752), decidett’ ‘e costruì ‘na capital’ nov’ luntan’ da Napul’ e da ‘o mar’, pe’ motiv’ ‘e sicurezz’, e piglia’ ‘a nzier’ ‘e se metter’ a livell’ re cchiù bell’ palazz’ ‘e tutta l’Europa.
Accussì chiammaje a Vanvitelli il quale sul’ pe’ fa’ ‘a cascat’ comm’ ‘a vulev’ ‘o Rre avett’ costruì ‘n acquedotto – l’acquedotto carolino – che partev’ ra Maddaloni, raggiungeva il monte Briano addò l’acqua passav’ pe’ grott’ artificial’ e scennev’ abbasc’ a vall’ facenn’ ‘a cascat’.
Dicenn’ accussì par’ ‘na strunzat’, ma chillu pover’ cristian’ jetta’ ‘o sang’ pe’ fa’ arriva’ l’acqua llà.
Indimen’ ‘a primma vot’ che s’eva fa’ ‘na prov’ steven’ tutt’ quant’ pront’, iss’ surav’ fridd’, e cannon’ pronti a spara’ – manc’ se stev’ facenn’ ‘a primma cummunion’ ‘o figlj ‘e nu camurrist’ – ma l’acqua nun arrivav’! Allor’ Ferdinando IV di Borbone, ca tann’ sev’ nu muccus’ ‘e undici anni, ricett’: “Non arriva ancora, è in ritardo!” e nisciun’ ce putev’ chiava’ nu scuzzetton’ aret’ ‘a cap’ sul’ pecché er’ ‘o figl’ do Rre.

Pe’ fortuna a ffinal’ l’acqua arrivaje, ‘o Rre tutt’ cuntent’ s’abbracciaje a l’architett’ e vissero tutti felici e contenti.
‘O fatt’ ‘e chest’ jeven’ d’accord’, ‘o Rre nun rumpev’ ‘e scatol’ e ce facev’ fa’ tutt’ chell’ ca vulev’ iss’, comm’infatti scriveva l’architetto int’ ‘e letter’ ca mannav’ o frat’.
L’avett’ ‘n gann’ però quann’ Carlo III se n’etta jì a Spagna pecché eva fa’ ‘o Rre llà e arrivaje a sa cumanna’ Tanucci, pecché Ferdinando IV er’ tropp’ piccirill’ pe’ regna’, e chist’ diminuì ‘a zezzenell’ pa costruzion’ da Reggia.
Nonostante ciò faticaje semp’ cu l’impegno e ‘na granda passion’ tant’è che quann’ venett’ a Caserta Galiani, ch’ er’ ‘o segretario ‘e l’ambasciata ‘e Napul’ a Parigi, ce facett’ nu sacc’ ‘e compliment’ e addirittur’ ricett’ che i ciardin’ eran’ cchiù profumat’ ‘e chill’ ‘e Versailles!
‘O facett’ murì cuntent’ a chillu cristian’ che infatti facett’ furnì ‘a reggia al figlio Carlo.
Mò pensat’ nu poc’ quanta fantasia eva tene’ ‘stu Vanvitelli pe’ pensa’ nu fatt’ accussì grandios’!
Peccat’ che nun ha fatt’ a tiemp’ a progetta’ ‘o Magic World, o si no saje comm’ se pariav’?
E chist’ er’ tutt’ ‘o burdell’ pe’ costruì sul’ ‘a funtan’.
Immaginate ‘o riest’.
Innanzitutto ‘sta reggia s’incatast’ perfettamente int’ all’ambient’ natural’, bell’equilibrat’ comm’ proporzion’ e a livell’ ‘e element’ d’antichità classica ammiscat’ cu chill’ ‘e l’arte rinascimental’ e barocc’.
Nun pensat’ a mmò, maciell’, traffic’, parcheggiator’ abusiv’, cos’.
Immaginate nu fatt’ cu ‘sta music’ in sottofondo (e sì, song’ e Fratt’ e vogl’ omaggia’ l’illustre paisan’ Francesco Durante), gente cu ‘sti parruccon’ – ca ancor’ agg’ capì comm’ facevan’ a nun sura’ e nun jastemma’ -, fatt’ accussì.
Po’, si pur’ è massicc’ (era stata pensat’ comunque comm’ ‘na fortezza ma c’avev’ esser’ ‘na reggia, comm’ chell’e Versailles) comunque l’alternanza ‘e culur’ re mattun’ e ro marm’ travertin’ ‘a facevan’ pare’ cchiù legger’.
‘Na vot’ ca sit’ trasut’, ‘n copp’ a destra ce sta ‘nu scalon’ monumental’, ‘a Scala regia, ch’è nu fatt’unic’ ‘n copp’ a facc’ ra terr’ pecché Vanvitelli ‘o facett’ ricava’ ra nu piezz’ sul’ ‘e nu marm’ special’ ca se chiamm’ “Lumachella di Trapani”.
Soprattutto pa primma vot’ nu scalon’ central’ er’ mis’ ammiezz’ e purtav’ direttament’ agli Appartamenti Reali e alla Cappella Palatina.
Stu Vanvitelli era ‘n architett’ accussì ardit’ ca pur’ pe’ fa’ ‘na cappell’ addò ‘o Rre s’ev’ semplicemente arritera’ pe’ pria’, vulett’ fa’ ‘o sboron’!
Marm’ ‘e tutt’ e tip’, oro pe’ tutt’ part’, stucchi cos’…indimen’ è cchiù discret’ ‘o santuario ‘e Padre Pio.
E ho detto tutto.
‘O progett’ originario, però, era diverso: innanzitutt’ s’evan’ fa’ sei statue ‘e marm’ co ‘e santi protettori ro Regno re Ddoj Sicilie; l’altare eva esser’ ‘e marm’ – putev’ mai esser’ diversamente??? – e asott’ eva sta un’urna ‘e marm’ janc’ decorata co ‘e prete’ prizios’ ch’evan’ decora’ pur’ ‘o tabernacol’ che o si no parev’ tropp’ semplice.
I lavori, ch’e interrumpetter’ ‘o 1784, nun e ripigliajen’ cchiù e accussì è rummas’ ‘a version’ appezzuttat’ ‘e l’altare ch’e fatt’ ‘e stucc’ e ‘o tabernacol’ ‘e lignamm’.
Aropp’ e bombardament’ ra siconda guerra mondial’ ‘e tutt’ e quadri s’è salvat’ sul’ ‘o quadro ‘e ‘n’ Immacolata Concezione di Giuseppe Bonito e i culonn’ re logge, ch’e bomb’ scardajen’, so’ volutament’ rimast’ accussì aropp’ ‘o restauro ro 1960 p’arricurda’ comm’ ‘a uerr’ lass’ semp’ ferite ca ‘o tiemp’ nun po’ cancella’.
Si ‘a cappell’ è cchiù sfarzos’ ro Santuario ‘e Padre Pio, si verit’ gli appartamenti reali par e fa’ nu gir’ addo Concetta mobili!
Innanzitutto ‘sti stanz’ nun sul’ eran’ assaje ma pure bell’ gross’, a livell’ ca se putev’ pazzia’ tranquillamente a calcetto.
Pe’ passa’ da ‘na stanz’ a n’at’ ce mett’ cchiù poc’ tiemp’ ‘o Regionale pe’ Napul’ ca nu cristian’ che s’eva spusta’, pe’ ve fa capì comm’ eran’ long’.
‘A stanz’ ‘e liett’ ‘e Francesco II ten’ nu liett’ a baldacchin’, culonn’ culunnett’ e tant’ ‘e chilli fatt’ ca a mme me foss’ venut’ l’ansia a durmì mmiezz’ a tutta ‘sta rrobb’!
Ma ‘a cosa cchiù massicc’ è ‘a vasca int’ ‘o bagn’ addò ‘o Rre se vuttav’ arint’ pe’ se lava’.
‘Stu fatt’ nun er’ tanto ovvio a chilli tiemp’ si pensat’ che ‘o Re Sole in tutt’ a vita soj se lavaje int’ a ‘na vasca sul tre vot’.
‘E Borbon’ steven’ a livell’, infatti nun sul’ se lavavan’ lor’ ma facevan’ lava’ pur’ ‘a ggent’ che stev’ ‘e cas’ ‘ncopp’ San Leucio addò arrivav’ l’acqua int’ ‘e ccas’!
‘O bagn’ da Regin’ er’ cchiù piccirill’ ma cchiù sistimat’, tenev’ addirittur’ nu bidet!
‘Sta regina, ca er’ ‘na figlia ‘e ndrocchj’, se facett’ fa’ ‘sta stanz’ cu ‘e purtus’ pe’ vere’ chell’ che succerev’ e soprattutto pe’ nun se fa’ sgama’ quann’ stev’ arrivann’ ‘o Rre che a quanto se dicev’ tenev’ ‘e corn’ loooong’ loooong’.
Ma ‘a soddisfazion’ cchiù bbell’ ‘e tutt’ ‘stu marchingegno fuje che ‘a ggent’ se putev’ lava’ meglio e fetev’ cchiù ppoc’.
Ce chiamman’ terron’, ma intant’ simm’ stat’ e primm’ ca se so’ putut’ lava’.
‘A primm’ impression’ quann’ si esce for’ ‘o ciardin’ è ‘o vutamient’ ‘e cap’ pa prospettiv’, è tropp’ ‘na capat’ e nun è nu cas’ si Vanvitelli er’ ‘o figlj ‘e Wan Wittel, nu pittor’ olandes’ ca facett’ nu cuofan’ ‘e vedute ‘e Napul’.
Praticament’ se ver’ fin’ abbasc’ a fin’ ro parc’, fin’ a granda cascata che se chiamm’ pur’ Fontana di Diana e Atteone pecché ce stann’ ‘e statue ‘e sta divinità greca e ‘stu pover’ disgraziat’, Atteone, ca fuje magnat’ ra ‘e can’ suoj pecché eva vist’ a dea annur’.
Io ‘o ddic’ semp’ ‘e sta’ luntan’ re can’ ‘e canciell’….
Praticament’ ‘sti ciardin’ so’ divis’ int’ a ddoje part’: a destra cespugli vari e a sinistra ‘o Bosco vecchio che foss’ ‘a part’ che è semp’ stata llà, primm’ ca ce mettev’ man’ Vanvitelli e fa parte ra sezion’ ro giardino all’italiana.
Cca ce sta nun sul’ la Castelluccia addò Ferdinando IV, quann’ er’ piccirill’, jev’ a pazzia’ cu ‘e soldatin’ ‘o ver’, pecché s’eva ‘mpara’ ma pure ‘na Peschiera, nu lag’ pezzott’ cu ‘n’ isoletta ammiezz’
addò se facevan’ ‘e guerr’ naval’.
Cioè praticamente era comm’ l’Edenlandia in versione reale.
Int’ ‘o progett’ originario ‘e funtan’ evan’ esser’ diciannov’ ma poi a ffinal’ ne facetten’ sul’ sei e comunque Vanvitelli nun arrivaje a ne vere’ manc’ un’ pecché murett’ primm’ e so verett’ ‘o figl’.
A primma funtan’ che ‘ncuntramm’ è la fontana Margherita che tutt’ ‘o bblocc’ è nient’ ‘e che mentre chell’ re delfin’, fontana dei Delfini appunto, è proprj ‘o mostr’ nel vero senso della parola.
Addirittur’ Ferdinando IV facett’ ‘na granda fest’ quann’ l’inauguraje e secondo me Gaetano Salomone, ca facett’, s’eva pigliat’ cocc’ acid’ quann’ ‘a prugettaje.
La fontana di Eolo è nu bell’ fattariell’ scenografico anche se er’ ancor’ cchiù ‘na capat’ int’ ‘o disegn’ ‘e priparazion’ pecché ‘e statute evan’ esser’ cinquanta e no vintinov’; praticament’ s’eva vere’ Eolo – ‘o dio chiattulill’ che scioscia ‘o vient’ – ‘ncazzat’ cu Enea e i Troiani pecché Giunone l’eva ‘nzurfat’. Po’ a ffinal’ c’hanna piazzat’ acopp’ ‘e statue dei Venti e degli Zefiri e quatt’ bassorilievi cu scene mitologiche e chell’ che eva esser’ ‘na granda funtan’ cu Giunone ed Eolo ‘ncopp’ a nu carr’ co ‘e nuvol’ attuorn’ e pavun’ è rumas’ accussì int’ ‘o bozzett’ ‘e lignamm’ ca facett’ ‘a bonanim’ ‘e Vanvitelli.
Camminann’ cchiù annanz’ ce sta ‘a fontana di Cerere, dea ‘e l’agricoltura (pensatec’ quann’ ve pigliat’ ‘na ceres corretta), che ven’ chiammat’ anche “zampilliera” pecché è fatta cu tanti cascatell’ e praticamente ‘sta Cerere manten’ nu medaglion’ ca Trinacria che foss’ chella capuzzell’ cu tre coscie che sta ‘ncopp’ a tutt’ e bancarell’ quann’ jat’ in Sicilia. ‘N copp’ e lat’ i dduje cristian’ fosser’ ‘e ciumm’ Oreto e Simeto e cchiù int’ all’acqua delfini, tritoni e Nereidi che sciosciano int’ e buccin’ che nun è ‘na mala parol’ ma foss’ ‘na specie ‘e trumbetell’.
Ven’ po’ la fontana di Venere e Adone addò se ver’ ‘a dea che sta priann’ ‘o bell’ guaglion’ ‘e nun glì a caccia pecché ess’ già sapev’ che nu cinghial’ l’ess’ accis’.
‘O piezz’ ruoss’ però è la fontana di Diana e Atteone addò, comm’ già ricev’ primm’, se cont’ ‘sta scen’ ‘e stu pover’ guaglion’ che pe’ scagn’ verett’ ‘a dea annur’; chest’ se ncazzaje malament’, pecché era assaje pudica – non comm’ ‘e cumpagn’ soje che se ne jeven’ sbaniann’ a destra e a sinistra cu l’uommen’ – e ‘o trasformaje int’ a nu cerv’ ca fuje magnat’ re can’ suoj.
Secondo ‘n’ata versione fuje Giunone, ca stev’ chien’ ‘e corn’, a fa’ accider’ Atteone pecché er’ ‘o figlj di Europa che a chillu mument’ er’ l’amant’ ‘e Zeus, ‘o marit’ e Giunone.
Tutt’ ‘sti funtan’ fann’ part’ ro giardino all’inglese che ‘o vulett’ ‘a Regina Maria Carolina che pe’ se metter’ acopp’ a sor’ Maria Antonietta – chell’ ca ce tagliajen’ ‘a cap’ – , facett’ venì dall’Inghilterra ‘o botanico Andrew Grafer ch’er’ uno re meglio giardinier’ ro tiemp’.
‘A regin’ vulev’ nu fatt’ cchiù selvagg’, cchiù a leoness’ no chilli fatt’ squadrat’ e ordinat’, pallus’, comm’ ‘o ciardin’ all’italiana o alla francese.
Llà dint’ se l’eva cumanna’ a natura, senza regole, in totale libertà e spontaneità.
Allora praticamente ‘o botanico, insieme a Carlo Vanvitelli, pensaje ‘e ce metter’ arint’ piant’ ‘e tutt’ maner’ ca venevan’ ra tutt’ e part’ ro munn’, comm’ per esempio ‘a camelia, direttamente ro Giappon’, che venett’ piantata pa primma vot’ in Europa.
Ma ‘a cosa cchiù fic’ so’ tutt’ e piezz’ sgarrupat’ ca se trovan’ cammenann’ cammenann’; addirittur’ int’ ‘o criptoportico, che foss’ nu porticat’ annascus’ comm’ ric’ ‘o nomm’ stess’, ce stann’ statue che venen’ direttamente da Ercolano e Pompei e ‘o purtus’ int’ ‘o suffitt’ nun è pe’ l’inflitrazion’ ‘e l’acqua ma pecché accussì ‘o facetten’!
Insomma, si se vulit’ ‘nfratta’ nun truat’ nient’ ‘e meglio che nu fatt’ e chist’ romantic’ assaje e soprattutto si vulit’ alliggerì e frittatin’ ‘e maccarun’ ca ve sit’ chiavat’ ‘n cuorp’, facitev’ ‘na bella cammenat’.
Ah e quann’ ve chiammen’ terremotat’, arricurdat’ a ‘sta ggent’ che grazie o terremot’ tenimm’ ‘na collezion‘ ‘e artisti contemporanei che lor’ sa sonnen’!

 

© Angela Giuliano 2015

Annunci

6 Replies to “La Reggia di Caserta, frittatin’ ‘e maccarun’ e Super Santos”

  1. Stù blog è ‘a ‘uerra. Angela, perdoname si te dongo ‘o ttu, nun ne pozzo fa a meno,ma pure tu ca scrive e Post sì brava overamente. Pur’ji, spisso scrivo dint’a lengua nosta, e sai ‘o pecchè? Pecchè me piace. Secondo me e Post tuje songo pe’ forza teatrali e musicali, pirciò s’avesseno sentì pure a viva voce: trasesseno dint’a carne e dint’o core, addò songo asciute e campano juorno e notte. M’aggia leggere tutt’e Post ca è scritto.

    PS: Sono giunto a te tramite la rubrica BARWEB di Marco Filoni sul settimanale ilVenerdì de la Repubblica. Volevo segnalarti un libro di De Blasi, se non erro, un medico del Policlinico collinare, con la passione per la nostra lingua, ma non sono riuscito a trovarlo. E non ricordo il titolo, ma che ritengo molto utile ed esaustivo.

    Ciao

    Mi piace

    1. Uà e tu accussì m’ faj emoziona’! Me se sta sciuglienn’ ‘o sang’ int’ ‘e vven’, manc’ stess’ guardann’ ‘na fint’ ‘e Maradona! Grazie, grazie assaje per l’interesse. Sì, agg’ pensat’ a ffa’ pur’ e video, me sto attrezzann’. :) Grazie comunque pô suggeriment’, me fa assaje piacer’ ca so’ riuscit’ a trasmetter’ tutt’ ‘o sentiment’ che teng’ int’ ‘ cor’.

      P.S.= Se per De Blasi intendi Nicola De Blasi – il professore dell’Università di Napoli – ho dei suoi libri, avendo fatto degli esami con lui. :) Grazie per la segnalazione.

      Ciao :)

      Mi piace

  2. Pe’ scrivere chello ca tu scrive, ‘o core tuoie è ‘na rezza, nu cardillo, ‘na varca mmiez’o mare ‘ntempesta o cu ‘o sole ca te scipp’o core mpietto, ‘nu rasiero, nu quarto ‘e cafè d’o messico cu ll’annese, ma sulo p’e addurà ‘e prufume ‘e quanno, capatosta, ire ‘nnanmurate, ‘na spingula francese,’nu vico ca tra ‘o scuro ll’ombra e ‘a luce t’arricorde Caravaggio ca se ne fuje scavezo,
    ‘nu ciardino addò e rose sciusciuneano cu ‘e spine e rideno: è ‘o cielo ca chiove e schiove culure.
    Tu sì ‘e stratificazione d’a storia ‘e Neapolis; tu sì onne ‘e mare e ‘a lengua ‘e Megaride, terra ferma e acqua surgive; tu sì ‘a femmena greca ca ha cunosce Odisseo e chella ca se stracce ‘e carne quanno parte e quanno torna. Tu sì ‘a femmena ca a ncopp’o Vommero scenne e scorre dint’e vene d’e viche e vicarielle. Tu sì ‘a femmena ca quanno ride annasconna ‘a faccia bella. e se fa vedè carnale quanno chiagne senza vele e senz’o trucco.

    PS: Si, intendevo Nicola De Blasi.

    Ciao

    Liked by 1 persona

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

w

Connessione a %s...