Iside a Benevento, ‘na maronna ‘e strega

Quanno se parla ‘e Beneviento a tutta quanta veneno a mment’ ‘e streghe e a me, personalmente, ‘e minacce ‘e quanno ero criatura e nun vuleva mangià (‘na voooota!): “Si nun faje ‘a bbrava te faccia venì a piglia rê streghe ‘e Beneviento!”
(A casa mij l’uomo nero nun è stato maie discriminato ‘o fatto ‘e chesta…)
Più precisamente però ce vene a mmente ‘a butteglia ca ‘a nonna tene dint’ ô stipetto e ca caccia fore quanno veneno e cummare a ffà l’augurie oppure e ciucculattina cu chella carta gialla ca quanna eri piccirillo nun t’e putiva magnà pecché tenevana ‘o liquore dinto.
Pochi sapeno che a Beneviento ce sta ‘na mala concentraziona ‘e reperti egizi ca servevena pô culto ‘e Iside.
E sì, proprio accussì.
Mò tutta quanta a sbanià cu ‘stu museo egizio a Torino, accà allà, ma intanto nisciuno rice ca proprio a Beneviento s’è truato nu cuofano ‘e rrobba, a livell’ ca è nu fatto incredibile pe nu posto ca nu sta in Egitto!
‘Stu culto arrivaje in Campania pe mmezzo rê puorta commerciala ‘e Neapolis ca tanna erana frequentata assaje da mercanti alessandrini, e stessa ca facettene fà ‘o cuorpo ‘e Napule, e pura chillo ‘e Puteoli, ca fosse l’attuale Pozzuoli che pigliaje ‘stu nomme pecché ce steva nu puzzo ca feteva malamenta.
Primm’ ‘e feter’ ‘e pesce, fetev’ ‘e zzolfo praticamente.
Ma fuje pur’ pe’ mmiez’ re mercant’ campan’ che probabilment’ s’eran’ ‘mparat’ a pria’ ‘sta dea jenn’ annanz’ e aret’ int’ e puort’ vari râ Magna Grecia e int’ a chill’ ‘e Delo, addò ce stev’ nu grand’ tempio dedicato a Iside.
E puzzulan’ â fravecajen’ pur’ llor’ nu tempio  che è ‘na testimonianza rô legam’ assaje stritt’ che tutt’ e Campi flegrei tenevan’ cu l’Oriente e tutt’a cultur’ ‘e chelli ppart’ llà.
Nun ve ric’ proprj quann’ po’ e Roman’ vincetten’ e guerr’ punic’, aej, nun se capett’ cchiù nient’ e ‘o golfo ‘e Pozzuoli, ca tann’ se chiammav’ Colpos Cumano, addiventaje ‘o primm’ puort’ commercial’ e militar’ ro Mediterraneo.
Cioè spaccav’ proprj.
Fuje allor’ ca ‘stu cult’ pigliaje per’ malament’ tant’è che ‘stu tempio – ca se chiamm’ Iseo – truat’ pe’ scagn’ ‘ncopp’ a ‘na spiaggia annanz’ all’Acropoli ‘e Cuma, er’ probabilmente cchiù gruoss’ ‘e chill’ ‘e Pompei addò pur’ se venerav’ ‘sta divinità egiziana.
Tra lattin’ ‘e coca col’, carta stagnol’ e ata mmunnezz’ truvajen’ pur’ tre statuett’, una cu ess’, ‘n’ata cu ‘na sfinge e l’altra cu nu sacerdote ma senza cap’ pecché quann’ s’abbiajen’ a cumanna’ e cristian’ proibirono tutt’ ‘sti fatt’ e comm’ e taleban’ distruggetter’ tutt’e testimonianz’ pagan’; mò stann’ astipat’ ô Museo Archeologico ‘e Napul’, int’ a ‘na sala dedicata proprj a Iside.
In realtà però ‘stu cult’ ten’ assaje cos’ comm’ a chillu cristian’: int’ ‘o tempio e fedel’ putevan’ trasì e pria’, cos’ ca nun se putev’ fa’ int’ all’ati ppart’.
Anche se amma dicer’ che ‘a caratteristica principale er’ comunque ‘o mister’, nel senso innanzitutto che ‘a ggent’ s’eva sta’ zitt’ e po’ nel senso che ‘sti cult’ erano ‘na form’ ‘e iniziazion’ che a ffinal’ te purificav’, te facev’ rinasce’ int’ a ‘na vita nov’ a dimostrazion’ che l’anima è immortal’.
Nun è nu cas’, infatti, che ‘sti fatt’ erano praticat’ soprattutto int’ all’ambit’ agricolo addò ‘a fatic’ ra campagn’ dipendev’ da ‘o cicl’ ra natur’.
Cosa che fuje accussì pur’ pô Cristianesim’ quann’ s’abbiaje a diffonder’ e infatti Gesù Crist’ int’ ‘e primm’ raffigurazion’ era ‘o buon pastore mmiez’ e pecor’ o tenev’ uva pe’ tutt’ part’ tant’ che un’ putev’ pensa’ che er’ nu ‘mbriacon’.
N’atu fatt’ era ‘a resurrezion’: Iside, infatti, aropp’ che ‘o cainat’ Seth nun sul’ facett’ a ppiezz’ ‘o frat’ Osiris pecché er’ mmurius’ ma ‘o jettatie pe’ tutt’ part’, chesta bbona femmen’ avett’ ‘a pacienz’ rô cerca’ annanz’ e aret’ pô munn’ e quann’ truvaje tutt’ cos’ ô azzeccaje e ‘o resuscitaje.
Praticamente ‘a mort’ e ‘a resurrezione ‘e Osiride era ‘na prumess’ ‘e vita eterna per gl’iniziati.
V’arricord’ coccurun’?
Tra l’altro quando Iside facett’ nu figl’, Horus – ‘o ddij ro sól’ – era praticamente vergine pecché tra e tant’ piezz’ rô marit’ che truvaje mancav’ ‘o cchiù important’, ‘o pat’ re criatur’, e così s’avetta arrangia’ facennel’ nuov’ cu ll’or’ e ‘a cer’.
Nun sacc’ comm’, ma rummanett’ incint’.
Tenev’ ‘na caterv’ ‘e nomm’ e pur’ ess’, comm’ ‘a Maronn’, ten’ ‘na curon’ ‘e stell’ ‘n cap’.
Ma soprattutto Iside era spesso rappresentata cu na zizz’ ‘a for’ mentre allattav’ ‘o criatur’, Iside lactans, ch’è ‘n’ immagine che ce fa’ pensa’ inevitabilmente â Maronn’.
Tra l’altro proteggeva pur’ chi jev’ pe’ mmar’, tant’ ca venev’ chiammat’ pur’ Iside Eupleia che ven’ a ddicer’ “della buona navigazione”.
In tutto ciò ‘o significat’ ro nomm’ Maria è “donna del mare” e infatti Iside in Egitto se chiamm’ Meri pecché è ‘na dea marina.
Mò praticament’ int’ all’antico Egitto ‘stu raccont’ ‘e Iside servev’ ê faraon’ pe’ legittima’ ‘o puter’ e accussì â stessa maner’ Domiziano, che se truav’ a passa’ per Benevient’ turnann’ râ campagna dacica, facett’ fraveca’ pur’ iss’ nu tempiope’ ‘sta dea, ma nun er’ l’unic’, già ce stev’ coccusarell’.
Mò nun ce sta cchiù, manc’ ‘na pret’, ma è sicur’ che ‘o facett’ fa’ pe’ fa’ vere’ ca sâ cumannav’ iss.
Domiziano infatti se crerev’ dominus et deus cioè nun sul’ imperator’, ma pur’ ddij!
Pe’ chistu mutiv’ allor’ nun sul’ eva esser’ rappresentat’ comm’ a nu faraon’ ma bbuon’ pensaje ‘e fa’ diventa’ ‘sta divinità ‘a cchiù important’ ‘e tutt’ ‘e divinità priat’ a Roma pecché era bbon’ proprj pe’ fa’ capì quant’ iss’ er’ ‘o megl’, comm’ si teness’ ‘o diritt’ divin’ ‘e cumanna’, comm’ si iss’ po’ er’ Horis.
Tra l’altro Benevient’ stev’ int’ ‘a ‘na posizion’ strategica assai pecché stev’ just’ a mmiezz’ tra Roma e l’Oriente e chill’ mica er’ scem’ Domiziano, pensaje a tutt’ cos’.
A testimonianza ‘e ‘sta capat’ che l’imperator’ se pigliaje pô cult’ egizian’ so’ rimasti dduje obelischi, addò sta proprj scritt’ in geroglifici che facett’ fa’ da nu  cert’ Rutilio Lupo ‘stu fatt’ «per la Grande Iside, Signora di Benevento»  e pa chiamma’ accussì, cu sta devozion’, probabilmente ‘o cult’ ce stev’ già.
In ogni caso ‘nziem’ a tutt’ e bagattell’ c’hanna truat’ ,’sti dduj obelischi so’ element’ fondamental’ che gli archeologi tenen’ ‘n mman’ pe’ creder’ che ‘na vot’ ce stev’ verament’ st’ Iseo, si pur’ nun sann’ addò stev’ ‘e precis’ e un’ ric’ ‘na cos’ e n’at’ ne ric’ n’ata.
Tutt’ ‘sta rrobb’ e po’ venetten’ e Longobard’ e distruggetter’ tutt’ cos’ pecché s’eran’ convertiti ô Cristianesimo; secondo ‘a leggend’ praticamente ‘o duca Romulado II, assediato da Costante II – imperatore bizantino – se facett’ convincere dal vescovo Barbato a nun pratica’ cchiù e cult’ pagan’ p’esser’ salvat’ cu nu miracol’. E accussì fuje, bell’ e bbuon’ Costante II giraje ‘a cap’ ô cavall’ e se ne jett’ a Napul’; cchiù probabil’ è che se cacaje sott’ pecché stev’ arrivann’ Grimoaldo, ‘o pat’ ‘e Romualdo, ca er’ ‘o rre de Longobardi. Insomma, fatto sta che a ffinal’ avettan’ rinuncia’ a pratica’ ‘o cult’ ‘e Wothan che ê facev’ correr’ comm’ e pazz’ attuorn’ a ‘n albero – ‘o sacro arbor –  pigliann’ a mazzat’ ‘na pell’ ‘e capron’ ch’evan’ appis’ e se ne magnavan’ nu piezz’, secondo nu ritual’ guerriero râ antic’ tradizion’ germanica.
Mò ‘o vescov’ nun sul’ eva martellat’ pe’ fa’ furnì tutt’ ‘stu maciell’ ma  vulett’ pur’ taglia’ l’albero e quann’ ô facett’ ascett’ ‘na serp’!
Non a caso er’ chist’animal’ pecché l’adorazion’ râ viper’ oltre a esser’ nu fatt’ che già ce stev’ pe’ mmezz’ ‘e Iside, er’ pur’ ‘n element’ dâ  tradizion’ germanic’, addò venev’ a significa’ ll’atu munn’.
E ‘na vipera d’oro che ce piacev’ assaje  ô duca, ‘o pap’ ‘a facett’ squaglia’ pe’ ce fa’ nu calice ra mess’.
Mò che ‘sti cult’ eran’ ammiscat’ cu chill’ ‘e Iside po’ trua’ dimostrazion’ pur’ int’ ô fatt’ che nu sacc’ ‘e piezz’ egizian’ fujen’ truat’ pur’ int’ a cierti zzon’ cchiù periferic’ râ città, comm’ ‘a Ripa delle Janare, vicin’ ô ciumm’ Sabato da addò ven’ nu piezz’ ‘e bue ‘e marm’ rosa.
C’è da dire però che a ‘sti Longobard’ ce piacev’ assaje ‘stu rit’ e si pur’ evan’ giurat’ che nun ô facevan’ cchiù, s’annascunnevan’ pô fa’ o si no ‘o vescov’ se mettev’ int’ ‘e recchie n’ata vot’. Tra l’altro quann’ facevan’ e funeral’ abballavan’ e magnavan’, accerevan’ cavall’ e can’ ca po’ ‘nterravan’ cô muort’ mentre ‘e sacerdotess’ giravan’ attuorn’ all’albero comm’ ‘e ppazz’ e c’ascevan’ pur’ ll’orge.
Mò  immaginatev’ nu cristian’, magari bezzuoc’, che verev’ tutt’ ‘sti ccos’…comm’ nun se putev’ fa’ nu flash!
Genta ‘mbriac’, c’alluccav’, ‘o ball’ rô cavall’, sang’ pe’ tutt’ part’, nun se capev’ nient’!
Ce pensaje allora Pietro Piperno a ffa’ ‘na bella ‘nzalat’ ‘e tutt’ sta robb’ int’ ô trattat’ Della superstiziosa noce di Benevento: stu tip’ praticamente diceva che l’alber’ di noci era l’albero rô riavol’ e delle streghe, pecché ‘a noce tenev’ nu sacc’ ‘e proprietà curativ’ e chelli pover’ cristian’ che venevan’ chiammat’ streg’ altro nun eran’ che ggent’ ca cunuscev’ ‘e proprietà ‘e ll’erb’. Chist’ a ffinal’ era nu dottor’ che jett’ malament’ ‘n frev’ pecché iss’ ‘sti fatt’ nun ‘e sapev’ e praticament’ vulev’ scredita’ tutt’ ‘sti fatt’ ‘e medicina popolar’ pecché pe’ comm’ eran’ maschilist’ a chilli tiemp’, ‘o fatt’ che ‘e femmen’ sapevan’ nu sacc’ ‘e cos’ pe’ guarì ‘a ggent’ nun putev’ mai esser’!
‘Sti femmen’ sapevan’ pur’ fa’ parturì e secondo ‘na tradizion’ antica romana ‘e levatrici, cioè chell’ che tiraven’ for’ ‘o criatur’, usavan’ ‘na scop’ pe’ spazza’ for’ â port’ e alluntana’ e spirit’ maligni; chist’ ‘o mutiv’, forse, pecché int’ all’ammescafrancesc’ che s’è cumbinat’ ‘e streg’ volan’ ‘ncopp’ ‘e scop’.
‘Sti femmen’ s’agliutteven’ certe sostanz’ ca si pigliat’ cu ‘na dos’ massicc’, facevan’ venì l’allucinazion’, gli spasmi e pur’ ‘na sensazion’ ‘e vula’.
Nun sul’ se pigliavan’ ‘sta robb’, se ricev’ pur’ ca se passavan’ pe’ ccuoll’ ‘na specie ‘e uoglie – tipo ‘a Lancaster – tanto che parevano pronte pe’ anda’ a mare a Varcaturo.
A tal proposito vuless’ sottolinea’ comm’ Apuleio, nu scrittor’ latin’, int’ all’ opera soja Le Metamorfosi o L’asino d’oro, racconta tutt’ ‘o burdell’ ch’etta fa’ ‘o protagonist’, Lucio, ca fuje trasformat’ int’ a ‘nu ciuccio aropp’ che s’era passat’ pe’ ccuoll’ ‘n unguent’.
In realtà chist’ vulev’ addiventa’ nu guf’ ma ‘a tip’ sbagliaje buccacciell’ e accussì ‘o puveriell’ avetta fa’ nu maciell’ pe turna’ comm’ a nu cristian’ normal’ e ‘o putett’ fa’ sul’ magnann’ e petal’ ‘e ros’ durante ‘na prucession’ ‘e Iside.
Secondo la tradizione ‘sti femmen’ se ‘ncuntravan’ ‘o marterì e ‘o gioverì ma soprattutt’ ‘a nott’ tra ‘o 23 e ‘o 24, quann’ praticament’ se coglien’ ‘e noci pe’ ffa’ ‘o nucill’.
Fuje accussì allor’ che nascett’ ‘a figur’ râ strega che int’ all’etimologia rô nomm’ rimanda a stryx che in latino era ‘a cicciuettol’.
‘A janar’, int’ ‘o cas’ specific’ ‘e Benevient’,  at’ nun foss’ che l’espression’ ‘e nu ritual’ notturno pâ dea Ecate e pe’ Diana/Jana, associat’ â luna e pur’ ê bosc’, tutt’ ‘o bblocc’ continuatrici rê culti agrari pagan’. Tra l’altro Jana foss’ pur’ ‘a parta femminil’ ‘e Janus (Giano) che tenev’ ddoj facc’, comm’ a Gemini rê Cavalieri dello Zodiaco ed era legat’ ê pport’ e quindi all’idea rô passagg’ int’ all’aldilà. Doppia è pur’ ‘a natur’ ra janar’ che comm’ ‘o munaciell’ tant’ pò esser’ benevola tant’ pò fa’ i dispiett’. Mò, nu fatt’ ‘e chist’ int’ a ‘na città comm’ Benevento addò ‘o cult’ ‘e Iside, pur’ ess’ legata a fatt’ ‘e magia,  era assaje sentut’ truvaje terrien’ assaje fertil’ e non fuje pe’ scagn’ pecché ‘sta divinità egiziana er’ assaje putent’ e ‘o Cristianesimo l’eva pe’ fforz’ itta’ mmunnezz’ ‘nguoll’ pâ rimpiazza’ câ Maronn’.
Fatto sta che Iside, la “Ricca di misteri”, fuje ‘na granda dea d’ammor’ e madre ‘e misericordia; fuje l’esempio ‘e ‘na granda femmen’ ca lottaje contr’ â  mort’ pe’  trua’ ‘o marit’ fatt’ a ppiezz’.
Serpent’, stregh, riavol’, criatur’ accis’ e tutt’ ‘a mistificazion’ che ‘o Cristianesim’ ha purtat’ annanz’ nun ponn’ annasconner’ ‘na cosa che è accussì da sempre, fin dall’origine del mondo: ‘a grandezz’ che sta int’ a ‘na femmen’.

In ogni femmina.

  

 © 2015 Angela Giuliano

Annunci

6 Replies to “Iside a Benevento, ‘na maronna ‘e strega”

  1. Stasera ‘e tetesche germanese l’avimmo refelato quatto papagne, anzi, quatte sciamarrate
    tra a capa e ‘a noce d’o cuollo. ‘Endimeno teneno ‘e scolle ‘nfronte, altro che birra e crauti.

    Agnula(mio figlio quann’era piccirillo accussì chiammava Angela, la figlia dei nostri vicini di ballatoio), p’o mumento te pozzo dicere sulamente ca stasera ‘e tetesche( o ‘ e germanese, come li chiammava Vicienzo quanno jette emigrante ‘a fatica ade doic e ca dint’a Sanità chiammavano Vicienzo ‘o Pazzo, pecchè ‘na vota, piglianno o filobus, nun tenevo ‘o biglietto e quanno saglietteno ”i controllori, se facette passà pe’ pazzo e chille le dicette: – Tu puoi stare tranquillo, tanto sei pazzo. E Vicienzo a ncoppa a mano facette talmente ll’uocchie e pazze e se ntustaie tutt’a nercvatura ca chille se futtettono ‘e paura e nun dicettono ninte cchiù. Doppo ca Vicienzo scennetto d’o filobus, lui era diretto al manicomio di Capodichino… e se chiuretteno ‘e porte, aizaie ‘o braccio a ombrello e alluccaje: – Curnute! Scurnacchiate cuntente, v’aggio fatto fesso.Ve l’aggio miso a perocchio -.)hanno visto ‘nu cuofeno di presenze fantasmate: sia ‘e streghe e Beneviento, sia Iside e ‘a riscenneza soja e, secondo me, pure e surece russe. ‘Endimeno, annanz’a ll’uocchie e dint’e a capa, teneno ‘na giostra cchiù grossa ‘e ll’Edenlandia ‘e Parigge.

    PS: Dimane ‘o post m’o leggio chianu chiano mentre me magno ‘a zuppa ‘e latte c’u ‘nu cucchiarino e miele.

    Buonanotte azzurra.

    Mi piace

    1. Maro’, ancor’ teng’ int’ all’ uocchie ‘e guagliun’ che comm’ tanti piccoli Davide mettevan’ a sott’ chilli scellun’ tedesc’!
      E poi Maggio…maggioarricriat’!
      Oggi me so’ scetat’ cu nu mutiv’ ‘e cchiù p’esser’ ORGOGLIOSA…

      Mi piace

  2. Interessantissimo.
    “Truat’ pe’ scagn’ ‘ncopp’ a ‘na spiaggia annanz’ all’Acropoli ‘e Cuma,
    tocchi l’apice, mi sono commosso, turnat ‘uaglion…

    Complimenti

    Mi piace

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

w

Connessione a %s...