‘O chiammavan’ Nitsch ‘o chianchier’

Ce sta ‘nu museo a Napul’, vicin’ ô cavon’, assai particolare: ccà nun ce stann’ appis’ o mur’ dipinti cu maronn’ o belli giuvinott’ o statue, no niente ‘e chest’.
‘A particolarità è che è totalmente dedicato a ‘n artista austriaco, Hermann Nitsch, che praticamente l’arte soja è chell’ ‘e squarta’ l’animal’.
Par’ infatti ‘e trasì dint’ â putec’ rô chianchier’ sul’ che invece rê caprett’ appis’ e ‘o Volto Santo se veren’ video ‘e cristian’ ‘n copp’ â croce e sang’ pe’ tutt’ part’; tras’ llà dint’ e sicuramente è nu fatt’ assai diverso rispetto a quann’ accumpagn’ a mammà a fa’ ‘a spes’; tras’ làl ddint’ e par’ ‘e sta’ dint’ a nu suonn’.
‘A cosa bbella ‘e ‘stu museo è che tant’ann’ fa’ era ‘na centrale elettrica ca servev’ pe’ sustenta’ ‘o teatro Bellini e manco a farlo apposto pur’ mò conserva chillu spirit’ ‘e alimenta’ cu l’arte nu quartier’ nu poc’ sgarrupat’.

Ma cercamm’ ‘e capì che ce pass’ pe’ dint’ ê cerevell’ e pô stommac’, soprattutto, a ‘stu cristian’.

Alla base râ capat’ che s’è pigliat’ (e sì, perché ogni artista ten’ ‘a capata soj) ce sta ‘o teatro – il Teatro delle orge e dei misteri – ca nun è nu spettacolo a luci rosse ma ‘na maner’ ‘e rappresenta’ e pur’ ‘e fa viver’ l’esperienza umana.

Cioè, praticamente, è comm’ si foss’ ‘na rappresentazion’ ‘e tutta l’umanità e accussì ‘a ggent’ verenn’ s’identifica e se pulizz’ ‘a cuscienz’, comm’ succerev’ cô teatro greco antico.

Quann’ se vere itta’ tutt’ chillu sang’ se sent’ ‘na liberazione da tutt’ ‘e costrizion’, da tutt’ ‘e strunzat’ ca t’abboffan’ ‘e cerevell’, da chell’ ch’e fa’ e chell’ ca nun può ffa’ e tu vien’ a nascer’ ‘n ata vot’!
Pecché ‘a verità è che c’acciren’ ‘a salut’ – metaforicamente e pur’ letteralmente – sotterrann’ nu sacc’ ‘e mmunnezz’ ca po’ â primma bbott’ jesc’ pe’ ffor’; chell’ ca è spuorc’ va annascus’, l’educazione c’insegna ca chell’ ca nun se po’ tucca’ è “cacca”.
E allora crisc’ e camp’ cu ‘stu pensier’ ‘n cuorp’e intanto ‘a munnezz’ arint’ se fa semp’ cchiù pesant’ e cresce pur’ ‘a voglia d’allucca’ ma nun ‘o può ffa’ pecché o si no te piglian’ pe’ pazz’.
Si però po’ tien’ ‘e ppall’ ‘a truov’ ‘a maner’ ‘e vummeca’ tutt’ cos’ pe’ ffor’ e allora allucc’, te stracc’ ‘e pann’ ‘a cuoll’ e, comm’ ricev’ primm’, tuorn’ a nascer’.
Ca po’ si ce pensat’ quann’ ‘a femmena sgrav’ è tutt’ nu fatt’ ‘e sang’ ca schizz’ pe’ tutt’ part’, dulor’ e suror’; e dint’ ô munn’ ce sta ‘na persona nov’.
Sgravare, ossia quann’ te liev’ nu pes’: t’alliggerisc’.
‘A nascita, accussì comm’ ‘a mort’, è nu ritual’ ‘e passaggio e Nitsch chest’ vò dicer’ cu l’arte soja: dint’ a tutt’ chillu maciell’ ce sta ‘na celebrazion’ comm’ quann’ scann’ nu puorc’.
I rituali arcaici che ‘stu cristian’ ripropone ‘ncopp’ ê tele e fa viver’ cu ‘sti performance so’ i stessi che ancor’ se ponn’ vere’ dint’ ê feste ‘e paese (agg’ scritt’ rê fujenti, per esempio), dint’ â musica, dint’ a canalità ‘e cierti fatt’
Dint’ ê radici ce sta ‘o futur’ ‘e chell’ ca può addiventa’ si nun te faj passa’ ‘o genio ‘e scava’ arint’.
Nu fatt’ accussì insomma è comm’ nu catarr’ pe’ l’anima e non a caso ‘o verbo greco da addò ven’ ‘a parola catarr’ significa scorrere: accussì ‘ncopp’ ê tele soje scorre ‘o sang’, comm’ dint’ a chill’ ca so’ chiammat’ “dipinti versati” addò chell’ ca import’ nun è tant’ ‘a raffigurazion’ ma ‘o fatt’ che ce sta rrobb’ ca scorr’.

A Napul’, città addò ‘o mit’ se fa carne ogni santo juorn’, addò ‘a sacralità è profana, Nitsch s’è cunsulat’ proprj tant’è che ha vulut’ fa’ nu confronto cu ‘n at’ artista che a ccà ha fatt’ ‘a uerr’: indimen’ Caravaggio.
‘A forza espressiva e ‘o naturalismo ‘e ‘na rappresentazione crudelmente reale trova nu punt’ ‘e contatto dint’ a ‘sti dduje cristian’ che cu l’art’ llor’ hanna fatt’ fa’ nu sacc’ ‘e croc’ nu sacc’ â smerz’ a nu sacc’ ‘e ggent’.
Accussì comm’ ‘a pittur’ ‘e Caravaggio, pur’ chell’ ‘e Nitsch jesc’ for’ – ‘int’ a ‘stu cas’ letteralmente – râ tela e arrevot’ tutt’ cos’, uocchi e cuscienz’; chist’ ‘o mutiv’ per cui ‘stu Teatro vò esser’ innanzitutt’ ‘n’ esperienza ca te port’, comm’ ricev’ primm’, a scenner’ ‘n funn’ p’arriva’ a te libera’.
È nu fatt’ assaje, ma proprj assaje dionisiaco, insomma.

Ma dionisiaco nun significa che è fatt’ ‘a cap’ ‘e cazz’, accussì comm’ ven’!

Ce ‘sta ‘na priparazion’ aret’, ‘n’analisi ‘e ogni dettaglio: musica, tiemp’, recitazion’ e gest’.
‘O gest’, soprattutto, nun è casual’ ma pensato: ‘o gest’, che tra e tanta fatt’ fa’ ‘e chest’esibizion’ ‘na liturgia, è ‘a vestizion’ cu ‘na tunica; ‘sta tunica nun è semplicement’ ‘na pezza ca se mett’ ‘nguoll’ pe’ nun se ‘nguacchia’ né tantomeno sulamente nu riferimento all’aspetto sacro ‘e tutt’ ‘stu maciell’: diventano ‘a materializzazion’ ‘e chillu gest’ che se fa carn’ llà dint’.
E chist’ ‘o mutiv’ per cui vengono poi mis’ ‘n croce: so’ reliquie, testimonianze, trasudano l’emozione ‘e chillu mument’ che ha pigliat’ forma dint’ a chelli pieghe.

Dint’ a ‘sti juorn’ se stann’ facenn’ nu sacc’ ‘e tarantell’ pecché nun vonn’ ‘na mostra ‘e chist’artista a Palermo: chi allucc’ accà, chi allucc’ allà…io, senza trasì dint’ ô merito râ quesion’, dico la mia con molta semplicità: primm’ ‘e v’indigna’, LEGGITEV’ COCCOS’, verit’ ch’è stat’ l’azionismo viennese per esempio.

Cioè, cercate ‘e capì pecché ‘stu cristian’ ce venut’ a mment’ ‘e fa’ ‘sti fatt’.
Che ce sta aret’, che ce sta arint’, qual è ‘a Weltanschauung (‘a maner’ ‘e vere’ ‘o munn’) che ‘int’ a ‘stu cas’ è chin’ rê nevrosi ‘e l’espressionismo austriaco, râ filosofia ‘e Wittgenstein e râ psicoanalisi ‘e Freud.

Pecché nun s’adda mai smettere ‘e se fa domande.
Mai.

A mio modestissimo parere si chist’omm’ a 70 ann’ ten’ ancor’ coccos’ ‘a dicer’ è pecché forse, evidentemente, nun ce sta nient’ ‘e meglio in giro e in ogni caso, fa ancora parlare.
A chest’ pur’ serv’ l’arte, a smover’ ‘e cuscienz’.

Ah, cosa importante: l’animal’ so’ già accis’, so’ pigliat’ direttamente rê maciell’.

Dunque nun accirit’ ‘a salut’ quann’ po’ sit’ e primm’ a magna’ ‘na bella fella ‘e carn’ arrustut’ ‘ncopp’ â furnacell’.

p.s.= un particolare ringraziamento, carnal’, ad Alba Palmiero per il proficuo confronto in merito all’argomento.

© 2015 Angela Giuliano